ܡܦܩܢܐ 7
7
ܐܲܗܪܘܿܢ ܗܲܡܙܘܼܡܹܐ ܡ̣ܢ ܓܹܒܵܐ ܕܡܘܼܫܹܐ
1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܚܙܝܼ، ܥܒ݂ܝܼܕܘܼܟ݂ ܝܘܸܢ ܐܲܝܟ݂ ܐܲܠܵܗܵܐ ܠܦܸܪܥܘܿܢ، ܘܐܲܗܪܘܿܢ ܐܲܚܘܿܢܘܼܟ݂ ܒܸܬ ܗܵܘܹܐ ܢܒ݂ܝܼܘܼܟ݂. 2ܐܲܢ݇ܬ ܒܸܬ ܗܲܡܙܸܡܸܬ ܟܠ ܡܸܢܕܝܼ ܕܦܵܩܕܹܢܘܼܟ݂؛ ܘܐܲܗܪܘܿܢ ܐܲܚܘܿܢܘܼܟ݂ ܒܸܬ ܗܲܡܙܸܡ ܥܲܡ ܦܸܪܥܘܿܢ ܕܫܵܒܹܩ ܠܒܢܲܝ̈ ܝܼܣܪܵܝܹܠ ܕܦܵܠܛܝܼ ܡ̣ܢ ܐܲܪܥܹܗ. 3ܐܝܼܢܵܐ ܐܵܢܵܐ ܒܸܬ ܡܲܩܫܸܝܢ ܠܠܸܒܵܐ ܕܦܸܪܥܘܿܢ، ܘܒܸܬ ܡܲܙܝܸܕܸܢ ܠܢܝܼܫܲܢܩܝܼ̈ ܘܠܥܵܓ̰ܸܒܘܵܬܝܼ̈ ܒܐܲܪܥܵܐ ܕܡܸܨܪܹܝܢ. 4ܘܠܹܐ ܫܵܡܹܥ ܐܸܠܵܘܟ݂ܘܿܢ ܦܸܪܥܘܿܢ. ܗ̇ܝܓܵܗ ܒܸܬ ܡܲܪܡܸܢ ܐܝܼܕܝܼ ܥܲܠ ܡܸܨܪܹܝܢ، ܘܒܕܝܼܘܵܢܹ̈ܐ ܓܘܼܪܹ̈ܐ ܒܸܬ ܦܲܠܛܸܢ ܡ̣ܢ ܐܲܪܥܵܐ ܕܡܸܨܪܹܝܢ ܠܚܲܝܠܵܘܵܬܝܼ̈، ܕܝܼܢܵܐ ܥܲܡܝܼ ܒܢܲܝ̈ ܝܼܣܪܵܝܹܠ. 5ܘܒܸܬ ܝܵܕܥܝܼ ܡܸܨܪ̈ܵܝܹܐ ܕܐܵܢܵܐ ܝܘܸܢ ܡܵܪܝܵܐ، ܟܲܕ ܦܲܫܛܸܢ ܐܝܼܕܝܼ ܥܲܠ ܡܸܨܪܹܝܢ ܘܦܲܠܛܸܢ ܠܒܢܲܝ̈ ܝܼܣܪܵܝܹܠ ܡ̣ܢ ܓܵܘܲܝܗܝ.“ 6ܘܗܲܕܟ݂ܵܐ ܥܒ݂ܝܼܕ ܠܗܘܿܢ ܡܘܼܫܹܐ ܘܐܲܗܪܘܿܢ؛ ܥܒ݂ܝܼܕ ܠܗܘܿܢ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܲܝܗܝ. 7ܡܘܼܫܹܐ ܒܲܪ ܬܡܵܢܝܼ ܫܸܢܹ̈ܐ ܝܗ݇ܘܵܐ، ܘܐܲܗܪܘܿܢ ܒܲܪ ܬܡܵܢܝܼ ܘܬܠܵܬ ܫܸܢܹ̈ܐ ܝܗ݇ܘܵܐ، ܟܲܕ ܗܘܼܡܙܸܡ ܠܗܘܿܢ ܥܲܡ ܦܸܪܥܘܿܢ.
ܚܘܼܛܪܵܐ ܕܡܘܼܫܹܐ ܒܸܚܕܵܪܵܐ ܠܚܘܼܘܹܐ
8ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ، 9”ܐܝܼܡܲܢ ܕܐܵܡܹܪ ܐܸܠܵܘܟ݂ܘܿܢ ܦܸܪܥܘܿܢ، ’ܥܒ݂ܘܿܕܘܼܢ ܐܲܚܬܘܿܢ ܢܝܼܫܲܢܩܵܐ،‘ ܐܵܡܪܹܬ ܠܐܲܗܪܘܿܢ، ’ܫܩܘܿܠ ܚܘܼܛܪܘܼܟ݂ ܘܪܲܦܝܼ ܠܹܗ ܩܵܕ݇ܡ ܦܸܪܥܘܿܢ ܕܗܵܘܹܐ ܚܘܼܘܹܐ.‘“ 10ܐ݇ܙܝܼܠ ܠܗܘܿܢ ܡܘܼܫܹܐ ܘܐܲܗܪܘܿܢ ܠܟܸܣ ܦܸܪܥܘܿܢ، ܘܥܒ݂ܝܼܕ ܠܗܘܿܢ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ؛ ܪܘܼܦܹܐ ܠܹܗ ܐܲܗܪܘܿܢ ܚܘܼܛܪܹܗ ܩܵܕ݇ܡ ܦܸܪܥܘܿܢ ܘܩܵܕ݇ܡ ܪܹ̈ܓܵܘܵܬܹܗ، ܘܗܘܹܐ ܠܹܗ ܚܘܼܘܹܐ. 11ܗ̇ܝܓܵܗ ܦܸܪܥܘܿܢ ܩܪܹܐ ܠܹܗ ܠܚܲܟܝܼܡܹ̈ܐ ܘܠܚܲܪ̈ܵܫܹܐ، ܘܐܘܼܦ ܐܵܢܝܼ ܚܲܪ̈ܵܫܹܐ ܕܡܸܨܪܹܝܢ ܥܒ݂ܝܼܕ ܠܗܘܿܢ ܗܵܕܵܐ ܒܚܸܪ̈ܫܲܝܗܝ. 12ܟܠ ܐ݇ܢܵܫܵܐ ܪܘܼܦܹܐ ܠܹܗ ܠܐܲܪܥܵܐ ܚܘܼܛܪܹܗ ܘܗܘܹܐ ܠܹܗ ܚܘܼܘܹܐ؛ ܐܝܼܢܵܐ ܚܘܼܛܪܵܐ ܕܐܲܗܪܘܿܢ ܒܠܝܼܥ ܠܹܗ ܠܚܘܼܛܪ̈ܲܝܗܝ. 13ܐܝܼܢܵܐ ܩܫܹܐ ܠܹܗ ܠܸܒܵܐ ܕܦܸܪܥܘܿܢ، ܘܠܵܐ ܫܡܝܼܥ ܠܹܗ ܐܸܠܲܝܗܝ، ܕܵܐܟ݂ܝܼ ܕܐ݇ܡܝܼܪܹܗ ܡܵܪܝܵܐ.
ܡ̈ܝܼܵܐ ܒܸܚܕܵܪܵܐ ܠܕܸܡܵܐ
14ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܩܫܹܐ ܠܹܗ ܠܸܒܵܐ ܕܦܸܪܥܘܿܢ، ܘܡܲܚܦܘܼܠܹܐ ܝܠܹܗ ܠܫܲܕܘܼܪܹܐ ܠܥܲܡܵܐ. 15ܙܹܠ݇ ܠܟܸܣ ܠܹܗ ܒܨܲܦܪܵܐ ܟܲܕ ܐܵܙܹܠ ܠܡ̈ܝܼܵܐ، ܘܟܵܠܹܝܬ ܠܐܘܼܪܚܹܗ ܥܲܠ ܣܸܦܬܵܐ ܕܢܲܗܪܵܐ، ܘܚܘܼܛܪܵܐ ܕܚܕܝܼܪܹܗ ܠܚܘܼܘܹܐ ܫܵܩܠܹܬ ܠܹܗ ܒܐܝܼܕܘܼܟ݂، 16ܘܐܵܡܪܹܬ ܐܸܠܹܗ، ’ܡܵܪܝܵܐ، ܕܝܼܠܹܗ ܐܲܠܵܗܵܐ ܕܥܸܒ݂ܪ̈ܵܝܹܐ، ܩܲܡ ܫܲܕܸܪܝܼ ܠܟܸܣ ܠܘܼܟ݂ ܕܐܵܡܪܹܢ ܐܸܠܘܼܟ݂، ܫܲܕܸܪ ܠܥܲܡܝܼ ܕܦܵܠܚܝܼ ܐܸܠܝܼ ܓܵܘ ܒܲܪܝܼܵܐ؛ ܐܝܼܢܵܐ ܗܹܫ ܠܹܐ ܝܘܸܬ ܫܡܝܼܥܵܐ ܐܸܠܝܼ. 17ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ، ”ܒܐܵܗܵܐ ܒܸܬ ܝܵܕܥܹܬ ܕܐܵܢܵܐ ܝܘܸܢ ܡܵܪܝܵܐ؛ ܗܵܐ، ܐܵܢܵܐ ܒܸܬ ܡܵܚܹܝܢ ܒܚܘܼܛܪܵܐ ܕܝܼܠܹܗ ܒܐܝܼܕܝܼ ܠܡ̈ܝܼܵܐ ܕܝܼܢܵܐ ܒܢܲܗܪܵܐ، ܘܒܸܬ ܦܵܝܫܝܼ ܡܘܼܚܕܸܪܹܐ ܠܕܸܡܵܐ. 18ܘܢܘܼܢܵܐ ܕܝܼܠܵܗ̇ ܓܵܘ ܢܲܗܪܵܐ ܒܸܬ ܡܵܝܬܵܐ، ܘܒܸܬ ܚܵܡܹܩ ܢܲܗܪܵܐ، ܘܒܸܬ ܓܲܢܓܸܙܝܼ ܡܸܨܪ̈ܵܝܹܐ ܡ̣ܢ ܠܸܫܬܵܝܵܐ ܡ̈ܝܼܵܐ ܕܢܲܗܪܵܐ.“‘“
19ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܐ݇ܡܘܿܪ ܠܐܲܗܪܘܿܢ، ’ܫܩܘܿܠ ܚܘܼܛܪܘܼܟ݂ ܘܦܲܫܸܛ ܐܝܼܕܘܼܟ݂ ܥܲܠ ܡ̈ܝܼܵܐ ܕܡܸܨܪܹܝܢ، ܥܲܠ ܢܲܗܪ̈ܵܘܵܬܲܝܗܝ، ܥܲܠ ܫܵܩܝܼܵܬܲܝ̈ܗܝ، ܥܲܠ ܓܵܘܠܵܘܵܬܲܝ̈ܗܝ، ܘܥܲܠ ܟܠܲܝܗܝ ܩܵܘܒܝܼܹ̈ܐ ܕܡܝܼܲܝ̈ܗܝ، ܕܗܵܘܝܼ ܕܸܡܵܐ؛ ܘܒܸܬ ܗܵܘܹܐ ܕܸܡܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ، ܘܐܘܼܦ ܒܡܵܐܢܹ̈ܐ ܕܩܲܝܣܵܐ ܘܡܵܐܢܹ̈ܐ ܕܟܹܐܦܵܐ.‘“ 20ܥܒ݂ܝܼܕ ܠܗܘܿܢ ܗܲܕܟ݂ܵܐ ܡܘܼܫܹܐ ܘܐܲܗܪܘܿܢ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ. ܡܘܼܪܸܡ ܠܹܗ ܚܘܼܛܪܹܗ ܘܡܚܹܐ ܠܹܗ ܠܡ̈ܝܼܵܐ ܕܝܼܗ݇ܘܵܘ ܓܵܘ ܢܲܗܪܵܐ ܩܵܕ݇ܡ ܥܲܝܢܵܐ ܕܦܸܪܥܘܿܢ ܘܕܪܹ̈ܓܵܘܵܬܹܗ، ܘܦܝܼܫ ܠܗܘܿܢ ܡܘܼܚܕܸܪܹܗ ܟܠܲܝܗܝ ܡ̈ܝܼܵܐ ܕܝܼܗ݇ܘܵܘ ܓܵܘ ܢܲܗܪܵܐ ܠܕܸܡܵܐ. 21ܢܘܼܢܵܐ ܕܝܼܗ݇ܘܵܐ ܓܵܘ ܢܲܗܪܵܐ ܡܝܼܬ ܠܵܗ̇، ܘܚܡܝܼܩ ܠܹܗ ܢܲܗܪܵܐ، ܗܵܕܵܐ ܕܠܵܐ ܡܨܹܐ ܠܗܘܿܢ ܡܸܨܪ̈ܵܝܹܐ ܠܸܫܬܵܝܵܐ ܡ̈ܝܼܵܐ ܡ̣ܢ ܢܲܗܪܵܐ، ܘܗܘܹܐ ܠܹܗ ܕܸܡܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ. 22ܐܝܼܢܵܐ ܥܒ݂ܝܼܕ ܠܗܘܿܢ ܗܲܕܟ݂ܵܐ ܐܘܼܦ ܚܲܪ̈ܵܫܹܐ ܕܡܸܨܪܹܝܢ ܒܚܸܪ̈ܫܲܝܗܝ؛ ܘܩܫܹܐ ܠܹܗ ܠܸܒܵܐ ܕܦܸܪܥܘܿܢ، ܘܠܵܐ ܫܡܝܼܥ ܠܹܗ ܐܸܠܲܝܗܝ، ܕܵܐܟ݂ܝܼ ܕܗܘܼܡܙܸܡ ܠܹܗ ܡܵܪܝܵܐ. 23ܘܕܝܼܪܹܗ ܦܸܪܥܘܿܢ ܘܐ݇ܬܹܐ ܠܹܗ ܠܒܲܝܬܹܗ، ܘܗܲܪ ܠܵܐ ܬܘܼܚܡܸܢܹܗ ܒܐܵܗܵܐ. 24ܘܟܠܲܝܗܝ ܡܸܨܪ̈ܵܝܹܐ ܚܦܝܼܪܗܘܿܢ ܠܚܵܕܸܪ̈ܘܵܢܹܐ ܕܢܲܗܪܵܐ ܠܸܫܬܵܝܵܐ ܡ̈ܝܼܵܐ، ܣܵܒܵܒ ܠܹܐ ܡܵܨܝܼ ܗ݇ܘܵܘ ܠܸܫܬܵܝܵܐ ܡ̣ܢ ܡ̈ܝܼܵܐ ܕܢܲܗܪܵܐ.
25ܥܒ݂ܝܼܪܗܘܿܢ ܫܲܒ݂ܥܵܐ ܝܵܘܡܵܢܹ̈ܐ ܡ̣ܢ ܒܵܬ݇ܪ ܕܡܚܹܐ ܠܹܗ ܡܵܪܝܵܐ ܠܢܲܗܪܵܐ.
Currently Selected:
ܡܦܩܢܐ 7: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
