ܡܦܩܢܐ 9

ܡܵܘܬܵܐ ܕܚܲܝܘܵܬܹ̈ܐ

1ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܥܒ݂ܘܿܪ ܠܟܸܣ ܦܸܪܥܘܿܢ ܘܐ݇ܡܘܿܪ ܐܸܠܹܗ، ’ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܐܲܠܵܗܵܐ ܕܥܸܒ݂ܪ̈ܵܝܹܐ، ܫܲܕܸܪ ܠܥܲܡܝܼ ܕܦܵܠܚܝܼ ܐܸܠܝܼ. 2ܣܵܒܵܒ ܐܸܢ ܡܲܚܦܸܠܸܬ ܐܲܢ݇ܬ ܠܫܲܕܘܼܪܹܐ، ܘܗܹܫ ܐܲܢ݇ܬ ܕܵܒ݂ܩܹܬ ܠܗܘܿܢ، 3ܗܵܐ، ܐܝܼܕܵܐ ܕܡܵܪܝܵܐ ܒܸܬ ܡܲܝܬܝܵܐ ܡܵܘܬܵܢܵܐ ܪܵܒܵܐ ܝܲܩܘܼܪܵܐ ܠܩܸܢܝܵܢܘܼ̈ܟ݂ ܕܓܵܘ ܕܸܫܬܵܐ، ܠܣܘܼܣܵܘܵܬܹ̈ܐ، ܠܚܡܵܪܹ̈ܐ، ܠܓܘܼܡܠܹ̈ܐ، ܠܒܸܩܪ̈ܵܬܹܐ، ܘܠܦܸܣܩܹ̈ܐ. 4ܐܝܼܢܵܐ ܒܸܬ ܦܵܪܹܫ ܡܵܪܝܵܐ ܒܹܝܠ ܩܸܢܝܵܢܹ̈ܐ ܕܝܼܣܪܵܝܹܠ ܘܒܹܝܠ ܩܸܢܝܵܢܹ̈ܐ ܕܡܸܨܪܹܝܢ، ܗܵܕܵܐ ܕܠܵܐ ܡܵܐܹܬ ܡܸܢܕܝܼ ܕܝܼܠܹܗ ܕܒܢܲܝ̈ ܝܼܣܪܵܝܹܠ.‘“ 5ܘܪܫܝܼܡ ܠܹܗ ܡܵܪܝܵܐ ܥܕܵܢܵܐ ܒܹܐܡܵܪܵܐ، ”ܩܵܝܕܲܡܬܵܐ ܒܸܬ ܥܵܒܹܕ ܡܵܪܝܵܐ ܐܵܗܵܐ ܫܘܼܠܵܐ ܒܐܲܪܥܵܐ.“ 6ܘܒܩܵܝܕܲܡܬܵܐ ܥܒ݂ܝܼܕ ܠܹܗ ܡܵܪܝܵܐ ܐܵܗܵܐ ܫܘܼܠܵܐ؛ ܘܡܝܼܬ ܠܗܘܿܢ ܟܠܲܝܗܝ ܩܸܢܝܵܢܹ̈ܐ ܕܡܸܨܪܹܝܢ، ܐܝܼܢܵܐ ܡ̣ܢ ܩܸܢܝܵܢܹ̈ܐ ܕܒܢܲܝ̈ ܝܼܣܪܵܝܹܠ ܠܵܐ ܡܝܼܬ ܠܹܗ ܐܘܼܦ ܚܲܕ. 7ܘܫܘܼܕܸܪܹܗ ܦܸܪܥܘܿܢ ܐ݇ܢܵܫܹ̈ܐ ܘܚܙܹܐ ܠܗܘܿܢ ܕܐܘܼܦ ܚܲܕ ܡ̣ܢ ܩܸܢܝܵܢܹ̈ܐ ܕܒܢܲܝ̈ ܝܼܣܪܵܝܹܠ ܠܹܐ ܝܗ݇ܘܵܐ ܡܝܼܬܵܐ. ܐܝܼܢܵܐ ܠܸܒܵܐ ܕܦܸܪܥܘܿܢ ܦܝܼܫ ܠܹܗ ܡܘܼܩܫܝܼܵܐ، ܘܠܵܐ ܫܘܼܕܸܪܹܗ ܠܥܲܡܵܐ.

ܡܚܘܿܬܵܐ ܕܡܘܼܫܪܹ̈ܐ

8ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ، ”ܫܩܘܿܠܘܼܢ ܠܵܘܟ݂ܘܿܢ ܡܸܠܝܵܐ ܩܛܝܼܪܵܘܟ݂ܘܿܢ ܩܸܛܡܵܐ ܕܐܲܬܘܿܢܵܐ، ܘܕܲܪܹܐ ܠܹܗ ܡܘܼܫܹܐ ܠܵܫܡܲܝܵܐ ܩܵܕ݇ܡ ܥܲܝܢܹ̈ܐ ܕܦܸܪܥܘܿܢ. 9ܘܒܸܬ ܗܵܘܹܐ ܥܘܼܪܵܐ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ، ܘܒܸܬ ܗܵܘܹܐ ܡܘܼܫܪܹ̈ܐ ܒܸܕܪܵܝܵܐ ܕܲܪ̈ܒܵܬܹܐ ܥܲܠ ܒܢܲܝ̈ܢܵܫܵܐ ܘܥܲܠ ܗܲܝܘܵܢ ܒܟܠܵܗ̇ ܐܲܪܥܵܐ ܕܡܸܨܪܹܝܢ.“ 10ܘܫܩܝܼܠ ܠܗܘܿܢ ܠܩܸܛܡܵܐ ܕܐܲܬܘܿܢܵܐ ܘܟܠܹܐ ܠܗܘܿܢ ܩܵܕ݇ܡ ܦܸܪܥܘܿܢ، ܘܕܘܼܪܹܐ ܠܹܗ ܡܘܼܫܹܐ ܩܸܛܡܵܐ ܠܵܫܡܲܝܵܐ، ܘܗܘܹܐ ܠܹܗ ܡܘܼܫܪܹ̈ܐ ܕܕܲܪ̈ܒܵܬܹܐ ܒܸܦܠܵܛܵܐ ܒܒܲܪܢܵܫܵܐ ܘܒܗܲܝܘܵܢ. 11ܚܲܪ̈ܵܫܹܐ ܠܵܐ ܡܨܹܐ ܠܗܘܿܢ ܠܸܟܠܵܝܵܐ ܩܵܕ݇ܡ ܡܘܼܫܹܐ ܡ̣ܢ ܥܸܠܬܵܐ ܕܡܘܼܫܪܹ̈ܐ، ܣܵܒܵܒ ܗܘܹܐ ܠܗܘܿܢ ܡܘܼܫܪܹ̈ܐ ܒܚܲܪ̈ܵܫܹܐ ܘܒܟܠܲܝܗܝ ܡܸܨܪ̈ܵܝܹܐ. 12ܐܝܼܢܵܐ ܡܘܼܩܫܹܐ ܠܹܗ ܡܵܪܝܵܐ ܠܠܸܒܵܐ ܕܦܸܪܥܘܿܢ، ܘܠܵܐ ܫܡܝܼܥ ܠܹܗ ܐܸܠܲܝܗܝ، ܕܵܐܟ݂ܝܼ ܕܗܘܼܡܙܸܡܵܐ ܝܗ݇ܘܵܐ ܡܵܪܝܵܐ ܥܲܡ ܡܘܼܫܹܐ.

ܡܚܘܿܬܵܐ ܕܒܲܪܕܵܐ

13ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܙܹܠ݇ ܒܨܲܦܪܵܐ ܘܟܠܝܼ ܩܵܕ݇ܡ ܦܸܪܥܘܿܢ، ܘܐ݇ܡܘܿܪ ܐܸܠܹܗ، ’ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܐܲܠܵܗܵܐ ܕܥܸܒ݂ܪ̈ܵܝܹܐ، ܫܲܕܸܪ ܠܥܲܡܝܼ ܕܦܵܠܚܝܼ ܐܸܠܝܼ. 14ܣܵܒܵܒ ܐܵܗܵܐ ܓܵܗܵܐ ܒܸܬ ܫܲܕܪܸܢ ܟܠܲܝܗܝ ܡܲܚܘܵܬܝܼ̈ ܥܲܠܘܼܟ݂، ܥܲܠ ܪܹ̈ܓܵܘܵܬܘܼܟ݂، ܘܥܲܠ ܥܲܡܘܼܟ݂، ܕܝܵܕܥܹܬ ܕܠܲܝܬ ܐܲܝܟ݂ ܕܝܼܝܼ ܓܵܘ ܟܠܵܗ̇ ܐܲܪܥܵܐ. 15ܣܵܒܵܒ ܗܲܠ ܐܵܕܝܼܵܐ ܡܵܨܹܝܢ ܗ݇ܘܵܐ ܦܲܫܛܸܢ ܗ݇ܘܵܐ ܐܝܼܕܝܼ ܘܡܵܚܹܝܢ ܗ݇ܘܵܐ ܐܸܠܘܼܟ݂ ܘܠܥܲܡܘܼܟ݂ ܒܡܵܘܬܵܢܵܐ، ܘܒܸܬ ܗܵܘܹܝܬ ܗ݇ܘܵܐ ܛܘܼܠܩܵܐ ܡ̣ܢ ܦܵܬܵܐ ܕܐܲܪܥܵܐ؛ 16ܐܝܼܢܵܐ ܣܵܒܵܒ ܐܵܗܵܐ ܡܘܼܩܸܡܘܼܟ݂ ܝܼܘܸܢ، ܩܵܐ ܕܡܲܚܙܸܝܢ ܐܸܠܘܼܟ݂ ܚܲܝܠܝܼ، ܘܩܵܐ ܠܗܲܩܘܼܝܹܐ ܫܸܡܝܼ ܒܟܠܵܗ̇ ܐܲܪܥܵܐ. 17ܘܗܹܫ ܒܸܥܒ݂ܵܕܵܐ ܝܘܸܬ ܫܘܼܒ݂ܗܵܪܵܐ ܕܲܠܩܘܼܒ݂ܠ ܕܥܲܡܝܼ، ܘܠܹܐ ܒܵܥܹܝܬ ܕܫܲܕܪܸܬ ܠܗܘܿܢ. 18ܩܵܝܕܲܡܬܵܐ ܐܲܝܟ݂ ܕܐܵܗܵܐ ܥܕܵܢܵܐ، ܒܸܬ ܫܲܕܪܸܢ ܒܲܪܕܵܐ ܪܵܒܵܐ ܚܲܝܠܵܢܵܐ، ܗ̇ܘ ܕܠܲܝܬ ܗܘܝܼܵܐ ܐܲܝܟ݂ ܕܝܼܹܗ ܒܡܸܨܪܹܝܢ ܡ̣ܢ ܝܵܘܡܵܐ ܕܦܝܼܫ ܠܵܗ̇ ܫܘܼܬܐܸܣܬܵܐ ܘܗܲܠ ܐܵܕܝܼܵܐ. 19ܐܵܕܝܼܵܐ ܫܲܕܸܪ ܘܓ̰ܲܡܸܥ ܠܩܸܢܝܵܢܘܼ̈ܟ݂ ܘܠܟܠ ܡܸܢܕܝܼ ܕܐܝܼܬ ܠܘܼܟ݂ ܒܕܸܫܬܵܐ؛ ܟܠ ܒܲܪܢܵܫܵܐ ܘܗܲܝܘܵܢ ܕܦܵܐܹܫ ܡܫ݇ܟ̰ܝܼܚܵܐ ܓܵܘ ܕܸܫܬܵܐ، ܘܠܵܐ ܦܵܐܹܫ ܡܘܼܥܒܸܪܵܐ ܠܒܲܝܬܵܐ، ܒܸܬ ܥܵܪܹܐ ܥܲܠܲܝܗܝ ܒܲܪܕܵܐ ܘܒܸܬ ܡܵܝܬܝܼ.‘“ 20ܡ̣ܢ ܪܹ̈ܓܵܘܵܬܹܐ ܕܦܸܪܥܘܿܢ، ܗ̇ܘ ܕܙܕܝܼܥ ܠܹܗ ܡ̣ܢ ܚܲܒܪܵܐ ܕܡܵܪܝܵܐ، ܡܘܼܥܪܸܩ ܠܹܗ ܠܪܹ̈ܓܵܘܵܬܹܗ ܘܠܩܸܢܝܵܢܘܼ̈ܗܝ ܠܓܵܘ ܒܵܬܹ̈ܐ؛ 21ܐܝܼܢܵܐ ܗ̇ܘ ܕܠܵܐ ܫܡܝܼܥ ܠܹܗ ܠܚܲܒܪܵܐ ܕܡܵܪܝܵܐ، ܫܒ݂ܝܼܩ ܠܹܗ ܠܪܹ̈ܓܵܘܵܬܹܗ ܘܠܩܸܢܝܵܢܘܼ̈ܗܝ ܒܕܸܫܬܵܐ.

22ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܦܲܫܸܛ ܐܝܼܕܘܼܟ݂ ܠܵܫܡܲܝܵܐ، ܘܒܸܬ ܗܵܘܹܐ ܒܲܪܕܵܐ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ، ܥܲܠ ܒܲܪܢܵܫܵܐ ܘܥܲܠ ܗܲܝܘܵܢ ܘܥܲܠ ܟܠܹܗ ܓܸܠܵܐ ܕܕܸܫܬܵܐ ܒܐܲܪܥܵܐ ܕܡܸܨܪܹܝܢ.“ 23ܘܦܘܼܫܸܛ ܠܹܗ ܡܘܼܫܹܐ ܚܘܼܛܪܹܗ ܠܵܫܡܲܝܵܐ؛ ܘܠܒ݂ܝܼܟ݂ ܠܹܗ ܡܵܪܝܵܐ ܪ̈ܲܥܡܹܐ ܘܒܲܪܕܵܐ، ܘܫܪܹܐ ܠܹܗ ܢܘܼܪܵܐ ܒܐܲܪܥܵܐ. ܡܘܼܥܪܹܐ ܠܹܗ ܡܵܪܝܵܐ ܒܲܪܕܵܐ ܥܲܠ ܐܲܪܥܵܐ ܕܡܸܨܪܹܝܢ. 24ܥܪܹܐ ܠܹܗ ܒܲܪܕܵܐ، ܘܢܘܼܪܵܐ ܚܲܝܠܵܢܵܐ ܪܵܒܵܐ ܒܸܠܒ݂ܵܟ݂ܵܐ ܒܓܵܘܵܐ ܕܒܲܪܕܵܐ، ܗ̇ܘ ܕܠܲܝܬ ܗܘܝܼܵܐ ܐܲܝܟ݂ ܕܝܼܹܗ ܒܟܠܵܗ̇ ܐܲܪܥܵܐ ܕܡܸܨܪܹܝܢ، ܗܵܐ ܡ̣ܢ ܝܵܘܡܵܐ ܕܗܘܹܐ ܠܵܗ̇ ܐܘܼܡܬܵܐ. 25ܘܡܚܹܐ ܠܹܗ ܒܲܪܕܵܐ ܠܟܠ ܡܸܢܕܝܼ ܕܐܝܼܬ ܗ݇ܘܵܐ ܒܕܸܫܬܵܐ ܕܐܲܪܥܵܐ ܕܡܸܨܪܹܝܢ، ܡ̣ܢ ܒܲܪܢܵܫܵܐ ܘܗܲܠ ܗܲܝܘܵܢ؛ ܘܡܚܹܐ ܠܹܗ ܠܟܠܹܗ ܓܸܠܵܐ ܕܕܸܫܬܵܐ، ܘܫܡܝܼܛ ܠܹܗ ܠܟܠ ܐܝܼܠܵܢܵܐ ܕܕܸܫܬܵܐ. 26ܐܲܚܟ̰ܝܼ ܒܐܲܪܥܵܐ ܕܓܹܫܵܢ، ܐܲܝܟܵܐ ܕܝܼܗ݇ܘܵܐ ܒܢܲܝ̈ ܝܼܣܪܵܝܹܠ، ܠܵܐ ܗܘܹܐ ܠܹܗ ܒܲܪܕܵܐ.

27ܗ̇ܝܓܵܗ ܫܘܼܕܸܪܹܗ ܦܸܪܥܘܿܢ ܘܩܪܹܐ ܠܹܗ ܠܡܘܼܫܹܐ ܘܠܐܲܗܪܘܿܢ، ܘܐ݇ܡܝܼܪܹܗ ܐܸܠܲܝܗܝ، ”ܚܛܹܐ ܠܝܼ ܐܵܗܵܐ ܓܵܗܵܐ؛ ܡܵܪܝܵܐ ܙܲܕܝܼܩܵܐ ܝܠܹܗ، ܘܐܵܢܵܐ ܘܥܲܡܝܼ ܒܝܼܫܹ̈ܐ ܝܘܲܚ. 28ܦܲܪܦܸܠܘܼܢ ܒܡܵܪܝܵܐ، ܣܵܒܵܒ ܚܲܝܠܵܢܹ̈ܐ ܝܢܵܐ ܪ̈ܲܥܡܹܐ ܘܒܲܪܕܵܐ ܕܐܲܠܵܗܵܐ؛ ܒܸܬ ܫܲܕܪܸܢܵܘܟ݂ܘܿܢ، ܘܠܹܐ ܡܲܟܠܸܝܢܵܘܟ݂ܘܿܢ ܙܵܘܕܵܐ.“ 29ܐ݇ܡܝܼܪܹܗ ܐܸܠܹܗ ܡܘܼܫܹܐ، ”ܟܲܕ ܦܵܠܛܹܢ ܡ̣ܢ ܡܕܝܼܢ݇ܬܵܐ، ܒܸܬ ܦܲܫܛܸܢ ܐܝܼܕܵܬܝܼ̈ ܠܡܵܪܝܵܐ؛ ܒܸܬ ܟܵܠܝܼ ܪ̈ܲܥܡܹܐ، ܘܠܹܐ ܗܵܘܹܐ ܒܲܪܕܵܐ ܐ݇ܚܹܪ݇ܢܵܐ، ܕܝܵܕܥܹܬ ܕܡܵܪܝܵܐ ܝܠܵܗ̇ ܐܲܪܥܵܐ. 30ܐܝܼܢܵܐ ܐܵܢܵܐ ܒܝܼܕܵܥܵܐ ܝܘܸܢ ܕܐܲܢ݇ܬ ܘܪܹ̈ܓܵܘܵܬܘܼܟ݂ ܗܹܫ ܠܹܐ ܝܬܘܿܢ ܒܸܙܕܵܥܵܐ ܡ̣ܢ ܡܵܪܝܵܐ ܐܲܠܵܗܵܐ.“

31ܩܸܛܘܼ ܘܣܥܵܪܹ̈ܐ ܦܝܼܫ ܠܗܘܿܢ ܡܸܚܝܹܐ، ܣܵܒܵܒ ܣܥܵܪܹ̈ܐ ܒܒܘܼܠܵܐ ܝܗ݇ܘܵܘ ܘܩܸܛܘܼ ܦܩܝܼܚܬܵܐ ܝܗ݇ܘܵܐ. 32ܐܝܼܢܵܐ ܚܸܛܹ̈ܐ ܘܫܸܠܘܼܪ ܠܵܐ ܦܝܼܫ ܠܗܘܿܢ ܡܸܚܝܹܐ، ܣܵܒܵܒ ܣܹܘܵܕܹ̈ܐ ܝܗ݇ܘܵܘ.

33ܘܦܠܝܼܛ ܠܹܗ ܡܘܼܫܹܐ ܡ̣ܢ ܠܟܸܣ ܦܸܪܥܘܿܢ ܘܡ̣ܢ ܡܕܝܼܢ݇ܬܵܐ، ܘܦܪܝܼܣ ܠܹܗ ܐܝܼܕܵܬܹ̈ܗ ܠܡܵܪܝܵܐ؛ ܘܫܠܹܐ ܠܗܘܿܢ ܪ̈ܲܥܡܹܐ ܘܒܲܪܕܵܐ، ܘܡܸܛܪܵܐ ܠܵܐ ܥܪܹܐ ܠܵܗ̇ ܐ݇ܚܹܪ݇ܢܵܐ ܥܲܠ ܐܲܪܥܵܐ. 34ܟܲܕ ܚܙܹܐ ܠܹܗ ܦܸܪܥܘܿܢ ܕܫܠܹܐ ܠܗܘܿܢ ܡܸܛܪܵܐ، ܒܲܪܕܵܐ ܘܪ̈ܲܥܡܹܐ، ܚܛܹܐ ܠܹܗ ܡܸܢܕܪܸܫ، ܘܡܘܼܩܫܹܐ ܠܹܗ ܠܠܸܒܹܗ، ܗ̇ܘ ܘܪܹ̈ܓܵܘܵܬܹܗ. 35ܩܫܹܐ ܠܹܗ ܠܸܒܵܐ ܕܦܸܪܥܘܿܢ، ܘܠܵܐ ܫܘܼܕܸܪܹܗ ܠܒܢܲܝ̈ ܝܼܣܪܵܝܹܠ، ܕܵܐܟ݂ܝܼ ܕܗܘܼܡܙܸܡ ܠܹܗ ܡܵܪܝܵܐ ܒܝܲܕ ܡܘܼܫܹܐ.

Currently Selected:

ܡܦܩܢܐ 9: ABTAB

Highlight

Copy

Compare