ROMANOS 15

Agrada a tu prójimo, no a ti mismo

1Jesucristo cʉ̃ ca-tʉjoorijere caroaro ca-tʉgooña majirã maca aperãre wada paiquẽnana ca-nʉcape ãa. “Na ca-tʉgooñari wame ñuuquẽe,” nare ca-ĩi wada paiquetipe ãa, Jesucristo yere caroaro ca-tʉgooña majiquẽna macare. “To bairo cá-átiquetipe ãa,” na ca-ĩi tʉgooñari wamere mani quena cá-átiquetiparã mani ãa, apiʉja janarema ĩirã. Mani majuuna mani cá-áti wariñuuri wame jetore cá-átiquetipe ãa manire. 2Aperã mani tʉ macana na ca-tʉjʉ wariñuupe macare cá-átipe ãa. Cristore seetobʉja na apiʉjanemoato ĩirã na ca-tʉjoorije macare mani ána. 3Cristo cʉ̃ quena cʉ̃ majuuna cʉ̃ cá-áti wariñuuri wame cá-átiquẽjupi, manire popiye tamuobojaʉ. Oco bairo ĩi ucarique ãa Dio ye quetire ucarica pũuripʉ Cristo cʉ̃ Pacʉre cʉ̃ ca-ĩriquere: “Mʉre ca-ĩi tutirã rooro mʉre na ca-ĩi eperije nipetirije yʉrena rooro ĩi eperã ĩima.” 4Tirʉmʉpʉ Dio ye queti ucarique nipetirijere ca-cũuñupi Dio, tiere caroaro camaja na majiato ĩi. To bairi tie quetire majirã, “Dio, ‘To bairo mʉjaare yʉ átibojagʉ,’ cʉ̃ ca-ĩrique cõo mani átibojagʉmi,” mani ĩi tʉgooña wariñuu ani maji. To bairo ĩi tʉgooña majiri, mani nʉca maji, popiye manire to ca-baibato quena. 5Popiye manire ca-bairije to ca-anibato quena mani ca-nʉca majiro áami Dio. Mani ca-tʉgooña ocabʉtiro áami Dio. To bairi Jesucristo cʉ̃ ca-boorore bairo mʉja quenare caroaro mʉja ca-ame jʉgo ãno, jicãrore bairo mʉja ca-ano mʉjaare cʉ̃ átibojaato. 6To bairi jicãro mena tʉgooñari Dio mani Ʉpaʉ Jesú Pacʉre, “Mʉ ñuu majuucõa,” cʉ̃re mʉja ĩi wariñuugarã mʉja quena.

El evangelio es anunciado a los que no son judíos

7To bairi, “Jã mena macana ãña,” ĩiña aperã Jesucristore ca-apiʉjarãre. “Yʉ mena macana ãña,” manire ca-ĩiñupi Jesucristo quena. To bairo cʉ̃ ca-ĩricarore bairona caroaro ĩiña mʉja quena aperã Jesucristore ca-apiʉjarãre. To bairo caroaro mʉja ca-ĩi nʉcʉbʉgoro tʉjʉrã aperã cariape, “Caroaro áami Dio,” ca-ĩi nʉcʉbʉgorã anigarãma na quena. 8Judío majare na átinemoʉ acʉ́ ca-baiyupi Cristo, yʉ ĩi. Jã ñicʉ jãare Dio nare cʉ̃ ca-buioricarore bairona cá-ájupi Dio, Cristore cʉ̃ joʉ. To bairi Dio, “ ‘Caroaro yʉ átibojagʉ,’ cʉ̃ ca-ĩrique cõo cariape cá-áti maji peoʉ ãmi,” mani ĩi maji. To bairo mani ca-ĩi majiparore bairo ĩi cá-ájupi Dio. 9Aperã judío maja ca-aniquẽna, “Caroaro mani bopaco tʉjʉri caroaro manire átibojami Dio,” ĩi majima. To bairi wame na quena na ca-ĩi majiparore bairo ĩi cá-ájupi Dio, Cristore joʉ. To bairona ĩi ucarique ãa Diore Cristo cʉ̃ ca-ĩrica wame:

Aperã tʉpʉ judío maja ca-aniquẽna na ca-anopʉ, “Caroaʉ majuu ãmi Dio,” mʉre yʉ ĩigʉ. “Mʉre nʉcʉbʉgori mʉre yʉ ĩi wariñuu bajagʉ,” Cristo Diore cʉ̃ ca-ĩrique ca-ucayupa tirʉmʉpʉ macana.#2 Samuel 22.50

10Ape wame quenare oco bairo ĩi ucarique ãa:

Judío maja aniquetibana quena Dio yarã judío maja menare wariñuuña mʉja quena.#Deuteronomio 32.43

11Ape wame tunu oco bairo ĩi ucarique ãa:

Judío maja ca-aniquẽna, nipetiri poari macana, “Caroaʉ majuu ãmi Dio,” mʉre na ĩi wariñuu bajaato.#Salmo 117.1

12Ape wame Isaía quena ca-ucayupi oco bairi wamere:

Buiagʉmi jicãʉ Isaí pãrami. Judío maja ca-aniquẽna quenare ca-rotii anigʉmi. Cʉ̃re apiʉjari, “Caroaro mani átibojagʉmi,” ĩi tʉgooñagarãma judío maja ca-aniquẽna.#Isaías 11.10

13Dio caroaro manire cʉ̃ cá-átibojapere tʉgooñari mʉja tʉgooña wariñuu maji. To bairi caroa ani wariñuurique mʉjaare cʉ̃ joato Dio cʉ̃re ca-apiʉjarã mʉja ca-ano. Cʉ̃ Espíritu Santo mʉjaare cʉ̃ átinemoato, “Caroaro manire átibojagʉmi,” netobʉjaro mʉja ca-ĩi tʉgooña majiparore bairo ĩi.

14Yʉ yarã, mʉja ca-aniere oco bairo caroaro yʉ maji: Caroaro cá-ána mʉja ãa. Jesucristo yere caroaro ca-majirã mʉja ãa. To bairo ca-ãna aniri caroaro mʉja ame buio maji mʉja ca-anipere. 15-16To bairo caroaro mʉja ca-baibato quena tutuaro mena mʉjaare yʉ uca queti joo, mʉjaare buiori. Na ca-apiriquere na majiritiqueticõato ĩi to bairona mʉjaare yʉ buio atiere. Dio yʉre mai tʉjʉri yʉ ca-cũuwĩ judío maja ca-aniquẽnare Jesucristo ye quetire ca-buiopaʉre. Judío maja ca-aniquẽna mʉja una na quena na apiʉjaato ĩi to bairona yʉ ca-cũuwĩ. To bairi cʉ̃re mʉja ca-apiʉjaro mʉja tʉjʉ wariñuugʉmi Dio. Mʉja tʉjʉ wariñuuri cʉ̃ Espíritu Santo jʉgori caroarã cʉ̃ yarãre mʉja cũugʉmi Dio mʉja quenare. Aperã quenare mʉjaare bairo ca-ãna judío maja ca-aniquẽnare cʉ̃ yarã na cũugʉmi Dio yua.

17Jesucristo yʉre cʉ̃ cá-átinemoro mena Dio yʉre cʉ̃ cá-áti rotiriquere caroaro yʉ áa. To bairi caroaro yʉ tʉgooña yʉ ye paariquere judío maja ca-aniquẽnare yʉ ca-buiorijere. 18-19Cristo yʉ mena cʉ̃ cá-átaje jetore mʉjaare yʉ buionucu. Caroaro na cá-átibojayupi Cristo judío maja ca-aniquẽna quenare cʉ̃ ye quetire yʉ ca-buiorijere na ca-apiʉjaro. Jesucristo yʉre cʉ̃ cá-átinemorije mena yʉ ca-buionucuwʉ, caroa macajere yʉ cá-átinucuwʉ. Espíritu Santo cʉ̃ ca-tutuarijere cá-áti iñoowĩ camajare apeye unie tʉjʉ acʉarica wamerire. To bairi yʉ jʉgori tiere Dio nare cʉ̃ cá-áti iñoori wameri tʉjʉrã ca-apiʉjawã judío maja ca-aniquẽna. Cristo ye quetire buio peocõari yʉ ca-buio teña jʉgowʉ Jerusalén'pʉ. Buio teña nutua, nipetiropʉ Ilírico ca-wamecʉtopʉ yʉ ca-buio nutua ejoowʉ. 20Cristo ye quetire camaja tiere mai ca-apiñaquẽna tʉpʉ yʉ ca-buionucuwʉ. Tiere, meere ca-majirã tʉpʉ, aperã, meere na ca-buioricaropʉre yʉ ca-buionemogaquẽpʉ. 21To bairona yʉ cá-áti nutuatiere Dio Wadariquepʉ oco bairo ĩi ucarique ãa:

Cʉ̃ ye quetire ca-majiquẽnare na ĩi buiogarãma. Tiere nare na ca-ĩi buioro apirã caroaro api majigarãma ca-jʉgoye ca-apiñaquetana anibana quena, ĩi ucarique ãa.#Isaías 52.15

Pablo piensa ir a Roma

22Jesú ye quetire ca-apiquetinucuricarã tʉpʉ capee macaripʉ buio teñanucubacʉ mʉja tʉpʉ yʉ cá-aá majiquẽpʉ mai. Capee niri seeto mʉja tʉpʉ aágabacʉ quena yʉ cá-aá majiquẽpʉ. 23Yucʉra yua ati macaripʉ yʉ buio teña yaparowʉ. To bairi mʉja tʉpʉ yʉ aágʉ yoaro majuu capee cʉmari mʉja tʉpʉ seeto cá-aáganucubaepaʉ aniri. 24Españapʉ yʉ aágʉ. Topʉ aácʉ mʉjaare yʉ tʉjʉ neto aágʉ. Mʉjaare tʉjʉʉ, jicã yʉteacã mʉja tʉpʉ yʉ ca-ani wariñuuro bero Españapʉ yʉ ca-neto aápere yʉre mʉja átinemogarã. 25Topʉ cá-aápaʉ anibacʉ quena yucʉacã Jerusalén'pʉ aácʉ yʉ áa mai. Topʉ ca-ãna Jesúre ca-apiʉjarãre átinemoʉ niyeru nare yʉ joogʉ. Macedonia macana, Acaya macana yʉre na ca-jee aá rotirijere na yʉ jee aá joobojagʉ Jerusalén macanare. 26-27Macedonia macana, Acaya macana judío maja ca-aniquẽna, “Jerusalén'pʉ ca-ãna judío majare Jesúre ca-apiʉjarãre nare cá-átinemoparã mani ãa ca-bopacoorãre,” ca-ĩi tʉgooñañupa. To bairo tʉgooñari niyeru ca-jeni neoñupa, na átinemogarã. To bairo na cá-átaje ñuu majuucõañupa. Judío maja Dio ye macajere na ca-buio jʉgoyupa judío maja ca-aniquẽna macare. To bairi na cá-átiboja jʉgorique wapayerãre bairona áama Macedonia macana, Acaya macana niyeru nare na ca-jooro ca-bopacoorãre judío majare. Tie niyeru na ca-jeni neoriquere na joobojagʉ Jerusalén'pʉ aácʉ yʉ áa mai. 28Tie niyeru na ca-jeni neoriquere Jerusalén macanare na joo yaparoʉ, Españapʉ aácʉ mʉjaare yʉ tʉjʉ neto aágʉ. 29Mʉja tʉpʉ ejaʉ caroa macaje Cristo yere mʉjaare yʉ buiogʉ. To bairo yʉ ca-buioro apirã seeto mʉja api wariñuugarã. Tie jʉgori caroaro ani wariñuuriquere mʉja joogʉmi Cristo yua.

30Yʉ yarã, mani Ʉpaʉ Jesucristore ca-nʉcʉbʉgorã mʉja ãa mʉja quena. Espíritu Santo jʉgori ca-ame mairã mʉja ãa. To bairo ca-ãna aniri seeto Diore yʉ jenibojaya yʉ ca-baipere. 31Judea yepapʉ ca-ãna Jesúre ca-apiʉjaquẽna rooro yʉre na átiqueticõato ĩirã, Diore yʉ jenibojaya. Jesucristore ca-apiʉjarãre niyeru nare yʉ ca-jee aátiere tʉjʉri na ani wariñuato ĩirã Diore jeniya. 32To bairo Diore yʉre mʉja ca-jenibojaro wariñuurique mena mʉjaare yʉ tʉjʉ aágʉ Dio cʉ̃ ca-booata. To bairi mʉjaare tʉjʉ ejaʉ caroaro yʉ yerijã tʉjʉ ani wariñuugʉ mʉja tʉpʉ. To bairo yʉ ca-baiparore bairo ĩirã Diore yʉ jenibojaya. 33Dio caroa ani yerijã wariñuuriquere ca-joʉ nipetirã mʉja mena cʉ̃ anicõato. Amén.

Currently Selected:

ROMANOS 15: TAVNT2

Highlight

Compare

Copy