ܡܦܩܢܐ 3

ܐܲܠܵܗܵܐ ܦܝܵܫܵܐ ܚܸܙܝܵܐ ܠܡܘܼܫܹܐ ܓܵܘ ܣܲܢܝܵܐ

1ܘܡܘܼܫܹܐ ܡܲܪܥܘܼܝܹܐ ܝܗ݇ܘܵܐ ܥܸܪ̈ܒܹܐ ܕܝܲܬܪܘܿܢ ܚܸܡܝܵܢܹܗ، ܟܵܗܢܵܐ ܕܡܸܕܝܲܢ، ܘܠܘܼܒܸܠ ܠܹܗ ܠܥܸܪ̈ܒܹܐ ܒܵܬ݇ܪ ܚܲܨܵܐ ܕܒܲܪܝܼܵܐ، ܘܐ݇ܬܹܐ ܠܹܗ ܠܚܘܿܪܝܼܒ݂، ܛܘܼܪܵܐ ܕܐܲܠܵܗܵܐ. 2ܦܝܼܫ ܠܹܗ ܚܸܙܝܵܐ ܐܸܠܹܗ ܡܲܠܲܐܟ݂ܵܐ ܕܡܵܪܝܵܐ ܡ̣ܢ ܓܵܘ ܠܵܗܵܐ ܕܢܘܼܪܵܐ ܒܹܐܣܵܩܵܐ ܡ̣ܢ ܚܲܕ ܣܲܢܝܵܐ؛ ܓܘܼܫܸܩ ܠܹܗ ܘܚܙܹܐ ܠܹܗ ܢܘܼܪܵܐ ܒܣܲܢܝܵܐ، ܐܝܼܢܵܐ ܣܲܢܝܵܐ ܠܵܐ ܒܸܩܝܵܕܵܐ. 3ܘܐ݇ܡܝܼܪܹܗ ܠܟܸܣ ܓܵܢܹܗ ܡܘܼܫܹܐ، ”ܒܸܬ ܦܵܬܠܹܢ ܘܚܵܙܹܝܢ ܐܵܗܵܐ ܚܸܙܘܵܐ ܓܘܼܪܵܐ، ܩܵܡܘܿܕܝܼ ܠܹܐ ܝܠܹܗ ܒܸܩܝܵܕܵܐ ܣܲܢܝܵܐ.“ 4ܚܙܹܐ ܠܹܗ ܡܵܪܝܵܐ ܕܦܬܝܼܠ ܠܹܗ ܠܓܲܫܘܼܩܹܐ، ܘܩܪܹܐ ܠܹܗ ܐܸܠܹܗ ܐܲܠܵܗܵܐ ܡ̣ܢ ܓܵܘ ܣܲܢܝܵܐ، ܘܐ݇ܡܝܼܪܹܗ، ”ܡܘܼܫܹܐ، ܡܘܼܫܹܐ.“ ܓ̰ܘܼܘܸܒ ܠܹܗ، ”ܗܵܐ ܐܵܢܵܐ.“ 5ܐ݇ܡܝܼܪܹܗ ܐܸܠܹܗ ܐܲܠܵܗܵܐ، ”ܠܵܐ ܩܲܪܒܸܢܸܬ ܠܐܲܟ݂ܵܐ. ܫܲܠܸܚ ܨܵܘܠܘܼ̈ܟ݂ ܡ̣ܢ ܐܲܩܠܘܼ̈ܟ݂، ܣܵܒܵܒ ܕܘܼܟܵܐ ܕܟܸܠܝܵܐ ܝܘܸܬ ܥܲܠܘܼܗ̇ ܐܲܪܥܵܐ ܩܲܕܝܼܫܬܵܐ ܝܠܵܗ̇.“ 6ܗ̇ܝܓܵܗ ܐ݇ܡܝܼܪܹܗ، ”ܐܵܢܵܐ ܝܘܸܢ ܐܲܠܵܗܵܐ ܕܒܵܒܘܼܟ݂، ܐܲܠܵܗܵܐ ܕܐܲܒ݂ܪܵܗܵܡ، ܐܲܠܵܗܵܐ ܕܐܝܼܣܚܵܩ، ܘܐܲܠܵܗܵܐ ܕܝܲܥܩܘܿܒ݂.“ ܘܛܘܼܫܝܵܐ ܠܹܗ ܦܵܬܹܗ ܡܘܼܫܹܐ، ܣܵܒܵܒ ܙܕܝܼܥ ܠܹܗ ܡ̣ܢ ܠܸܚܝܵܪܵܐ ܠܐܲܠܵܗܵܐ.

ܡܵܪܝܵܐ ܒܸܟ̰ܝܵܕܵܐ ܠܡܘܼܫܹܐ

7ܘܐ݇ܡܝܼܪܹܗ ܡܵܪܝܵܐ، ”ܚܙܵܝܵܐ ܚܙܹܐ ܠܝܼ ܠܐܘܼܠܨܵܢܵܐ ܕܥܲܡܝܼ ܕܝܼܠܹܗ ܒܡܸܨܪܹܝܢ، ܘܫܡܝܼܥ ܠܝܼ ܡܲܩܘܲܚܬܲܝܗܝ ܡ̣ܢ ܡܲܦܠܸܚܵܢܲܝ̈ܗܝ ܕܫܘܼܚܪܵܐ؛ ܒܝܼܕܵܥܵܐ ܝܘܸܢ ܓ̰ܘܼܢܓ̰ܵܪ̈ܲܝܗܝ. 8ܘܨܸܠܝܵܐ ܝܘܸܢ ܕܦܲܨܸܝܢܗܘܿܢ ܡ̣ܢ ܐܝܼܕܵܐ ܕܡܸܨܪ̈ܵܝܹܐ، ܘܕܡܲܐܣܩܸܢܗܘܿܢ ܡ̣ܢ ܕܐܵܗܵܐ ܐܲܪܥܵܐ ܠܐܲܪܥܵܐ ܨܦܵܝܝܼ ܘܪܘܝܼܚܬܵܐ، ܠܐܲܪܥܵܐ ܡܲܓ̰ܪܝܼܵܢܬܵܐ ܕܚܲܠܒ݂ܵܐ ܘܕܸܒ݂ܫܵܐ، ܠܕܘܼܟܵܐ ܕܟܢܲܥܢܵܝܹ̈ܐ، ܘܚܹܝܬܵܝܹ̈ܐ، ܘܐܵܡܘܿܪ̈ܵܝܹܐ، ܘܦܲܪ̈ܙܵܝܹܐ، ܘܚܵܘܵܝܹ̈ܐ، ܘܝܵܒ݂ܘܿܣܵܝܹ̈ܐ. 9ܐܵܕܝܼܵܐ ܡܲܩܘܲܚܬܵܐ ܕܒܢܲܝ̈ ܝܼܣܪܵܝܹܠ ܡܛܹܐ ܠܵܗ̇ ܠܟܸܣ ܠܝܼ، ܘܐܘܼܦ ܚܙܹܐ ܠܝܼ ܕܵܐܟ݂ܝܼ ܡܸܨܪ̈ܵܝܹܐ ܡܲܠܝܘܼܨܹܐ ܝܢܵܐ ܐܸܠܲܝܗܝ. 10ܬܵܐ ܐܵܕܝܼܵܐ، ܒܸܬ ܫܲܕܪܸܢܘܼܟ݂ ܠܟܸܣ ܦܸܪܥܘܿܢ ܕܦܲܠܛܸܬ ܠܥܲܡܝܼ ܒܢܲܝ̈ ܝܼܣܪܵܝܹܠ ܡ̣ܢ ܡܸܨܪܹܝܢ.“

11ܐܝܼܢܵܐ ܐ݇ܡܝܼܪܹܗ ܡܘܼܫܹܐ ܠܐܲܠܵܗܵܐ، ”ܡܵܢܝܼ ܝܘܸܢ ܐܵܢܵܐ ܕܐܵܙܹܠ݇ܢ ܠܟܸܣ ܦܸܪܥܘܿܢ، ܘܕܦܲܠܛܸܢ ܠܒܢܲܝ̈ ܝܼܣܪܵܝܹܠ ܡ̣ܢ ܡܸܨܪܹܝܢ؟“ 12ܐ݇ܡܝܼܪܹܗ ܐܲܠܵܗܵܐ، ”ܐܵܢܵܐ ܒܸܬ ܗܵܘܹܝܢ ܥܲܡܘܼܟ݂؛ ܘܐܵܗܵܐ ܒܸܬ ܗܵܘܹܐ ܢܝܼܫܲܢܩܵܐ ܐܸܠܘܼܟ݂ ܕܐܵܢܵܐ ܫܘܼܕܪܘܼܟ݂ ܝܼܘܸܢ: ܐܝܼܡܲܢ ܕܦܲܠܛܸܬ ܠܥܲܡܵܐ ܡ̣ܢ ܡܸܨܪܹܝܢ، ܒܸܬ ܦܵܠܚܝܼܬܘܿܢ ܠܐܲܠܵܗܵܐ ܥܲܠ ܕܐܵܗܵܐ ܛܘܼܪܵܐ.“ 13ܘܐ݇ܡܝܼܪܹܗ ܡܘܼܫܹܐ ܠܐܲܠܵܗܵܐ، ”ܐܸܢ ܐܵܙܹܠ݇ܢ ܠܟܸܣ ܒܢܲܝ̈ ܝܼܣܪܵܝܹܠ ܘܐܵܡܪܹܢ ܐܸܠܲܝܗܝ، ’ܐܲܠܵܗܵܐ ܕܒܵܒܵܘܵܬܵܘ̈ܟ݂ܘܿܢ ܫܘܼܕܪܝܼ ܝܠܹܗ ܠܟܸܣ ܠܵܘܟ݂ܘܿܢ،‘ ܘܒܲܩܪܝܼ ܠܝܼ، ’ܡܘܿܕܝܼ ܝܠܹܗ ܫܸܡܹܗ؟‘ ܡܘܿܕܝܼ ܐܵܡܪܹܢ ܐܸܠܲܝܗܝ؟“ 14ܐ݇ܡܝܼܪܹܗ ܐܲܠܵܗܵܐ ܠܡܘܼܫܹܐ، ”ܐܵܢܵܐ ܝܘܸܢ ܗ̇ܘ ܕܝܼܘܸܢ،“ ܘܐ݇ܡܝܼܪܹܗ، ”ܗܲܕܟ݂ܵܐ ܐܵܡܪܹܬ ܠܒܢܲܝ̈ ܝܼܣܪܵܝܹܠ، ’”ܐܵܢܵܐ ܝܘܸܢ“ ܫܘܼܕܸܪܹܗ ܐܸܠܝܼ ܠܟܸܣ ܠܵܘܟ݂ܘܿܢ.‘“ 15ܡܸܢܕܪܸܫ ܐ݇ܡܝܼܪܹܗ ܐܲܠܵܗܵܐ ܠܡܘܼܫܹܐ، ”ܗܲܕܟ݂ܵܐ ܐܵܡܪܹܬ ܠܒܢܲܝ̈ ܝܼܣܪܵܝܹܠ، ’ܡܵܪܝܵܐ، ܕܝܼܠܹܗ ܐܲܠܵܗܵܐ ܕܒܵܒܵܘܵܬܵܘ̈ܟ݂ܘܿܢ، ܐܲܠܵܗܵܐ ܕܐܲܒ݂ܪܵܗܵܡ، ܐܲܠܵܗܵܐ ܕܐܝܼܣܚܵܩ ܘܐܲܠܵܗܵܐ ܕܝܲܥܩܘܿܒ݂، ܫܘܼܕܸܪܹܗ ܐܸܠܝܼ ܠܟܸܣ ܠܵܘܟ݂ܘܿܢ؛ ܐܵܗܵܐ ܝܠܹܗ ܫܸܡܝܼ ܠܥܵܠܲܡ، ܘܐܵܗܵܐ ܝܠܹܗ ܕܟ݂ܵܪܝܼ ܡ̣ܢ ܕܵܘܪܵܐ ܠܕܵܘܪܵܐ.‘ 16ܙܹܠ݇ ܘܓ̰ܲܡܸܥ ܠܚܘܵܪ̈ܕܸܩܢܹܐ ܕܝܼܣܪܵܝܹܠ، ܘܐ݇ܡܘܿܪ ܐܸܠܲܝܗܝ، ’ܡܵܪܝܵܐ، ܐܲܠܵܗܵܐ ܕܒܵܒܵܘܵܬܵܘ̈ܟ݂ܘܿܢ، ܐܲܠܵܗܵܐ ܕܐܲܒ݂ܪܵܗܵܡ، ܕܐܝܼܣܚܵܩ، ܘܕܝܲܥܩܘܿܒ݂، ܦܝܼܫ ܠܹܗ ܚܸܙܝܵܐ ܐܸܠܝܼ، ܒܹܐܡܵܪܵܐ، ”ܣܲܚܒܘܼܪܹܐ ܣܘܼܚܒܸܪܝܼ ܐܸܠܵܘܟ݂ܘܿܢ، ܘܝ݇ܕܝܼܥ ܠܝܼ ܡܸܢܕܝܼ ܕܦܝܼܫܵܐ ܝܠܹܗ ܥܒ݂ܝܼܕܵܐ ܐܸܠܵܘܟ݂ܘܿܢ ܒܡܸܨܪܹܝܢ، 17ܘܐ݇ܡܝܼܪܝܼ، ’ܒܸܬ ܡܲܐܣܩܸܢܗܘܿܢ ܡ̣ܢ ܐܘܼܠܨܵܢܵܐ ܕܡܸܨܪܹܝܢ ܠܐܲܪܥܵܐ ܕܟܢܲܥܢܵܝܹ̈ܐ، ܘܚܹܝܬܵܝܹ̈ܐ، ܘܐܵܡܘܿܪ̈ܵܝܹܐ، ܘܦܲܪ̈ܙܵܝܹܐ، ܘܚܵܘܵܝܹ̈ܐ، ܘܝܵܒ݂ܘܿܣܵܝܹ̈ܐ، ܠܐܲܪܥܵܐ ܡܲܓ̰ܪܝܼܵܢܬܵܐ ܕܚܲܠܒ݂ܵܐ ܘܕܸܒ݂ܫܵܐ.‘“‘ 18ܘܒܸܬ ܫܵܡܥܝܼ ܠܩܵܠܘܼܟ݂؛ ܘܒܸܬ ܐܵܙܹܠ݇ܬ ܐܲܢ݇ܬ ܘܚܘܵܪ̈ܕܸܩܢܹܐ ܕܝܼܣܪܵܝܹܠ ܠܟܸܣ ܡܲܠܟܵܐ ܕܡܸܨܪܹܝܢ ܘܐܵܡܪܝܼܬܘܿܢ ܐܸܠܹܗ، ’ܡܵܪܝܵܐ، ܐܲܠܵܗܵܐ ܕܥܸܒ݂ܪ̈ܵܝܹܐ، ܬܦܝܼܩ ܠܹܗ ܒܝܼܲܢ؛ ܘܐܵܕܝܼܵܐ ܦܲܪܦܘܼܠܹܐ ܝܘܲܚ، ܕܫܵܒ݂ܩܹܬ ܐܵܙܲܠ݇ܚ ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ ܓܵܘ ܒܲܪܝܼܵܐ، ܕܥܵܒ݂ܕܲܚ ܕܸܒ݂ܚܵܐ ܠܡܵܪܝܵܐ ܐܲܠܵܗܲܢ.‘ 19ܐܵܢܵܐ ܒܝܼܕܵܥܵܐ ܝܘܸܢ ܕܡܲܠܟܵܐ ܕܡܸܨܪܹܝܢ ܠܹܐ ܫܵܒܹܩ ܕܦܵܠܛܝܼܬܘܿܢ، ܐܸܠܵܐ ܕܦܵܐܹܫ ܥܸܨܝܵܐ ܒܐܝܼܕܵܐ ܚܲܝܠܵܢܬܵܐ. 20ܗܲܕܟ݂ܵܐ ܒܸܬ ܦܲܫܛܸܢ ܐܝܼܕܝܼ ܘܒܸܬ ܡܵܚܹܝܢ ܠܡܸܨܪܹܝܢ ܒܟܠܲܝܗܝ ܕܘܼܡܵܪܹ̈ܐ ܕܒܸܬ ܥܵܒ݂ܕܹܢ ܓܵܘܘܼܗ̇؛ ܡ̣ܢ ܒܵܬ݇ܪ ܗܵܕܵܐ ܒܸܬ ܫܵܒܹܩ ܕܐܵܙܠ݇ܝܼܬܘܿܢ. 21ܘܒܸܬ ܝܵܗ݇ܒܹܢ ܪ̈ܲܚܡܹܐ ܠܐܵܗܵܐ ܥܲܡܵܐ ܒܥܲܝܢܹ̈ܐ ܕܡܸܨܪ̈ܵܝܹܐ؛ ܘܐܝܼܡܲܢ ܕܐܵܙܠ݇ܝܼܬܘܿܢ، ܠܹܐ ܐܵܙܠ݇ܝܼܬܘܿܢ ܣܦܝܼܩܹ̈ܐ. 22ܟܠ ܒܲܟ݂ܬܵܐ ܥܸܒ݂ܪܵܝܬܵܐ ܒܸܬ ܛܵܠܒܵܐ ܡ̣ܢ ܫܒ݂ܵܒ݂ܬܘܼܗ̇ ܡܸܨܪܵܝܬܵܐ، ܘܡ̣ܢ ܗ̇ܝ ܕܝܼܠܵܗ̇ ܒܸܥܡܵܪܵܐ ܒܒܲܝܬܘܼܗ̇، ܡܵܐܢܹ̈ܐ ܕܣܹܐܡܵܐ ܘܕܕܲܗܒ݂ܵܐ، ܘܓ̰ܘܼܠܹ̈ܐ؛ ܘܡܲܠܒܸܫܝܼܬܘܿܢ ܠܗܘܿܢ ܥܲܠ ܒܢܘܿܢܵܘ̈ܟ݂ܘܿܢ ܘܒܢܵܬܵܘ̈ܟ݂ܘܿܢ؛ ܘܒܸܬ ܣܵܠܒܝܼܬܘܿܢ ܠܡܸܨܪ̈ܵܝܹܐ.“

Currently Selected:

ܡܦܩܢܐ 3: ABTAB

Highlight

Copy

Compare