Popular Bible Verses from FILIPENSES 2

Share

“Ca-ãni jʉgoʉ yʉ anigʉ,” ĩi tʉgooña ʉgoo punijiniquẽja. Mʉja majuuna, “Aperã netoro ca-ani majuʉ yʉ ãa. Caroaro ca-majii yʉ ãa,” ĩi tʉgooñaqueticõaña. Oco bairo maca ĩi tʉgooñaña: “Aperã maca yʉ netoro ca-ani majuurã, ca-majirã ãnama. To bairi apeĩ maca ca-jʉgo ãcʉ̃ cʉ̃ anicõato,” ĩi tʉgooñaña. Mʉja ye jetore tʉgooñaquẽja. Aperã ye quenare na tʉgooñanemoña.

To bairi wame maca ca-ĩi tʉgooñañupi Jesucristo quena. To bairi mʉja quena to bairona ĩi tʉgooñaña.

Cʉ̃a Dio Macʉna anibacʉ quena Dio mena cʉ̃ ca-jʉgo aniere ca-maiquẽjupi. To bairo Dio mena cʉ̃ ca-jʉgo aniere maiquetiri tie nipetirijere ca-cũu weoyupi, cawatoa ca-ãcʉ̃, paabojari majocʉre bairo maca yʉ anigʉ ĩi. To bairi Dio Macʉna anibacʉ quena manire bairona camajocʉna ca-buiayupi. Camajocʉna buiari cawatoa ca-ãcʉ̃, ca-bopacoʉre bairo ca-añupi. Paabojari majocʉre bairona Dio cʉ̃re cʉ̃ ca-rotirijere cá-ájupi. Cʉ̃re ca-teerã cʉ̃re na ca-papua jĩarije to ca-anibato quena Dio cʉ̃re cʉ̃ cá-áti rotirijere cá-ájupi.

Dio maca mʉja mena ãmi, mʉjaare átinemoʉ, cʉ̃ ca-boorije jetore mʉja cá-áti majiparore bairo ĩi.

To bairo Dio cʉ̃re cʉ̃ cá-áti rotirije cá-ácʉ cʉ̃ ca-ano maca ca-ani majuʉre cʉ̃ ca-cũuñupi Dio. Camaja nipetirãre Jesúre nʉcʉbʉgo rotimi Dio. Camaja nipetirã Ʉpaʉ ca-anipaʉre cʉ̃ ca-cũuñupi yua. To bairi, “Jesú ãmi,” aperã na ca-ĩiro apirã nipetirã ejacumugarãma, cʉ̃ nʉcʉbʉgori. Dio tʉ macana, ati yepa macana, ca-bai yajiricarã nipetiro ejacumugarãma, cʉ̃ nʉcʉbʉgori. Nipetirã, “Jesucristo Caʉpaʉ majuu ãmi,” cʉ̃ ĩigarãma, mani Pacʉ Dio quenare cʉ̃ ĩi nʉcʉbʉgori.

To canacã wame mʉja cá-átiere ĩi punijini tʉgooñaquẽnana átinucuña, ame ĩi wada netorique manona. To bairo caroaro mʉja ca-bairo tʉjʉrã, “Caroorã ãma, ti wamere caroorijere áama naa,” noa mʉja ĩi majiquetigarãma. Caroarã, caroorije cá-átiquẽna mʉja anigarã, ati yepa macana caroorã watoapʉ anibana quena. Dio punaa aniri caroare cá-ána mʉja anigarã. Ati yepa ca-naitĩarore bairo ca-ano ca-bujurijere bairo maca ca-ãna mʉja anigarã, Cristo cʉ̃ ca-aniere aperãre na majiorã.

Yʉ yarã, yʉ ca-mairã, mʉja tʉpʉ yʉ ca-ano yʉ ca-buiorijere caroaro mʉja ca-apiʉjanucuwʉ. Yucʉ quenare mʉja tʉpʉ yʉ ca-aniquẽtie to ca-anibato quena netobʉjaro apiʉjaya mʉjaare yʉ ca-ĩi buiorijere. Diore ca-majiquẽna na ca-popiye tamuori paʉpʉ cá-aáboricarãre Dio cʉ̃ ca-netoo catíoricarã mʉja ãa mʉja quena. To bairi cʉ̃ ca-netoo catíoricarã aniri caroaro ája. Caroorije átaje macare uwi tʉgooñaña.