ROMANOS 13

1Dio majuuna ãmi ati yepa macana ca-rotirãre ca-cũʉ. To bairi Dio cʉ̃ ca-cũricarã ãma ʉparã. Cʉ̃ majuuna cʉ̃ ca-bejericarã ãma ʉparã ca-ãna. To bairo cʉ̃ ca-cũricarã na ca-ano ĩirã mani nipetirã nare ca-apiʉjaparã mani ãa. 2Noa ati yepa macanare ca-rotirãre ca-bai netoorã una Dio cʉ̃ ca-cũricarãrena ca-bai netoorã ãma. Na ca-bai netoorije wapa popiye tamuogarãma. 3-4Ca-rotirãre na ca-cũuñupi Dio caroaro mani ca-ani wariñuuparore bairo ĩi. Caroaro cá-ána maca ʉparãre na uwiato ĩi mee na ca-cũuñupi Dio ʉparãre. Rooro cá-ána maca ʉparãre na uwiato ĩi na ca-cũuñupi Dio. To bairi ʉparãre uwiquẽnana caroaro na mena anigarã caroaro ája. To bairo caroaro mʉja cá-áto, “Caroaro mʉja áa,” mʉja ĩigarãma naa. Caroorije cá-ána maca mʉja ca-ãmata uwiya, cariapena manire popiyeyegarãma ĩirã. To bairo rooro cá-ánare ca-popiyeyeparã na ca-cũuñupi Dio ʉparãre. 5To bairi ʉparãre na apiʉjaya, mani popiyeyerema ĩi tʉgooñari. To bairi, “Na ca-rotirije cariape macaje ãa,” ĩi tʉgooñari nare apiʉjaya. 6Camajare caroaro nare ca-jʉgo aniparãre na ca-cũuñupi Dio ʉparãre. To bairi Dio nare cʉ̃ cá-áti rotiriquere ánama ĩirã na ye paarique wapa gobierno ye ca-anipe wapa na ca-jenirijere ca-wapayepe ãa.

7Cariape wapayeya nipetirãre na mʉja ca-wapamorijere. Niyeru gobierno ye ca-anipe ʉparã na ca-jenirije quenare na wapayeya. Mʉja ʉparã nipetirãre caroaro nʉcʉbʉgorique mena na apiʉjaya.

8Aperãre wapamo mʉgonucuqueticõaña. Wapamorique mena ãnaje ñuuquẽe. To bairi ca-ame mairã maca ãña. Aperãre ca-maii Dio cʉ̃ ca-rotirique cõona cá-ácʉ ãmi cʉ̃ ucʉ̃. To bairi aperãre na maiña. 9Dio cʉ̃ ca-rotirique oco bairo ĩi ucarique ãa: “Áti epericarã cʉtiqueticõaña. Jĩaquẽja. Aperã yere jee rutiquẽja. Aperã na cá-átiere ĩitoqueticõaña. Aperã yere tʉjʉ ʉgooqueticõaña.” Ape wameri ãa Dio cʉ̃ ca-rotirica wameri. Tiere tʉjʉ neo nʉcori ame maiña. Mʉja majuuna mʉja ca-mairore bairona aperãre na maiña. Ti wame, “Ame maiña,” Dio cʉ̃ ca-rotirica wame mani cá-ápata Dio cʉ̃ ca-rotirica wameri ca-ano cõo cá-áti peorã mani anigarã. 10Aperãre ca-maii ucʉ̃ rooro na átiquẽcʉmi cʉ̃ tʉ macanare. To bairi aperãre na mani ca-maiata Dio cʉ̃ ca-rotirique ca-ano cõo mani áti peocõagarã.

11Mani ca-ani yʉtea yucʉacana petigaro ĩi tʉgooñari caroaro maja catíya. Ca-canirãre bairona, ca-tʉgooñaquẽna aniqueticõaña. Caroaro tʉgooñaña Jesú cʉ̃ ca-tunu atípere. Petoacã rʉja Jesú tunu ejari ʉmʉrecóopʉ cʉ̃ yarãre cʉ̃ ca-jee aáparo. Nemoo Jesúre cawama apiʉjarã ãnapʉ, “Ca-yoato bero cʉ̃ tʉpʉ mani jee aágʉmi,” mani ca-ĩi tʉgooñanucubapʉ. Yucʉacã mani maji: Petoacã rʉja Jesú manire ca-netoo catíoʉ cʉ̃ ca-tunu rui atíparo. 12Camaja ati yepa macana rooro na cá-áti ãnona tunu atígʉmi Jesú. To bairi ati yepapʉ caroorã watoapʉ mani ca-ani yʉtea petoacã mena peticoato bai. Yucʉacana Jesú cʉ̃ yarãre manire jee aágʉmi cʉ̃ tʉpʉ, caroorije ca-manopʉ. To bairi ati yepa macana caroorije na cá-átinucurije uniere cá-áti janaparã mani ãa. Caroa macaje Dio cʉ̃ ca-tʉjoorije macare cá-átinucupe ãa. 13To bairi caroa jetore cá-áti anicõa aninucupe ãa. Boje rʉmʉ ca-ano rooro camaja na ca-ĩi epe awajarije unie cá-ána mani aniquẽna. Ca-eti cumuqueticõape ãa. Áti epericarã ca-cʉgoquetipe ãa. Mani ame wada canamuqueticõato. Aperãre mani ca-ʉgoo tʉgooña netoo nʉcaqueticõape ãa. 14To bairi mani Ʉpaʉ Jesucristo cʉ̃ cá-átinemorije mena caroa macaje maca áticõa aninucuña. To bairo áticõa aninucuri caroorije mʉja cá-átibopere tʉgooñaqueticõaña.

Currently Selected:

ROMANOS 13: TAVNT2

Highlight

Compare

Copy