Popular Bible Verses from ROMANOS 14

Share

Mani Ʉpaʉ Dio ye macaje me ãa mani ʉgarique, mani etirique macaje. Dio ye majuu me ãa tiea. Oco bairije maca ãa cʉ̃ ye macaje majuu cʉ̃ ca-rotirije: Cariape átaje. Aperã mena caroaro ãnaje. Cʉ̃ Espíritu Santo jʉgori mani ca-ani wariñuurije. Tie maca ca-ñuu netorije majuu ãa. To bairije Jesucristo cʉ̃ ca-boorije cá-ánare, “Caroarã ãma,” na ĩi tʉjʉ wariñuʉmi Dio. To bairona, “Caroarã ãma,” na ĩi tʉjʉnucuma camaja aperã quena to bairo cá-átinucurãre.

Mani nipetirã mani Ʉpaʉ Jesú yarã aniri cʉ̃re ca-nʉcʉbʉgoparã mani ãa. To bairi catírãna mani majuuna mani ca-anipere ca-rotirã mee mani ãa. Mani ca-bai yajipe quenare mani majuuna mani roti majiquẽe. Mani ca-bai yajiro bero quena Dio yarã aniri cʉ̃re cá-áti nʉcʉbʉgoparã mani ãa. To bairi catírãna, o bai yajirã quena mani Ʉpaʉ Jesú yarã cʉ̃re ca-nʉcʉbʉgoparã mani ãa.

To bairi caroa macare mani ána, aperã mena caroaro anigarã. Jesucristore mani ca-apiʉja nutuaparore bairo cá-átinemopa wamerire mani ána.

To bairi, “Dio cʉ̃ ca-tʉjooquẽtiere mʉ áa,” ca-ame ĩi wada paiquetipe ãa. Aperã mani yarã Jesúre ca-nʉcʉbʉgorã unare caroorije na cá-áto cá-átiqueticõape ãa.

Oco bairo ĩi ucarique ãa Dio Wadariquepʉre: “Cariape majuu yʉ ĩi,” ĩmi mani Ʉpaʉ Dio ca-anicõa aninucuʉ. “Camaja nipetirã yʉre áti nʉcʉbʉgori yʉ tʉna rʉpopatuapʉ ejacumugarãma. Nipetirã, ‘Mʉna mʉ ãa Dio, caroaʉ, ca-tutuaʉ majuu,’ yʉre ĩi nʉcʉbʉgogarãma,” ĩi ucarique ãa. Ti wame ucarica wame queti apirã mani maji. Mani ca-ano cõorena manire jeniñagʉmi Dio ati yepa ãnapʉ mani cá-átajere.

Jicãarã Jesúre nʉcʉbʉgobana quena cʉ̃ ye quetire caroaro api majiquẽema. To bairo caroaro ca-api majiquẽna na ca-anibato quena na mena caroaro ãña. Na ca-tʉgooñabati wamerire cawatoa macá wamerire bairo na ca-ĩrije na mena ame wada canamuqueticõaña.

Apeĩre ca-paabojaʉre, “Caroaro mʉ ʉpaʉre cʉ̃ mʉ átibojaquẽjupa,” cʉ̃re mani ĩi majiquẽna. Cʉ̃ ʉpaʉ jicãʉna ãmi, “Caroaro yʉre mʉ átibojayupa,” ca-ĩi majii. O, “Caroaro yʉre mʉ átibojaquẽjupa,” ca-ĩi majii ãmi cʉ̃ ʉpaʉ. To bairona ãa Jesú yarã quenare. “Caroaro yʉ átibojama,” o, “Caroaro yʉ átibojaquẽema,” jicãʉna ãmi mani Ʉpaʉ Jesú to bairo manire ca-ĩi majii. Caroaro mani cá-áticõa aninucuro mani átinemo majimi mani Ʉpaʉ.