ܡܦܩܢܐ 10

ܡܚܘܿܬܵܐ ܕܩܲܡܨܹ̈ܐ

1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܥܒ݂ܘܿܪ ܠܟܸܣ ܦܸܪܥܘܿܢ، ܣܵܒܵܒ ܐܵܢܵܐ ܡܘܼܩܫܹܐ ܠܝܼ ܠܠܸܒܹܗ ܘܠܠܸܒܵܐ ܕܪܹ̈ܓܵܘܵܬܹܗ، ܩܵܐ ܕܥܵܒ݂ܕܹܢ ܐܲܢܹܐ ܢܝܼܫܲܢܩܝܼ̈ ܓܵܘܲܝܗܝ، 2ܘܩܵܐ ܕܗܲܩܹܝܬ ܠܒܪܘܿܢܘܼܟ݂، ܘܠܒܪܘܿܢܵܐ ܕܒܪܘܿܢܘܼܟ݂، ܕܥܒ݂ܝܼܕ ܠܝܼ ܡܲܣܚܵܪܵܐ ܒܡܸܨܪ̈ܵܝܹܐ، ܘܢܝܼܫܲܢܩܝܼ̈ ܕܥܒ݂ܝܼܕܵܐ ܝܘܸܢ ܓܵܘܲܝܗܝ، ܕܝܵܕܥܝܼܬܘܿܢ ܕܐܵܢܵܐ ܝܘܸܢ ܡܵܪܝܵܐ.“ 3ܘܥܒ݂ܝܼܪܗܘܿܢ ܡܘܼܫܹܐ ܘܐܲܗܪܘܿܢ ܠܟܸܣ ܦܸܪܥܘܿܢ، ܘܐ݇ܡܝܼܪܗܘܿܢ ܐܸܠܹܗ، ”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܐܲܠܵܗܵܐ ܕܥܸܒ݂ܪ̈ܵܝܹܐ، ’ܗܲܠ ܐܝܼܡܲܢ ܒܸܬ ܡܲܚܦܸܠܸܬ ܠܡܲܟܘܼܦܹܐ ܓܵܢܘܼܟ݂ ܩܵܕ݇ܡܝܼ؟ ܫܲܕܸܪ ܠܥܲܡܝܼ ܕܦܵܠܚܝܼ ܐܸܠܝܼ. 4ܣܵܒܵܒ ܐܸܢ ܡܲܚܦܸܠܸܬ ܐܲܢ݇ܬ ܠܫܲܕܘܼܪܹܐ ܠܥܲܡܝܼ، ܗܵܐ ܐܵܢܵܐ ܡܲܝܬܘܼܝܹܐ ܝܘܸܢ ܩܘܼܕܡܹܐ ܩܲܡܨܵܐ ܒܬܚܘܼܡܘܼܟ݂، 5ܒܸܬ ܟܲܣܹܐ ܠܦܵܬܵܐ ܕܐܲܪܥܵܐ، ܗܵܕܵܐ ܕܠܹܐ ܡܵܨܹܐ ܐ݇ܢܵܫܵܐ ܠܸܚܙܵܝܘܼܗ̇. ܒܸܬ ܐܵܟܹܠ ܡܸܢܕܝܼ ܕܦܝܼܫܵܐ ܝܗ݇ܘܵܐ ܫܒ݂ܝܼܩܵܐ ܡ̣ܢ ܒܲܪܕܵܐ، ܘܒܸܬ ܐܵܟܹܠ ܠܟܠ ܐܝܼܠܵܢܵܐ ܕܡܲܓ̰ܝܘܼܢܹܐ ܝܠܹܗ ܐܸܠܵܘܟ݂ܘܿܢ ܒܕܸܫܬܵܐ. 6ܘܒܸܬ ܡܵܠܝܼ ܒܵܬܘܼ̈ܟ݂، ܘܒܵܬܹ̈ܐ ܕܟܠܲܝܗܝ ܪܹ̈ܓܵܘܵܬܘܼܟ݂، ܘܒܵܬܹ̈ܐ ܕܟܠܲܝܗܝ ܡܸܨܪ̈ܵܝܹܐ، ܗܵܕܵܐ ܕܠܵܐ ܚܙܹܐ ܠܗܘܿܢ ܒܵܒܵܘܵܬܘܼ̈ܟ݂، ܘܒܵܒܵܘܵܬܹ̈ܐ ܕܒܵܒܵܘܵܬܘܼ̈ܟ݂، ܡ̣ܢ ܝܵܘܡܵܐ ܕܐ݇ܬܹܐ ܠܗܘܿܢ ܠܐܵܗܵܐ ܐܲܪܥܵܐ ܘܗܲܠ ܐܸܕܝܘܿܡ ܝܵܘܡܵܐ.‘“ ܘܕܝܼܪܹܗ ܘܦܠܝܼܛ ܠܹܗ ܡ̣ܢ ܠܟܸܣ ܦܸܪܥܘܿܢ.

7ܐ݇ܡܝܼܪܗܘܿܢ ܪܹ̈ܓܵܘܵܬܹܐ ܕܦܸܪܥܘܿܢ ܐܸܠܹܗ، ”ܗܲܠ ܐܝܼܡܲܢ ܒܸܬ ܗܵܘܹܐ ܐܵܗܵܐ ܐ݇ܢܵܫܵܐ ܩܘܼܠܬܵܐ ܐܸܠܲܢ؟ ܫܲܕܸܪ ܠܐܲܢܹܐ ܐ݇ܢܵܫܹ̈ܐ ܕܦܵܠܚܝܼ ܠܡܵܪܝܵܐ ܐܲܠܵܗܲܝܗܝ. ܗܹܫ ܠܹܐ ܝܘܸܬ ܒܝܼܕܵܥܵܐ ܕܚܪܝܼܒ݂ ܠܵܗ̇ ܡܸܨܪܹܝܢ؟“

8ܘܦܝܼܫ ܠܗܘܿܢ ܡܘܼܕܸܪܹܐ ܡܘܼܫܹܐ ܘܐܲܗܪܘܿܢ ܠܟܸܣ ܦܸܪܥܘܿܢ، ܘܐ݇ܡܝܼܪܹܗ ܐܸܠܲܝܗܝ، ”ܙܹܠ݇ܡܘܼܢ ܦܠܘܿܚܘܼܢ ܠܡܵܪܝܵܐ ܐܲܠܵܗܵܘܟ݂ܘܿܢ! ܐܝܼܢܵܐ ܡܵܢܝܼ ܝܢܵܐ ܐܵܢܝܼ ܕܒܸܬ ܐܵܙܠ݇ܝܼ؟“ 9ܐ݇ܡܝܼܪܹܗ ܡܘܼܫܹܐ، ”ܒܸܬ ܐܵܙܲܠ݇ܚ ܒܥܠܲܝܡܲܢ̈ ܘܒܣܵܒܲܢ̈، ܒܒܢܘܿܢܲܢ̈ ܘܒܒܢܵܬܲܢ̈، ܒܦܸܣܩܲܢ̈ ܘܒܒܸܩܪ̈ܵܬܲܢ، ܣܵܒܵܒ ܥܹܐܕܵܐ ܕܡܵܪܝܵܐ ܝܠܹܗ ܐܸܠܲܢ.“ 10ܐ݇ܡܝܼܪܹܗ ܐܸܠܲܝܗܝ، ”ܗܵܘܹܐ ܡܵܪܝܵܐ ܥܲܡܵܘܟ݂ܘܿܢ ܐܸܢ ܫܵܒ݂ܩܹܢ ܕܐܵܙܠ݇ܝܼܬܘܿܢ ܥܲܡ ܝܲܠܘܼܕܵܘ̈ܟ݂ܘܿܢ. ܚܙܹܝܡܘܼܢ! ܡܲܒܝܘܼܢܹܐ ܝܠܵܗ̇ ܐܝܼܬ ܒܝܼܫܬܵܐ ܒܪܸܥܝܵܢܵܘܟ݂ܘܿܢ. 11ܠܵܐ ܗܲܕܟ݂ܵܐ! ܙܹܠ݇ܡܘܼܢ ܓܲܒ݂ܪܹ̈ܐ ܐܲܚܟ̰ܝܼ ܘܦܠܘܿܚܘܼܢ ܠܡܵܪܝܵܐ، ܣܵܒܵܒ ܐܵܗܵܐ ܛܠܝܼܒ ܠܵܘܟ݂ܘܿܢ.“ ܘܦܝܼܫ ܠܗܘܿܢ ܛܪܝܼܕܹܐ ܡ̣ܢ ܩܵܕ݇ܡ ܦܸܪܥܘܿܢ.

12ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܦܲܫܸܛ ܐܝܼܕܘܼܟ݂ ܥܲܠ ܐܲܪܥܵܐ ܕܡܸܨܪܹܝܢ ܕܐܵܬܹܐ ܩܲܡܨܵܐ، ܘܐܵܣܹܩ ܥܲܠܘܼܗ̇، ܘܕܐܵܟܹܠ ܠܟܠܹܗ ܓܸܠܵܐ ܕܐܲܪܥܵܐ، ܟܠ ܡܸܢܕܝܼ ܕܦܝܼܫܵܐ ܝܠܹܗ ܕܡ̣ܢ ܒܵܬ݇ܪ ܒܲܪܕܵܐ.“ 13ܘܦܘܼܫܸܛ ܠܹܗ ܡܘܼܫܹܐ ܚܘܼܛܪܹܗ ܥܲܠ ܐܲܪܥܵܐ ܕܡܸܨܪܹܝܢ، ܘܡܘܼܐܬܹܐ ܠܹܗ ܡܵܪܝܵܐ ܦܵܘܚܵܐ ܕܡܲܕܢܚܵܐ ܥܲܠܘܼܗ̇، ܟܠܹܗ ܗ̇ܘ ܝܵܘܡܵܐ ܘܟܠܹܗ ܗ̇ܘ ܠܲܝܠܹܐ؛ ܘܟܲܕ ܗܘܹܐ ܠܵܗ̇ ܩܵܝܕܲܡܬܵܐ، ܦܵܘܚܵܐ ܕܡܲܕܢܚܵܐ ܡܘܼܐܬܹܐ ܠܹܗ ܠܩܲܡܨܵܐ. 14ܘܐ݇ܣܝܼܩ ܠܹܗ ܩܲܡܨܵܐ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ، ܘܫܪܹܐ ܠܹܗ ܒܟܠܹܗ ܬܚܘܼܡܘܼܗ̇. ܪܵܒܵܐ ܚܲܝܠܵܢܵܐ ܝܗ݇ܘܵܐ ܓ̰ܲܒܠܵܐ ܕܩܲܡܨܵܐ، ܗ̇ܘ ܕܠܲܝܬ ܗܘܝܼܵܐ ܐܲܝܟ݂ ܕܝܼܹܗ، ܘܠܵܐ ܒܸܬ ܗܵܘܹܐ. 15ܡܘܼܟܸܣ ܠܹܗ ܠܦܵܬܵܐ ܕܟܠܵܗ̇ ܐܲܪܥܵܐ، ܗܵܕܵܐ ܕܚܒܹܐ ܠܵܗ̇ ܐܲܪܥܵܐ، ܘܐ݇ܟ݂ܝܼܠ ܠܹܗ ܠܟܠܹܗ ܓܸܠܵܐ ܕܐܲܪܥܵܐ ܘܠܟܠܵܗ̇ ܛܥܘܼܢܬܵܐ ܕܐܝܼܠܵܢܵܐ ܕܫܒ݂ܝܼܩܵܐ ܝܗ݇ܘܵܐ ܒܲܪܕܵܐ. ܠܵܐ ܦܝܼܫ ܠܵܗ̇ ܫܒ݂ܝܼܩܬܵܐ ܩܝܼܢܘܼܬܵܐ ܒܐܝܼܠܵܢܵܐ ܘܒܓܸܠܵܐ ܕܕܸܫܬܵܐ ܓܵܘ ܟܠܵܗ̇ ܐܲܪܥܵܐ ܕܡܸܨܪܹܝܢ.

16ܗ̇ܝܓܵܗ ܩܪܹܐ ܠܹܗ ܦܸܪܥܘܿܢ ܒܡܲܠܝܲܙܬܵܐ ܠܡܘܼܫܹܐ ܘܠܐܲܗܪܘܿܢ ܘܐ݇ܡܝܼܪܹܗ، ”ܚܛܹܐ ܠܝܼ ܠܡܵܪܝܵܐ ܐܲܠܵܗܵܘܟ݂ܘܿܢ ܘܥܲܠܵܘܟ݂ܘܿܢ. 17ܐܵܕܝܼܵܐ ܦܲܚܠܘܼܢ ܠܵܗ̇ ܚܛܝܼܬܝܼ ܐܲܚܟ̰ܝܼ ܐܵܗܵܐ ܓܵܗܵܐ، ܘܦܲܪܦܸܠܘܼܢ ܒܡܵܪܝܵܐ ܐܲܠܵܗܵܘܟ݂ܘܿܢ ܕܡܲܥܒܸܪ ܡܸܢܝܼ ܐܵܗܵܐ ܡܵܘܬܵܐ.“ 18ܘܡܘܼܫܹܐ ܦܠܝܼܛ ܠܹܗ ܡ̣ܢ ܠܟܸܣ ܦܸܪܥܘܿܢ ܘܦܘܼܪܦܸܠ ܠܹܗ ܒܡܵܪܝܵܐ. 19ܫܘܼܚܠܸܦ ܠܹܗ ܡܵܪܝܵܐ ܠܦܵܘܚܵܐ ܠܚܲܕ ܦܵܘܚܵܐ ܪܵܒܵܐ ܚܲܝܠܵܢܵܐ ܕܡܲܥܪܒ݂ܵܐ، ܘܫܩܝܼܠ ܠܹܗ ܩܲܡܨܵܐ ܘܩܲܡ ܪܲܦܹܐ ܠܹܗ ܓܵܘ ܝܵܡܵܐ ܕܣܘܿܦ#10‏:19 ܥܸܒ݂ܪܵܐܝܼܬ ܒܡܲܥܢܵܝܵܐ: ܝܵܡܵܐ ܕܙܹܠܹ̈ܐ، ܘܦܝܼܫܬܵܐ ܝ݇ܕܝܼܥܬܵܐ ”ܝܵܡܵܐ ܣܡܘܿܩܬܵܐ“ ܒܝܲܕ ܐܲܨܲܚܬܵܐ ܝܵܘܢܵܝܬܵܐ. . ܠܵܐ ܦܝܼܫ ܠܹܗ ܫܒ݂ܝܼܩܵܐ ܐܘܼܦ ܚܲܕ ܩܲܡܨܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ. 20ܐܝܼܢܵܐ ܡܘܼܩܫܹܐ ܠܹܗ ܡܵܪܝܵܐ ܠܸܒܵܐ ܕܦܸܪܥܘܿܢ، ܘܠܵܐ ܫܒ݂ܝܼܩ ܠܹܗ ܠܒܢܲܝ̈ ܝܼܣܪܵܝܹܠ ܕܦܵܠܛܝܼ.

ܚܸܫܟܵܐ ܥܲܠ ܐܲܪܥܵܐ

21ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܦܲܫܸܛ ܐܝܼܕܘܼܟ݂ ܠܵܫܡܲܝܵܐ ܕܗܵܘܹܐ ܚܸܫܟܵܐ ܥܲܠ ܐܲܪܥܵܐ ܕܡܸܨܪܹܝܢ، ܚܸܫܟܵܐ ܥܲܡܛܵܢܵܐ.“ 22ܘܦܘܼܫܸܛ ܠܹܗ ܡܘܼܫܹܐ ܐܝܼܕܹܗ ܠܵܫܡܲܝܵܐ، ܘܗܘܹܐ ܠܹܗ ܚܸܫܟܵܐ ܘܥܲܡܛܵܢܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ، ܬܠܵܬܵܐ ܝܵܘܡܵܢܹ̈ܐ. 23ܐ݇ܢܵܫܹ̈ܐ ܠܵܐ ܚܙܹܐ ܠܗܘܿܢ ܠܸܚܕܵܕܹ̈ܐ، ܘܠܵܐ ܩܝܼܡ ܠܗܘܿܢ ܡ̣ܢ ܕܘܼܟܬܲܝܗܝ ܬܠܵܬܵܐ ܝܵܘܡܵܢܹ̈ܐ؛ ܐܝܼܢܵܐ ܟܠܲܝܗܝ ܒܢܲܝ̈ ܝܼܣܪܵܝܹܠ ܐܝܼܬ ܗ݇ܘܵܘ ܠܗܘܿܢ ܒܲܗܪܵܐ ܒܕܘܼܟܵܐ ܕܒܸܥܡܵܪܵܐ ܝܗ݇ܘܵܘ.

24ܗ̇ܝܓܵܗ ܩܪܹܐ ܠܹܗ ܦܸܪܥܘܿܢ ܠܡܘܼܫܹܐ ܘܐ݇ܡܝܼܪܹܗ، ”ܙܹܠ݇ܡܘܼܢ ܘܦܠܘܿܚܘܼܢ ܠܡܵܪܝܵܐ؛ ܐܘܼܦ ܝܲܠܘܼܕܵܘ̈ܟ݂ܘܿܢ ܐܵܙܠ݇ܝܼ ܥܲܡܵܘܟ݂ܘܿܢ، ܐܝܼܢܵܐ ܦܸܣܩܵܘ̈ܟ݂ܘܿܢ ܘܒܸܩܪ̈ܵܬܵܘܟ݂ܘܿܢ ܦܵܝܫܝܼ.“ 25ܐ݇ܡܝܼܪܹܗ ܡܘܼܫܹܐ، ”ܐܘܼܦ ܓܵܪܲܓ ܐܲܢ݇ܬ ܡܲܬܒܸܬ ܒܐܝܼܕܲܢ ܕܸܒ݂ܚܹ̈ܐ ܘܕܸܒ݂ܚܹ̈ܐ ܡܘܼܩܕܹ̈ܐ ܕܡܲܩܪܸܒܲܚ ܠܡܵܪܝܵܐ ܐܲܠܵܗܲܢ. 26ܐܘܼܦ ܩܸܢܝܵܢܲܢ̈ ܒܸܬ ܐܵܙܠ݇ܝܼ ܥܲܡܲܢ؛ ܠܹܐ ܦܵܝܫܵܐ ܫܒ݂ܝܼܩܬܵܐ ܐܘܼܦ ܚܕܵܐ ܛܸܦܪܵܐ، ܣܵܒܵܒ ܡܸܢܲܝܗܝ ܒܸܬ ܫܵܩܠܲܚ ܘܕܵܒ݂ܚܲܚ ܠܡܵܪܝܵܐ ܐܲܠܵܗܲܢ، ܘܐܲܚܢܲܢ ܠܹܐ ܝܵܕܥܲܚ ܡܘܿܕܝܼ ܒܸܬ ܕܵܒ݂ܚܲܚ ܠܡܵܪܝܵܐ ܗܲܠ ܕܡܵܛܲܚ ܬܵܡܵܐ.“

27ܐܝܼܢܵܐ ܡܘܼܩܫܹܐ ܠܹܗ ܡܵܪܝܵܐ ܠܠܸܒܵܐ ܕܦܸܪܥܘܿܢ، ܘܠܵܐ ܒܥܹܐ ܠܹܗ ܠܫܲܕܘܼܪܲܝ. 28ܘܐ݇ܡܝܼܪܹܗ ܠܡܘܼܫܹܐ، ”ܙܹܠ݇ ܡ̣ܢ ܠܟܸܣ ܠܝܼ؛ ܦܘܼܫ ܙܗܝܼܪܵܐ، ܠܵܐ ܚܵܙܹܝܬ ܠܵܗ̇ ܦܵܬܝܼ ܐ݇ܚܹܪ݇ܢܵܐ، ܣܵܒܵܒ ܒܝܵܘܡܵܐ ܕܚܵܙܹܝܬ ܠܦܵܬܝܼ، ܒܸܬ ܡܵܝܬܹܬ.“ 29ܓ̰ܘܼܘܸܒ ܠܹܗ ܡܘܼܫܹܐ، ”ܨܦܵܝܝܼ ܗܘܼܡܙܸܡ ܠܘܼܟ݂، ܐ݇ܚܹܪ݇ܢܵܐ ܠܹܐ ܚܵܙܹܝܢܵܗ̇ ܦܵܬܘܼܟ݂ ܡܸܢܕܪܸܫ.“

Currently Selected:

ܡܦܩܢܐ 10: ABTAB

Highlight

Copy

Compare