ܡܦܩܢܐ 6
6
ܘܲܥܕܵܐ ܕܦܘܼܪܩܵܢܵܐ
1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܐܵܕܝܼܵܐ ܒܸܬ ܚܵܙܹܝܬ ܡܘܿܕܝܼ ܒܸܬ ܥܵܒ݂ܕܹܢ ܠܦܸܪܥܘܿܢ؛ ܣܵܒܵܒ ܒܐܝܼܕܵܐ ܚܲܝܠܵܢܬܵܐ ܒܸܬ ܫܲܕܸܪܗܘܿܢ، ܘܒܐܝܼܕܵܐ ܙܲܪܒܵܢܬܵܐ ܒܸܬ ܛܵܪܹܕ ܠܗܘܿܢ ܡ̣ܢ ܐܲܪܥܹܗ.“ 2ܘܗܘܼܡܙܸܡ ܠܹܗ ܐܲܠܵܗܵܐ ܥܲܡ ܡܘܼܫܹܐ ܘܐ݇ܡܝܼܪܹܗ، ”ܐܵܢܵܐ ܝܘܸܢ ܡܵܪܝܵܐ. 3ܦܝܼܫ ܠܝܼ ܚܸܙܝܵܐ ܠܐܲܒ݂ܪܵܗܵܡ، ܠܐܝܼܣܚܵܩ، ܘܠܝܲܥܩܘܿܒ݂ ܐܲܝܟ݂ ܐܹܝܠ ܫܲܕܲܝ،#6:3 ܚܲܒܪܵܐ ܥܸܒ݂ܪܵܝܵܐ ܒܡܲܥܢܵܝܵܐ ܕܐܲܠܵܗܵܐ ܚܲܝܠܬܵܢܵܐ ܐܝܼܢܵܐ ܒܫܸܡܝܼ ܡܵܪܝܵܐ ܠܵܐ ܦܝܼܫ ܠܝܼ ܝ݇ܕܝܼܥܵܐ ܐܸܠܲܝܗܝ. 4ܐܘܼܦ ܡܘܼܩܘܹܐ ܠܝܼ ܠܩܵܘܠܝܼ ܥܲܡܲܝܗܝ، ܠܝܼܵܗ݇ܒ݂ܵܐ ܐܸܠܲܝܗܝ ܐܲܪܥܵܐ ܕܟܢܲܥܢ، ܐܲܪܥܵܐ ܕܬܵܘܬܵܒ݂ܘܼܬܲܝܗܝ، ܗ̇ܝ ܕܡܘܼܫܚܸܛ ܠܗܘܿܢ ܓܵܘܘܼܗ̇. 5ܘܐܘܼܦ ܫܡܝܼܥ ܠܝܼ ܬܵܢܲܚܬܵܐ ܕܒܢܲܝ̈ ܝܼܣܪܵܝܹܠ، ܕܡܸܨܪ̈ܵܝܹܐ ܕܒ݂ܝܼܩܲܝ ܝܢܵܐ ܠܥܲܒ݂ܕܘܼܬܵܐ، ܘܕܟ݂ܝܼܪܝܼ ܠܩܵܘܠܝܼ. 6ܒܘܼܬ ܐܵܗܵܐ ܐ݇ܡܘܿܪ ܠܒܢܲܝ̈ ܝܼܣܪܵܝܹܠ، ’ܐܵܢܵܐ ܝܘܸܢ ܡܵܪܝܵܐ، ܘܒܸܬ ܦܲܠܛܸܢܵܘܟ݂ܘܿܢ ܡ̣ܢ ܬܚܘܿܬ ܟܵܪ̈ܵܬܹܐ ܕܡܸܨܪ̈ܵܝܹܐ ܘܒܸܬ ܦܲܨܸܝܢܵܘܟ݂ܘܿܢ ܡ̣ܢ ܥܲܒ݂ܕܘܼܬܲܝܗܝ، ܘܒܸܬ ܦܲܪܩܸܢܵܘܟ݂ܘܿܢ ܒܕܪܲܥܢܝܼ ܚܲܝܠܵܢܵܐ ܘܒܕܝܼܘܵܢܹ̈ܐ ܓܘܼܪܹ̈ܐ. 7ܘܒܸܬ ܫܵܩܠܹܢܵܘܟ݂ܘܿܢ ܐܸܠܝܼ ܠܥܲܡܵܐ، ܘܒܸܬ ܗܵܘܹܝܢ ܐܸܠܵܘܟ݂ܘܿܢ ܐܲܠܵܗܵܐ؛ ܘܒܸܬ ܝܵܕܥܝܼܬܘܿܢ ܕܐܵܢܵܐ ܝܘܸܢ ܡܵܪܝܵܐ ܐܲܠܵܗܵܘܟ݂ܘܿܢ، ܕܦܘܼܠܸܛ ܠܝܼ ܐܸܠܵܘܟ݂ܘܿܢ ܡ̣ܢ ܬܚܘܿܬ ܟܵܪ̈ܵܬܹܐ ܕܡܸܨܪ̈ܵܝܹܐ. 8ܘܒܸܬ ܡܲܝܬܹܝܢܵܘܟ݂ܘܿܢ ܠܐܲܪܥܵܐ ܕܝ݇ܡܹܐ ܠܝܼ ܠܝܼܵܗ݇ܒ݂ܘܼܗ̇ ܠܐܲܒ݂ܪܵܗܵܡ، ܠܐܝܼܣܚܵܩ، ܘܠܝܲܥܩܘܿܒ݂. ܒܸܬ ܝܵܗ݇ܒܹܢܵܗ̇ ܐܸܠܵܘܟ݂ܘܿܢ ܠܝܵܪܬܘܼܬܵܐ. ܐܵܢܵܐ ܝܘܸܢ ܡܵܪܝܵܐ.‘“
9ܗܘܼܡܙܸܡ ܠܹܗ ܡܘܼܫܹܐ ܗܲܕܟ݂ܵܐ ܥܲܡ ܒܢܲܝ̈ ܝܼܣܪܵܝܹܠ، ܐܝܼܢܵܐ ܐܵܢܝܼ ܠܵܐ ܫܡܝܼܥ ܠܗܘܿܢ ܠܡܘܼܫܹܐ ܡ̣ܢ ܟܸܪܝܘܼܬܵܐ ܕܪܘܼܚܵܐ ܘܡ̣ܢ ܥܲܒ݂ܕܘܼܬܵܐ ܩܫܝܼܬܵܐ.
10ܗ̇ܝܓܵܗ ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 11”ܥܒ݂ܘܿܪ ܘܗܲܡܙܸܡ ܥܲܡ ܦܸܪܥܘܿܢ، ܡܲܠܟܵܐ ܕܡܸܨܪܹܝܢ، ܕܫܲܕܸܪ ܠܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܹܗ.“ 12ܓ̰ܘܼܘܸܒ ܠܹܗ ܡܘܼܫܹܐ ܠܡܵܪܝܵܐ ܘܐ݇ܡܝܼܪܹܗ، ”ܗܵܐ، ܒܢܲܝ̈ ܝܼܣܪܵܝܹܠ ܠܵܐ ܫܡܝܼܥ ܠܗܘܿܢ ܐܸܠܝܼ؛ ܕܵܐܟ݂ܝܼ ܒܸܬ ܫܵܡܹܥ ܐܸܠܝܼ ܦܸܪܥܘܿܢ، ܘܐܵܢܵܐ ܠܹܐ ܝܘܸܢ ܡܲܠܵܠܵܐ؟“ 13ܗܲܕܟ݂ܵܐ ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܥܲܡ ܐܲܗܪܘܿܢ ܘܦܩܝܼܕܲܝ ܠܹܗ ܕܐܵܙܠ݇ܝܼ ܠܟܸܣ ܒܢܲܝ̈ ܝܼܣܪܵܝܹܠ، ܘܠܟܸܣ ܦܸܪܥܘܿܢ ܡܲܠܟܵܐ ܕܡܸܨܪܹܝܢ ܠܦܲܠܘܼܛܹܐ ܠܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ.
ܒܢܘܿܢܹ̈ܐ ܕܪܐܘܼܒܸܢ ܘܕܫܸܡܥܘܿܢ ܘܕܠܹܘܝܼ
14ܐܲܢܹܐ ܝܢܵܐ ܪܹ̈ܫܵܢܹܐ ܕܒܲܝܬܵܐ ܕܒܵܒܵܘܵܬܲܝ̈ܗܝ، ܒܢܘܿܢܹ̈ܐ ܕܪܐܘܼܒܸܢ، ܒܘܼܟ݂ܪܵܐ ܕܝܼܣܪܵܝܹܠ: ܚܢܘܿܟ݂، ܦܲܠܘܿ، ܚܸܨܪܘܿܢ ܘܟܲܪܡܝܼ؛ ܐܲܢܹܐ ܝܢܵܐ ܫܲܪ̈ܒܵܬܹܐ ܕܪܐܘܼܒܸܢ. 15ܒܢܘܿܢܹ̈ܐ ܕܫܸܡܥܘܿܢ: ܝܲܡܘܼܐܹܝܠ، ܝܵܡܹܝܢ، ܐܵܗܵܕ، ܝܵܟ݂ܝܼܢ، ܨܵܚܵܪ، ܘܫܵܐܘܿܠ ܒܪܘܿܢܵܐ ܕܟܢܲܥܢܵܝܬܵܐ؛ ܐܲܢܹܐ ܝܢܵܐ ܫܲܪ̈ܒܵܬܹܐ ܕܫܸܡܥܘܿܢ. 16ܘܐܲܢܹܐ ܝܢܵܐ ܫܸܡܵܢܹ̈ܐ ܕܒܢܘܿܢܹ̈ܐ ܕܠܹܘܝܼ ܒܫܲܪ̈ܒܵܬܲܝܗܝ: ܓܸܪܫܘܿܢ، ܩܵܗܵܬ، ܡܪܵܪܝܼ. ܘܫܸܢܹ̈ܐ ܕܚܲܝܹ̈ܐ ܕܠܹܘܝܼ ܐܸܡܵܐܐ ܘܬܠܵܬܝܼ ܘܫܒܲܥ ܫܸܢܹ̈ܐ ܝܗ݇ܘܵܘ. 17ܘܐܲܢܹܐ ܝܢܵܐ ܒܢܘܿܢܹ̈ܐ ܕܓܸܪܫܘܿܢ ܒܫܲܪ̈ܒܵܬܲܝܗܝ: ܠܸܒ݂ܢܝܼ ܘܫܲܡܥܝܼ. 18ܘܐܲܢܹܐ ܝܢܵܐ ܒܢܘܿܢܹ̈ܐ ܕܩܵܗܵܬ: ܥܲܡܪܲܡ، ܝܸܨܗܵܪ، ܚܸܒ݂ܪܘܿܢ، ܘܥܘܼܙܝܼܐܹܝܠ. ܘܫܸܢܹ̈ܐ ܕܚܲܝܹ̈ܐ ܕܩܵܗܵܬ ܐܸܡܵܐܐ ܘܬܠܵܬܝܼ ܘܬܠܵܬ ܫܸܢܹ̈ܐ ܝܗ݇ܘܵܘ. 19ܘܐܲܢܹܐ ܝܢܵܐ ܒܢܘܿܢܹ̈ܐ ܕܡܪܵܪܝܼ: ܡܲܚܠܝܼ ܘܡܘܼܫܝܼ. ܐܲܢܹܐ ܝܢܵܐ ܫܲܪ̈ܒܵܬܹܐ ܕܠܹܘܝܼ ܒܬܵܘܠܕܵܬܲܝ̈ܗܝ. 20ܫܩܝܼܠ ܠܹܗ ܥܲܡܪܲܡ ܠܝܘܼܟ݂ܵܒܵܕ ܥܲܡܬܹܗ ܐܸܠܹܗ ܠܒܲܟ݂ܬܵܐ، ܘܝ݇ܠܝܼܕ ܠܵܗ̇ ܐܸܠܹܗ ܠܐܲܗܪܘܿܢ ܘܠܡܘܼܫܹܐ. ܘܫܸܢܹ̈ܐ ܕܚܲܝܹ̈ܐ ܕܥܲܡܪܲܡ ܐܸܡܵܐܐ ܘܬܠܵܬܝܼ ܘܫܒܲܥ ܫܸܢܹ̈ܐ ܝܗ݇ܘܵܘ. 21ܘܐܲܢܹܐ ܝܢܵܐ ܒܢܘܿܢܹ̈ܐ ܕܝܸܨܗܵܪ: ܩܘܿܪܚ، ܢܵܦܵܓ݂، ܘܙܸܟ݂ܪܝܼ. 22ܘܐܲܢܹܐ ܝܢܵܐ ܒܢܘܿܢܹ̈ܐ ܕܥܘܼܙܝܼܐܹܝܠ: ܡܝܼܫܵܐܹܝܠ، ܐܹܠܨܵܦܲܢ، ܘܣܸܬܪܝܼ. 23ܘܫܩܝܼܠ ܠܹܗ ܐܲܗܪܘܿܢ ܠܐܹܠܝܼܫܲܒ݂، ܒܪܵܬܵܐ ܕܥܲܡܝܼܢܵܕܵܒ݂ ܘܚܵܬܵܐ ܕܢܸܚܫܘܿܢ ܐܸܠܹܗ ܠܒܲܟ݂ܬܵܐ؛ ܘܝ݇ܠܝܼܕ ܠܵܗ̇ ܐܸܠܹܗ ܠܢܵܕܵܒ݂، ܠܐܲܒ݂ܝܼܗܘܿ، ܠܐܹܠܝܼܥܵܙܲܪ، ܘܠܐܝܼܬܵܡܵܪ. 24ܘܐܲܢܹܐ ܝܢܵܐ ܒܢܘܿܢܹ̈ܐ ܕܩܘܿܪܚ: ܐܵܣܝܼܪ، ܐܹܝܠܩܵܢܵܐ، ܘܐܲܒ݂ܝܼܐܵܣܵܦ. ܐܲܢܹܐ ܝܢܵܐ ܫܲܪ̈ܒܵܬܹܐ ܕܩܘܿܪ̈ܚܵܝܹܐ. 25ܐܹܠܝܼܥܵܙܲܪ ܒܪܘܿܢܵܐ ܕܐܲܗܪܘܿܢ ܫܩܝܼܠ ܠܹܗ ܐܸܠܹܗ ܠܒܲܟ݂ܬܵܐ ܡ̣ܢ ܒܢܵܬܹ̈ܐ ܕܦܘܼܛܝܼܐܹܝܠ، ܘܝ݇ܠܝܼܕ ܠܵܗ̇ ܐܸܠܹܗ ܠܦܝܼܢܚܸܣ. ܐܲܢܹܐ ܝܢܵܐ ܪܹ̈ܫܵܢܹܐ ܒܵܬܹ̈ܐ ܕܒܵܒܵܘܵܬܹ̈ܐ ܕܠܹܘܵܝܹ̈ܐ ܒܫܲܪ̈ܒܵܬܲܝܗܝ.
26ܗܲܪ ܐܲܢܹܐ ܝܗ݇ܘܵܘ ܐܲܗܪܘܿܢ ܘܡܘܼܫܹܐ ܕܐ݇ܡܝܼܪܹܗ ܡܵܪܝܵܐ ܐܸܠܲܝܗܝ، ”ܦܲܠܛܘܼܢ ܠܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ ܒܚܲܝܠܵܘܵܬܲܝ̈ܗܝ.“ 27ܐܲܢܹܐ ܝܗ݇ܘܵܘ ܕܗܘܼܡܙܸܡ ܠܗܘܿܢ ܥܲܡ ܦܸܪܥܘܿܢ ܡܲܠܟܵܐ ܕܡܸܨܪܹܝܢ. ܐܲܢܹܐ ܝܢܵܐ ܡܘܼܫܹܐ ܘܐܲܗܪܘܿܢ. 28ܒܝܵܘܡܵܐ ܕܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܒܐܲܪܥܵܐ ܕܡܸܨܪܹܝܢ، 29ܐ݇ܡܝܼܪܹܗ ܐܸܠܹܗ، ”ܐܵܢܵܐ ܝܘܸܢ ܡܵܪܝܵܐ؛ ܐ݇ܡܘܿܪ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ ܟܠ ܡܸܢܕܝܼ ܕܐܵܢܵܐ ܗܘܼܡܙܸܡ ܠܝܼ ܥܲܡܘܼܟ݂.“ 30ܐ݇ܡܝܼܪܹܗ ܡܘܼܫܹܐ ܠܡܵܪܝܵܐ، ”ܐܵܢܵܐ ܠܹܐ ܝܘܸܢ ܡܲܠܵܠܵܐ؛ ܕܵܐܟ݂ܝܼ ܒܸܬ ܫܵܡܹܥ ܦܸܪܥܘܿܢ ܐܸܠܝܼ؟“
Currently Selected:
ܡܦܩܢܐ 6: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
