FILIPENSES 3

La rectitud verdadera

1Yʉ yarã, ape wame mʉjaare yʉ ĩi buiopa: Mani wariñuucõarã, mani Ʉpaʉ Jesú yarã aniri. Tiere mʉjaare ca-ĩi buionemope ãa. Capee mʉja ĩi buiobacʉ quena yʉ quepequẽe. 2Caroorã, jocarãna, “Cristo yarã majuu jã ãa,” ca-ĩirãre na tʉjʉ majiña. Na apiqueticõaña mʉjaa. “Judío maja na cá-átinucurije, circuncisión cá-átana mani ãa, to bairi Cristo yarã mani ãa,” ĩima naa. 3Mani maca mani yeripʉ Diore ca-nʉcʉbʉgorã mani ãa, Jesucristo manire cʉ̃ cá-átibojarique jetore tʉgooñari. Mani rupaʉri mani cá-átajere mani tʉgooña nʉcʉbʉgoquẽe. To bairi mani maca Dio yarã majuu mani ãa. “Ape wamere ána mani majuuna Dio yarã mani ani maji,” mani ĩiquẽe. 4Mani majuuna caroare átiri Dio yarã mani ca-ãmata, aperã netoro Dio yaʉ yʉ aniboʉ, na netoro caroaro cá-átacʉ aniri. Nipetiri wame mani ñicʉ Moisé cʉ̃ ca-rotiriquere yʉ cá-átinucubapʉ. 5Ocho canacã rʉmʉri yʉ ca-cʉgoropʉ circuncisión yʉre cá-ájupa, judío maja na cá-átinucurijere bairo, yʉ wameyerã. Israel macacʉna aniri Benjamín ãnacʉ pãramipʉ yʉ ca-buiayupa. To bairi hebreo yaʉ, judío yaʉ majuu yʉ ãa. Yʉ pacʉ yarã hebreo maja jetona ca-ãma. Judío maja na cá-áti rotirijere yʉ ca-buewʉ fariseo maja mena. 6Fariseo maja mena bueri caroa wamere seeto yʉ cá-áti petigabapʉ. To bairi Jesucristore ca-apiʉjarã macare, “Ricati cabuerã ãma. Ca-ĩito pairijere buema,” ĩi tʉgooñabacʉna na ca-popiye tamuoro yʉ cá-átinucuwʉ. Moisé cʉ̃ ca-rotirique caroaro yʉ cá-áti peocõanucuwʉ. To bairi jicãʉ ucʉ̃, “Tiere caroaro átiquẽemi cʉ̃a,” yʉre ca-ĩirã ca-mama. 7To bairo yʉ cá-áti aniere maibacʉ quena nipetiro yʉ ca-jana weocõawʉ tiere, “Atie ñuuquẽe, Cristo macare yʉ apiʉjagʉ,” ĩri. 8Yʉ Ʉpaʉ Jesucristore yʉ ca-majirije maca ca-ñuu netorije ãa tiea. To bairi yʉ cá-áti jʉgobataje nipetiro caroorije ca-añupa. Tie nipetiro yʉ ca-jana reecõawʉ, “Cristo cʉ̃ ca-aniere yʉ majigʉ,” ĩri. 9To bairi, “Ca-ñuʉ yʉ ãa, Dio cʉ̃ ca-rotirije yʉ áti peocõa,” yʉ ĩiquẽe. Yʉ majuuna Dio cʉ̃ ca-rotirijere yʉ áti majiquẽe. To bairi Cristore, ca-ñuu majuʉre cʉ̃ yʉ ca-api nʉcʉbʉgoro tʉjʉri, “Caroare cá-ácʉ ãmi,” yʉ ĩi tʉjʉʉmi Dio. 10Yucʉra Jesucristo jetore ca-majii yʉ anigʉ. Ca-tutuaʉ aniri ca-tunu catíyupi bai yajiri bero. Yʉ quena to bairona áti tutua majiriquere yʉ boo. To bairo baii Cristore rooro cʉ̃ na ca-popiyeyericarore bairona yʉre na cá-átipe to ca-anibato quena Cristore yʉ majigʉ. 11To bairi yʉ quena yʉ ca-ria aáto bero yʉ tunu catígʉ Cristo cʉ̃ ca-tunu catíricarore bairona.

La lucha para llegar a la meta

12“Yucʉra Dio cʉ̃ ca-boorije nipetiro yʉ cá-áti peocõawʉ,” yʉ ĩi tʉgooñaquẽe. Cristore bairo caroorije mácʉ mee yʉ ãa. To bairo yʉ ca-bairije to ca-anibato quena caroaro yʉ ca-anipere yʉ ca-joowĩ Jesú, caroaro yʉ cá-áti majiparore bairo. To bairi cʉ̃ ca-boorijere yʉ áti majigʉ, tʉgooña ocabʉtiriquere yʉre cʉ̃ ca-jooro. 13Yʉ yarã, caroorije mácʉ mee yʉ ãa mai. To bairo baibacʉ quena yʉ cá-áti jʉgobatajere majiriticõari yʉ ca-baipe Dio cʉ̃ ca-boorije macare yʉ áti ocabʉti. 14Áti ocabʉtiri caroaro Cristore yʉ átibojagʉ Dio cʉ̃ ca-boorijere. To bairo yʉ cá-áto caroare yʉ joogʉmi Dio.

15Jesucristore caroaro ca-apiʉjarã quena yʉ ca-ĩirore bairona na tʉgooñacõato. Jicãʉ mʉja yaʉ ricatina ca-tʉgooña ajuʉ cʉ̃ ca-ãmata Dio maca cʉ̃ majiogʉmi, yʉre bairo cʉ̃ ca-tʉgooñaparore bairo ĩi. 16To bairi mani ca-majiri wame cõo tʉgooñari mani áti anicõato Cristo cʉ̃ ca-boorijere.

17Yʉ yarã, yʉ cá-átore bairo caroaro ája mʉja quena. Aperã Cristore ca-apiʉjarã quena caroaro na ca-aniere tʉjʉ cõoñari nare bairo caroaro ája. 18Aperã maca caroaro átiquẽema. Capee na ca-aniere mʉjaare yʉ ca-ĩi buionucuwʉ meere. Yucʉ na ca-aniere tʉgooñarique pairique mena mʉjaare yʉ buio tunu. Jesucristo yucʉ pãipʉ manire cʉ̃ ca-bai yajibojarique quetire api nʉcʉbʉgoquẽema. 19Na majuuna na ca-boorije jetore áti aninucuma. Caroorije cá-áti tʉgooña boboori wame macare áti wariñuunucuma. Ati yepa macaje jetore tʉgooñanucuma. Cabero to bairo ca-bairãre na reegʉmi Dio. 20Mani maca ape maca ca-aniparã mani ãa ʉmʉrecóopʉ. Dio tʉpʉ ãa mani ya maca majuu, ati yepa mee. Topʉ ca-ãnacʉ tunu atígʉmi mani Ʉpaʉ Jesucristo manire ca-catíoricʉ. Wariñuurique mena cʉ̃ ca-tunu atípere mani yuu, cʉ̃ tʉpʉ mani ya maca majuupʉre seeto anigarã. 21Ti paʉpʉ mani rupaʉ ca-ñuuqueti rupaʉre mani wajoabojagʉmi Jesucristo. Cʉ̃ ca-tutuarije mena roti majimi nipetiro macaje. To bairi atie cʉ̃ ca-tutuarije mena mani wajoagʉmi mani rupaʉrire cʉ̃re ca-apiʉjarãre yua.

Currently Selected:

FILIPENSES 3: TAVNT2

Highlight

Compare

Copy