ܡܦܩܢܐ 8

ܦܸܩܵܩܹ̈ܐ ܦܝܵܫܵܐ ܫܘܼܕܪܹܐ

1ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܥܒ݂ܘܿܪ ܠܟܸܣ ܦܸܪܥܘܿܢ، ܘܐܵܡܪܹܬ ܐܸܠܹܗ، ’ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ، ”ܫܲܕܸܪ ܠܥܲܡܝܼ ܕܦܵܠܹܚ ܐܸܠܝܼ. 2ܐܝܼܢܵܐ ܐܸܢ ܡܲܚܦܸܠܸܬ ܐܲܢ݇ܬ ܠܫܲܕܘܼܪܹܐ، ܗܵܐ، ܐܵܢܵܐ ܒܸܬ ܡܵܚܹܝܢ ܠܟܠܹܗ ܬܚܘܼܡܘܼܟ݂ ܒܦܸܩܵܩܹ̈ܐ؛ 3ܘܒܸܬ ܡܲܫܪܸܨ ܢܲܗܪܵܐ ܦܸܩܵܩܹ̈ܐ، ܒܸܬ ܐܵܣܩܝܼ ܘܒܸܬ ܥܵܒ݂ܪܝܼ ܓܵܘ ܒܲܝܬܘܼܟ݂، ܘܓܵܘ ܬܵܘܵܢܵܐ ܕܡܵܟ݂ܘܼܟ݂، ܘܥܲܠ ܫܘܝܼܬܘܼܟ݂، ܘܓܵܘ ܒܲܝܬܵܐ ܕܪܹ̈ܓܵܘܵܬܘܼܟ݂، ܘܓܵܘ ܥܲܡܘܼܟ݂، ܘܓܵܘ ܬܲܢܘܼܪ̈ܘܼܟ݂، ܘܓܵܘ ܓ̰ܸܦܢܵܬܘܼ̈ܟ݂. 4ܘܒܸܬ ܐܵܣܩܝܼ ܦܸܩܵܩܹ̈ܐ ܒܝܼܘܼܟ݂، ܘܒܥܲܡܘܼܟ݂ ܘܒܟܠܲܝܗܝ ܪܹ̈ܓܵܘܵܬܘܼܟ݂.“‘“ 5ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܐ݇ܡܘܿܪ ܠܐܲܗܪܘܿܢ، ’ܦܲܫܸܛ ܐܝܼܕܘܼܟ݂ ܒܚܘܼܛܪܘܼܟ݂ ܥܲܠ ܢܲܗܪ̈ܵܘܵܬܹܐ، ܥܲܠ ܫܵܩܝܼܵܬܹ̈ܐ، ܘܥܲܠ ܓܵܘܠܵܘܵܬܹ̈ܐ، ܘܡܲܐܣܸܩ ܦܸܩܵܩܹ̈ܐ ܥܲܠ ܐܲܪܥܵܐ ܕܡܸܨܪܹܝܢ.‘“ 6ܘܦܘܼܫܸܛ ܠܹܗ ܐܲܗܪܘܿܢ ܐܝܼܕܹܗ ܥܲܠ ܡ̈ܝܼܵܐ ܕܡܸܨܪܹܝܢ؛ ܘܐ݇ܣܝܼܩ ܠܗܘܿܢ ܦܸܩܵܩܹ̈ܐ ܘܟܘܼܣܹܐ ܠܗܘܿܢ ܠܐܲܪܥܵܐ ܕܡܸܨܪܹܝܢ. 7ܐܝܼܢܵܐ ܐܘܼܦ ܚܲܪ̈ܵܫܹܐ ܒܚܸܪ̈ܫܲܝܗܝ ܡܘܼܐܣܸܩ ܠܗܘܿܢ ܦܸܩܵܩܹ̈ܐ ܥܲܠ ܐܲܪܥܵܐ ܕܡܸܨܪܹܝܢ.

8ܗ̇ܝܓܵܗ ܩܪܹܐ ܠܹܗ ܦܸܪܥܘܿܢ ܠܡܘܼܫܹܐ ܘܠܐܲܗܪܘܿܢ ܘܐ݇ܡܝܼܪܹܗ ܐܸܠܲܝܗܝ، ”ܦܲܪܦܸܠܘܼܢ ܒܡܵܪܝܵܐ ܕܡܲܥܒܸܪ ܦܸܩܵܩܹ̈ܐ ܡܸܢܝܼ ܘܡ̣ܢ ܥܲܡܝܼ، ܘܐܵܢܵܐ ܒܸܬ ܫܲܕܪܸܢ ܠܒܢܲܝ̈ ܝܼܣܪܵܝܹܠ ܕܥܵܒ݂ܕܝܼ ܕܸܒ݂ܚܵܐ ܠܡܵܪܝܵܐ.“ 9ܐ݇ܡܝܼܪܹܗ ܡܘܼܫܹܐ ܠܦܸܪܥܘܿܢ، ”ܐܲܝܟ݂ ܕܒܵܣܡܵܐ ܠܘܼܟ݂، ܦܩܘܿܕ ܐܸܠܝܼ ܥܕܵܢܵܐ ܪܫܝܼܡܬܵܐ ܕܐܝܼܡܲܢ ܦܲܪܦܸܠܸܢ ܒܘܼܬ ܕܝܼܘܼܟ݂ ܘܒܘܼܬ ܪܹ̈ܓܵܘܵܬܘܼܟ݂ ܘܒܘܼܬ ܥܲܡܘܼܟ݂، ܕܦܵܝܫܝܼ ܩܛܝܼܥܹܐ ܦܸܩܵܩܹ̈ܐ ܡܸܢܘܼܟ݂ ܘܡ̣ܢ ܒܵܬܘܼ̈ܟ݂؛ ܐܲܚܟ̰ܝܼ ܐܵܢܝܼ ܕܓܵܘ ܢܲܗܪܵܐ ܒܸܬ ܦܵܝܫܝܼ.“ 10ܐ݇ܡܝܼܪܹܗ ܦܸܪܥܘܿܢ، ”ܩܵܝܕܲܡܬܵܐ.“ ܐ݇ܡܝܼܪܹܗ ܡܘܼܫܹܐ، ”ܒܸܬ ܗܵܘܹܐ ܐܲܝܟ݂ ܚܲܒܪܘܼܟ݂، ܕܝܵܕܥܹܬ ܠܲܝܬ ܐܲܝܟ݂ ܡܵܪܝܵܐ ܐܲܠܵܗܲܢ. 11ܒܸܬ ܦܵܪܩܝܼ ܦܸܩܵܩܹ̈ܐ ܡܸܢܘܼܟ݂، ܡ̣ܢ ܒܵܬܘܼ̈ܟ݂، ܡ̣ܢ ܪܹ̈ܓܵܘܵܬܘܼܟ݂ ܘܡ̣ܢ ܥܲܡܘܼܟ݂؛ ܒܸܬ ܦܵܝܫܝܼ ܐܲܚܟ̰ܝܼ ܓܵܘ ܢܲܗܪܵܐ.“

12ܘܦܠܝܼܛ ܠܗܘܿܢ ܡܘܼܫܹܐ ܘܐܲܗܪܘܿܢ ܡ̣ܢ ܠܟܸܣ ܦܸܪܥܘܿܢ؛ ܘܡܘܼܩܘܸܚ ܠܹܗ ܡܘܼܫܹܐ ܠܡܵܪܝܵܐ ܒܘܼܬ ܦܸܩܵܩܹ̈ܐ ܕܡܘܼܐܬܝܵܐ ܝܗ݇ܘܵܐ ܥܲܠ ܦܸܪܥܘܿܢ. 13ܘܥܒ݂ܝܼܕ ܠܹܗ ܡܵܪܝܵܐ ܐܲܝܟ݂ ܚܲܒܪܵܐ ܕܡܘܼܫܹܐ، ܘܡܝܼܬ ܠܗܘܿܢ ܦܸܩܵܩܹ̈ܐ ܡ̣ܢ ܒܵܬܹ̈ܐ، ܘܡ̣ܢ ܕܵܪ̈ܵܬܹܐ، ܘܡ̣ܢ ܚܲܩܠܵܢܹ̈ܐ. 14ܓ̰ܘܼܡܥܲܝ ܠܗܘܿܢ ܩܘܼܚܹ̈ܐ ܩܘܼܚܹ̈ܐ، ܘܚܡܝܼܩ ܠܵܗ̇ ܐܲܪܥܵܐ. 15ܐܝܼܢܵܐ ܟܲܕ ܚܙܹܐ ܠܹܗ ܦܸܪܥܘܿܢ ܕܗܘܹܐ ܠܹܗ ܢܝܵܚܵܐ، ܡܘܼܩܫܹܐ ܠܹܗ ܠܸܒܹܗ، ܘܠܵܐ ܫܡܝܼܥ ܠܹܗ ܠܡܘܼܫܹܐ ܘܠܐܲܗܪܘܿܢ، ܐܲܝܟ݂ ܕܐ݇ܡܝܼܪܵܐ ܝܗ݇ܘܵܐ ܡܵܪܝܵܐ.

ܥܲܦܪܵܐ ܒܸܚܕܵܪܵܐ ܠܩܲܠܡܹ̈ܐ

16ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܐ݇ܡܘܿܪ ܠܐܲܗܪܘܿܢ، ’ܦܲܫܸܛ ܚܘܼܛܪܘܼܟ݂ ܘܡܚܝܼ ܠܥܲܦܪܵܐ ܕܐܲܪܥܵܐ، ܘܒܸܬ ܚܵܕܹܪ ܠܩܲܠܡܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ.‘“ 17ܥܒ݂ܝܼܕ ܠܗܘܿܢ ܗܲܕܟ݂ܵܐ؛ ܦܘܼܫܸܛ ܠܹܗ ܐܲܗܪܘܿܢ ܐܝܼܕܹܗ ܒܚܘܼܛܪܹܗ، ܘܡܚܹܐ ܠܹܗ ܠܥܲܦܪܵܐ ܕܐܲܪܥܵܐ، ܘܗܘܹܐ ܠܹܗ ܩܲܠܡܵܐ ܒܒܲܪܢܵܫܵܐ ܘܒܗܲܝܘܵܢ. ܟܠܹܗ ܥܲܦܪܵܐ ܕܐܲܪܥܵܐ ܗܘܹܐ ܠܹܗ ܩܲܠܡܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ. 18ܐܘܼܦ ܚܲܪ̈ܵܫܹܐ ܒܚܸܪ̈ܫܲܝܗܝ ܓ̰ܘܼܪܸܒ ܠܗܘܿܢ ܠܦܲܠܘܼܛܹܐ ܩܲܠܡܵܐ، ܐܝܼܢܵܐ ܠܵܐ ܡܨܹܐ ܠܗܘܿܢ. ܗܘܹܐ ܠܵܗ̇ ܩܲܠܡܵܐ ܒܒܲܪܢܵܫܵܐ ܘܒܗܲܝܘܵܢ. 19ܘܐ݇ܡܝܼܪܗܘܿܢ ܚܲܪ̈ܵܫܹܐ ܠܦܸܪܥܘܿܢ، ”ܐܵܗܵܐ ܨܸܒܥܵܐ ܕܐܲܠܵܗܵܐ ܝܠܵܗ̇.“ ܐܝܼܢܵܐ ܩܫܹܐ ܠܹܗ ܠܸܒܵܐ ܕܦܸܪܥܘܿܢ، ܘܠܵܐ ܫܡܝܼܥ ܠܹܗ ܐܸܠܲܝܗܝ، ܐܲܝܟ݂ ܕܐ݇ܡܝܼܪܵܐ ܝܗ݇ܘܵܐ ܡܵܪܝܵܐ.

ܡܚܘܿܬܵܐ ܕܕܸܒܘܼܪܬܵܐ

20ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܩܘܼܡ ܓ̰ܲܠܕܹܐ ܒܨܲܦܪܵܐ ܘܟܠܝܼ ܩܵܕ݇ܡ ܦܸܪܥܘܿܢ ܟܲܕ ܒܹܐܙܵܠܵܐ ܝܠܹܗ ܠܡ̈ܝܼܵܐ، ܘܐ݇ܡܘܿܪ ܐܸܠܹܗ، ’ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ، ”ܫܲܕܸܪ ܠܥܲܡܝܼ ܕܦܵܠܚܝܼ ܐܸܠܝܼ. 21ܘܐܸܢ ܠܵܐ ܫܲܕܪܸܬ ܠܥܲܡܝܼ، ܒܸܬ ܫܲܕܪܸܢ ܪ̈ܵܝܦܹܐ ܕܕܸܕܒܹ̈ܐ ܥܲܠܘܼܟ݂، ܘܥܲܠ ܪܹ̈ܓܵܘܵܬܘܼܟ݂، ܘܥܲܠ ܥܲܡܘܼܟ݂ ܘܓܵܘ ܒܵܬܘܼ̈ܟ݂؛ ܒܸܬ ܡܵܠܝܼ ܒܵܬܹ̈ܐ ܕܡܸܨܪ̈ܵܝܹܐ ܕܸܒܘܼܪܬܵܐ، ܘܐܘܼܦ ܥܲܠ ܐܲܪܥܵܐ ܕܒܸܚܵܝܵܐ ܝܢܵܐ ܥܲܠܘܼܗ̇. 22ܐܝܼܢܵܐ ܒܸܬ ܦܵܪܫܹܢ ܒܗ̇ܘ ܝܵܘܡܵܐ ܠܐܲܪܥܵܐ ܕܓܹܫܵܢ، ܗ̇ܝ ܕܥܲܡܝܼ ܒܸܚܵܝܵܐ ܝܠܹܗ ܥܲܠܘܼܗ̇، ܕܠܵܐ ܗܵܘܝܵܐ ܬܵܡܵܐ ܕܸܒܘܼܪܬܵܐ، ܩܵܐ ܕܝܵܕܥܹܬ ܕܐܵܢܵܐ ܝܘܸܢ ܡܵܪܝܵܐ ܒܓܵܘܵܐ ܕܐܵܗܵܐ ܐܲܪܥܵܐ. 23ܒܸܬ ܡܲܬܒܸܢ ܦܘܼܪܫܘܼܢܝܵܐ ܒܹܝܠ ܥܲܡܝܼ ܘܒܹܝܠ ܥܲܡܘܼܟ݂. ܩܵܝܕܲܡܬܵܐ ܒܸܬ ܗܵܘܹܐ ܐܵܗܵܐ ܢܝܼܫܲܢܩܵܐ.“‘“ 24ܥܒ݂ܝܼܕ ܠܹܗ ܡܵܪܝܵܐ ܗܲܕܟ݂ܵܐ؛ ܘܐ݇ܬܹܐ ܠܗܘܿܢ ܫܸܠܚܹ̈ܐ ܓܘܼܪܹ̈ܐ ܕܕܸܒܘܼܪܬܵܐ ܠܒܲܝܬܵܐ ܕܦܸܪܥܘܿܢ، ܘܠܒܲܝܬܵܐ ܕܪܹ̈ܓܵܘܵܬܹܗ، ܘܒܟܠܵܗ̇ ܐܲܪܥܵܐ ܕܡܸܨܪܹܝܢ؛ ܘܚܪܝܼܒ݂ ܠܵܗ̇ ܐܲܪܥܵܐ ܡ̣ܢ ܥܸܠܬܵܐ ܕܕܸܒܘܼܪܬܵܐ.

25ܩܪܹܐ ܠܹܗ ܦܸܪܥܘܿܢ ܠܡܘܼܫܹܐ ܘܠܐܲܗܪܘܿܢ ܘܐ݇ܡܝܼܪܹܗ، ”ܙܹܠ݇ܡܘܼܢ ܘܥܒ݂ܘܿܕܘܼܢ ܕܸܒ݂ܚܵܐ ܠܐܲܠܵܗܵܘܟ݂ܘܿܢ ܓܵܘ ܐܵܗܵܐ ܐܲܪܥܵܐ.“ 26ܓ̰ܘܼܘܸܒ ܠܹܗ ܡܘܼܫܹܐ، ”ܠܹܐ ܝܠܵܗ̇ ܚܫܝܼܚܬܵܐ ܕܥܵܒ݂ܕܲܚ ܗܲܕܟ݂ܵܐ ܠܐܲܟ݂ܵܐ، ܣܵܒܵܒ ܕܸܒ݂ܚܵܐ ܕܡܲܩܪܸܒܲܚ ܠܡܵܪܝܵܐ ܐܲܠܵܗܲܢ ܛܲܡܐܘܼܬܵܐ ܝܠܹܗ ܠܡܸܨܪ̈ܵܝܹܐ. ܐܸܢ ܕܵܒ݂ܚܲܚ ܕܸܒ݂ܚܵܐ ܩܵܕ݇ܡ ܥܲܝܢܹ̈ܐ ܕܡܸܨܪ̈ܵܝܹܐ ܕܝܼܠܹܗ ܛܲܡܐܘܼܬܵܐ ܐܸܠܲܝܗܝ، ܠܹܐ ܪܵܓ̰ܡܝܼ ܠܲܢ؟ 27ܒܸܬ ܐܵܙܲܠ݇ܚ ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ ܓܵܘ ܒܲܪܝܼܵܐ ܘܕܵܒ݂ܚܲܚ ܕܸܒ݂ܚܵܐ ܠܡܵܪܝܵܐ ܐܲܠܵܗܲܢ ܐܲܝܟ݂ ܕܦܵܩܹܕ ܠܲܢ.“ 28ܐ݇ܡܝܼܪܹܗ ܦܸܪܥܘܿܢ، ”ܒܸܬ ܫܲܕܪܸܢܵܘܟ݂ܘܿܢ ܕܥܵܒ݂ܕܝܼܬܘܿܢ ܕܸܒ݂ܚܵܐ ܠܡܵܪܝܵܐ ܐܲܠܵܗܵܘܟ݂ܘܿܢ ܓܵܘ ܒܲܪܝܼܵܐ، ܐܝܼܢܵܐ ܠܵܐ ܐܵܙܠ݇ܝܼܬܘܿܢ ܪܵܒܵܐ ܪܸܚܩܵܐ. ܦܲܪܦܸܠܘܼܢ ܒܐܲܠܵܗܵܐ ܒܘܼܬ ܕܝܼܝܼ.“ 29ܐ݇ܡܝܼܪܹܗ ܡܘܼܫܹܐ، ”ܗܵܐ ܐܵܢܵܐ ܒܸܦܠܵܛܵܐ ܝܘܸܢ ܡ̣ܢ ܠܟܸܣ ܠܘܼܟ݂، ܘܒܸܬ ܦܲܪܦܸܠܸܢ ܒܡܵܪܝܵܐ ܕܦܵܪܩܝܼ ܫܸܠܚܹ̈ܐ ܕܕܸܒܘܼܪܬܵܐ ܡ̣ܢ ܦܸܪܥܘܿܢ، ܡ̣ܢ ܪܹ̈ܓܵܘܵܬܹܗ ܘܡ̣ܢ ܥܲܡܹܗ، ܩܵܝܕܲܡܬܵܐ؛ ܐܲܚܟ̰ܝܼ ܡܸܢܕܪܸܫ ܠܵܐ ܥܵܒܹܕ ܠܹܐܒܹ̈ܐ ܦܸܪܥܘܿܢ ܕܠܵܐ ܫܲܕܸܪ ܠܥܲܡܵܐ ܕܥܵܒܹܕ ܕܸܒ݂ܚܵܐ ܠܡܵܪܝܵܐ.“

30ܗ̇ܝܓܵܗ ܦܠܝܼܛ ܠܹܗ ܡܘܼܫܹܐ ܡ̣ܢ ܠܟܸܣ ܦܸܪܥܘܿܢ ܘܦܘܼܪܦܸܠ ܠܹܗ ܒܡܵܪܝܵܐ. 31ܘܥܒ݂ܝܼܕ ܠܹܗ ܡܵܪܝܵܐ ܐܲܝܟ݂ ܚܲܒܪܵܐ ܕܡܘܼܫܹܐ، ܘܒܘܼܪܒܸܙ ܠܹܗ ܠܫܸܠܚܹ̈ܐ ܕܕܸܒܘܼܪܬܵܐ ܡ̣ܢ ܦܸܪܥܘܿܢ، ܘܡ̣ܢ ܪܹ̈ܓܵܘܵܬܹܗ، ܘܡ̣ܢ ܥܲܡܹܗ؛ ܠܵܐ ܦܝܼܫ ܠܵܗ̇ ܫܒ݂ܝܼܩܬܵܐ ܚܕܵܐ. 32ܐܝܼܢܵܐ ܡܘܼܩܫܹܐ ܠܹܗ ܦܸܪܥܘܿܢ ܠܸܒܹܗ ܐܘܼܦ ܐܵܗܵܐ ܓܵܗܵܐ، ܘܠܵܐ ܫܘܼܕܸܪܹܗ ܠܥܲܡܵܐ.

Currently Selected:

ܡܦܩܢܐ 8: ABTAB

Highlight

Copy

Compare