FILIPENSES 2

La humillación y la grandeza de Cristo

1To bairi Jesucristo cʉ̃ yarã mani ca-ano tʉgooña ocabʉtiriquere mani joomi. Seeto mani maimi. Cʉ̃ Espíritu Santore mani ca-jooyupi mani mai tʉjʉri. To bairi mani quena manire cʉ̃ ca-mai tʉjʉrore bairona aperãre mani ame mai tʉjʉ nʉcʉbʉgo maji. 2To bairi caroaro ame jʉ́go aninucuña, ame ĩi wada neto tʉgooñaquẽnana. Jicãrore bairo ame maiña. To bairi jicãrore bairo caroaro mʉja ca-anipere tʉgooñanucuña. To bairo ãnaa jicã wamere bairona ca-ame jʉgo ána mʉja anigarã. To bairo mʉja ca-ame jʉ́go aniere queti apii, yʉ api wariñuu netogʉ. 3“Ca-ãni jʉgoʉ yʉ anigʉ,” ĩi tʉgooña ʉgoo punijiniquẽja. Mʉja majuuna, “Aperã netoro ca-ani majuʉ yʉ ãa. Caroaro ca-majii yʉ ãa,” ĩi tʉgooñaqueticõaña. Oco bairo maca ĩi tʉgooñaña: “Aperã maca yʉ netoro ca-ani majuurã, ca-majirã ãnama. To bairi apeĩ maca ca-jʉgo ãcʉ̃ cʉ̃ anicõato,” ĩi tʉgooñaña. 4Mʉja ye jetore tʉgooñaquẽja. Aperã ye quenare na tʉgooñanemoña. 5To bairi wame maca ca-ĩi tʉgooñañupi Jesucristo quena. To bairi mʉja quena to bairona ĩi tʉgooñaña. 6Cʉ̃a Dio Macʉna anibacʉ quena Dio mena cʉ̃ ca-jʉgo aniere ca-maiquẽjupi. 7To bairo Dio mena cʉ̃ ca-jʉgo aniere maiquetiri tie nipetirijere ca-cũu weoyupi, cawatoa ca-ãcʉ̃, paabojari majocʉre bairo maca yʉ anigʉ ĩi. To bairi Dio Macʉna anibacʉ quena manire bairona camajocʉna ca-buiayupi. 8Camajocʉna buiari cawatoa ca-ãcʉ̃, ca-bopacoʉre bairo ca-añupi. Paabojari majocʉre bairona Dio cʉ̃re cʉ̃ ca-rotirijere cá-ájupi. Cʉ̃re ca-teerã cʉ̃re na ca-papua jĩarije to ca-anibato quena Dio cʉ̃re cʉ̃ cá-áti rotirijere cá-ájupi. 9To bairo Dio cʉ̃re cʉ̃ cá-áti rotirije cá-ácʉ cʉ̃ ca-ano maca ca-ani majuʉre cʉ̃ ca-cũuñupi Dio. Camaja nipetirãre Jesúre nʉcʉbʉgo rotimi Dio. Camaja nipetirã Ʉpaʉ ca-anipaʉre cʉ̃ ca-cũuñupi yua. 10To bairi, “Jesú ãmi,” aperã na ca-ĩiro apirã nipetirã ejacumugarãma, cʉ̃ nʉcʉbʉgori. Dio tʉ macana, ati yepa macana, ca-bai yajiricarã nipetiro ejacumugarãma, cʉ̃ nʉcʉbʉgori. 11Nipetirã, “Jesucristo Caʉpaʉ majuu ãmi,” cʉ̃ ĩigarãma, mani Pacʉ Dio quenare cʉ̃ ĩi nʉcʉbʉgori.

12Yʉ yarã, yʉ ca-mairã, mʉja tʉpʉ yʉ ca-ano yʉ ca-buiorijere caroaro mʉja ca-apiʉjanucuwʉ. Yucʉ quenare mʉja tʉpʉ yʉ ca-aniquẽtie to ca-anibato quena netobʉjaro apiʉjaya mʉjaare yʉ ca-ĩi buiorijere. Diore ca-majiquẽna na ca-popiye tamuori paʉpʉ cá-aáboricarãre Dio cʉ̃ ca-netoo catíoricarã mʉja ãa mʉja quena. To bairi cʉ̃ ca-netoo catíoricarã aniri caroaro ája. Caroorije átaje macare uwi tʉgooñaña. 13Dio maca mʉja mena ãmi, mʉjaare átinemoʉ, cʉ̃ ca-boorije jetore mʉja cá-áti majiparore bairo ĩi. 14To canacã wame mʉja cá-átiere ĩi punijini tʉgooñaquẽnana átinucuña, ame ĩi wada netorique manona. 15To bairo caroaro mʉja ca-bairo tʉjʉrã, “Caroorã ãma, ti wamere caroorijere áama naa,” noa mʉja ĩi majiquetigarãma. Caroarã, caroorije cá-átiquẽna mʉja anigarã, ati yepa macana caroorã watoapʉ anibana quena. Dio punaa aniri caroare cá-ána mʉja anigarã. Ati yepa ca-naitĩarore bairo ca-ano ca-bujurijere bairo maca ca-ãna mʉja anigarã, Cristo cʉ̃ ca-aniere aperãre na majiorã. 16To bairo Cristo cʉ̃ ca-aniere camajare na majiorã Dio mena caroaro ãnaje quetire na mʉja buiocõa aninucugarã. To bairo caroaro mʉja ca-bairo seeto mʉjaare yʉ wariñuugʉ Cristo cʉ̃ ca-tunu ejari paʉ ca-anopʉ. “Jocʉ majuuna popiye cʉtaje mena Cristo ye quetire na yʉ ca-ĩi buiobapʉ,” yʉ ĩiquetigʉ ti paʉ ca-anopʉ to bairo caroaro mʉja ca-bairijere tʉgooña majiri. 17To bairona caroaro Cristore ca-apiʉjarã mʉja ca-aniparore bairo ĩi cʉ̃ yere mʉjaare yʉ ca-ĩi buionucuwʉ. Yucʉacã yʉ jĩagama tie quetire yʉ ca-buiorije wapa. To bairo yʉre na ca-jĩagarije to ca-anibato quena wariñuurique mena yʉ buiocõa anigʉ, netobʉjaro caroaro Jesucristore ca-apiʉjarã mʉja ca-aniparore bairo ĩi. 18To bairi mʉja quena wariñuuña yʉ ca-wariñuurore bairona.

Timoteo y Epafrodito

19Yucʉacã Timoteore mʉja tʉpʉ cʉ̃ yʉ aá rotigʉ, mani Ʉpaʉ Jesucristo cʉ̃ ca-booata. Mʉja ca-aniere caroaro majigʉ cʉ̃ yʉ aá rotigʉ. Mʉja tʉpʉ ca-ãnacʉ yʉ tʉpʉ cʉ̃ ca-tunu ejaro yʉ wariñuugʉ caroaro mʉja ca-aniere queti apiri. 20Cʉ̃ jeto ãmi Timoteo yʉre bairona mʉjaare ca-mai tʉgooñanucuʉ. 21Aperã maca nipetirã na majuuna na cá-áti anigari wame jetore tʉgooña aninucuma, Jesucristo cʉ̃ ca-boorije macare tʉgooñaquẽnana. 22“Timoteo caroaʉ majuu ãmi,” meere mʉja ĩi maji. Jicãʉ cʉ̃ pacʉre cʉ̃re cʉ̃ ca-paanemorore bairona yʉ cá-átinemonucuwĩ Timoteo Jesucristo ye quetire yʉ ca-buio teñaro. 23To bairi yucʉacana mʉja tʉpʉ cʉ̃ yʉ aá rotigʉ. Ato presopʉ ca-ãcʉ̃re yʉre na cá-átipere majiipʉ cʉ̃ yʉ joogʉ Timoteore. 24To bairi caberobʉjaacã yʉ majuuna presopʉ ca-anibatacʉna yʉ aágʉ mʉja tʉpʉ, Dio cʉ̃ ca-booata. 25-26Yʉ ca-tamuori paʉ majuu Epafroditore yʉ tʉpʉ mʉja ca-jooyupa, yʉre átinemorã. Jicãʉ punaa na ca-tʉgooñarore bairo yʉ mena Jesucristo yere ca-tʉgooñaʉ ãmi. Cʉ̃ quena ca-tamuoʉ anibacʉ quena yʉ cá-átinemowĩ. Yucʉacã ca-riabatacʉ ñuuri seeto mʉja tʉjʉgami, “Yʉ ca-riariquere queti apiri yʉ tʉgooñarique pairãma,” ĩi. To bairi nemoo mʉja tʉpʉ cʉ̃ yʉ tunuo joogʉ yʉ tʉpʉ mʉja ca-jooricʉre. 27Seeto ca-riawĩ. Ca-bai yajibowĩ. To bairi Dio cʉ̃ ca-mai tʉjʉyupi, cʉ̃ catíoʉ. Cʉ̃ ca-bai yajiata seeto yʉ tʉgooñarique paiboricʉ. To bairi Dio Epafroditore cʉ̃ catíoʉ yʉ quenare yʉ ca-mai tʉjʉyupi Dio yʉ ca-tʉgooñarique paiquetiparore bairo. 28To bairi yoaro mee cʉ̃ yʉ tunu aá roti, cʉ̃re mʉja ca-tʉjʉ wariñuuparore bairo ĩi. To bairi yʉ quena yʉ tʉgooñarique paiquetigʉ cʉ̃re mʉja ca-macarijere. 29-30Mʉja majuuna yʉ tʉpʉ eja majiquetibana Epafroditore cʉ̃ mʉja ca-jooyupa, Pablore cʉ̃ átinemoʉ aáparo ĩirã. To bairo mʉja ca-jooricʉ aniri caroaro Cristo cʉ̃ ca-boorije cá-ájupi ca-uwiorije cʉ̃re to ca-anibato quena. To bairo átibacʉ ca-bai yajibowĩ. Yucʉacã ca-ñuʉpʉre cʉ̃ yʉ tunuo joo. To bairi mʉja tʉpʉ cʉ̃ ca-ejaro wariñuurique mena caroaro cʉ̃ boca tʉjʉya mani yaʉre, mani mena mani Ʉpaʉ Jesucristore ca-apiʉjaʉre. Cʉ̃re bairo ca-ãnare caroaro na ca-nʉcʉbʉgope ãa.

Currently Selected:

FILIPENSES 2: TAVNT2

Highlight

Copy