ܡܦܩܢܐ 2

ܗ݇ܘܵܝܬܵܐ ܕܡܘܼܫܹܐ

1ܓܒ݂ܝܼܪܹܗ ܚܲܕ ܠܹܘܵܝܵܐ ܠܚܕܵܐ ܒܪܵܬܵܐ ܡ̣ܢ ܒܲܝܬܵܐ ܕܠܹܘܝܼ. 2ܘܒܛܝܼܢܵܗ̇ ܒܲܟ݂ܬܵܐ ܘܝ݇ܠܝܼܕ ܠܵܗ̇ ܒܪܘܿܢܵܐ. ܟܲܕ ܚܙܹܐ ܠܵܗ̇ ܕܫܲܦܝܼܪܵܐ ܝܗ݇ܘܵܐ، ܛܘܼܫܹܐ ܠܵܗ̇ ܐܸܠܹܗ ܬܠܵܬܵܐ ܝܲܪ̈ܚܹܐ. 3ܐܝܼܢܵܐ ܐܝܼܡܲܢ ܕܠܵܐ ܡܨܹܐ ܠܵܗ̇ ܠܛܲܫܘܼܝܹܗ ܒܘܼܫ ܙܵܘܕܵܐ، ܬܘܼܪܸܨ ܠܵܗ̇ ܐܸܠܹܗ ܣܵܠܵܐ ܡ̣ܢ ܦܵܦܹܪܘܿܢ، ܘܫܝܼܥܵܐ ܠܵܗ̇ ܒܟܘܼܦܪܵܐ ܘܒܩܝܼܪ، ܘܡܘܼܕܡܸܟ݂ ܠܵܗ̇ ܓܵܘܘܼܗ̇ ܠܝܵܠܵܕ݇ܐ، ܘܡܘܼܬܸܒ݂ ܠܵܗ̇ ܓܵܘ ܙܹܠܹ̈ܐ ܥܲܠ ܣܸܦܬܵܐ ܕܢܲܗܪܵܐ. 4ܘܟܠܹܐ ܠܵܗ̇ ܚܵܬܹܗ ܡ̣ܢ ܪܸܚܩܵܐ ܕܝܵܕܥܵܐ ܡܘܿܕܝܼ ܒܸܬ ܗܵܘܹܐ ܗ݇ܘܵܐ ܐܸܠܹܗ.

5ܘܨܠܹܐ ܠܵܗ̇ ܒܪܵܬܵܐ ܕܦܸܪܥܘܿܢ ܠܸܣܚܵܝܵܐ ܓܵܘ ܢܲܗܪܵܐ، ܘܚܹܕܲܡܝܵܬܘܼ̈ܗ̇ ܒܸܚܕܵܪܵܐ ܝܗ݇ܘܵܘ ܥܲܠ ܡܲܪܙܵܐ ܕܢܲܗܪܵܐ. ܚܙܹܐ ܠܵܗ̇ ܠܣܵܠܵܐ ܓܵܘ ܙܹܠܹ̈ܐ، ܘܫܘܼܕܸܪܵܗ̇ ܠܚܹܕܲܡܬܘܼܗ̇ ܕܫܵܩܠܵܐ ܠܵܗ̇.

6ܦܬܝܼܚ ܠܵܗ̇ ܘܚܙܹܐ ܠܵܗ̇ ܠܝܵܠܵܕ݇ܐ ܒܸܒܟ݂ܵܝܵܐ. ܝ݇ܩܝܼܕ ܠܹܗ ܠܸܒܘܼܗ̇ ܒܝܼܹܗ، ܘܐ݇ܡܝܼܪܵܗ̇، ”ܡ̣ܢ ܝܵܠܹ̈ܕ݇ܐ ܕܥܸܒ݂ܪ̈ܵܝܹܐ ܝܠܹܗ ܐܵܗܵܐ.“ 7ܐ݇ܡܝܼܪܵܗ̇ ܚܵܬܹܗ ܠܒܪܵܬܵܐ ܕܦܸܪܥܘܿܢ، ”ܐܵܙܵܠ݇ܢ ܘܩܵܪܝܵܢ ܐܸܠܵܟ݂ܝ ܒܲܟ݂ܬܵܐ ܡܲܡܸܨܵܢܬܵܐ ܡ̣ܢ ܒܲܟ݂ܬܵܬܹ̈ܐ ܥܸܒ݂ܪ̈ܵܝܹܐ ܕܡܲܡܸܨܵܐ ܐܵܗܵܐ ܝܵܠܵܕ݇ܐ ܐܸܠܵܟ݂ܝ؟“ 8ܐ݇ܡܝܼܪܵܗ̇ ܐܸܠܘܼܗ̇ ܒܪܵܬܵܐ ܕܦܸܪܥܘܿܢ، ”ܙܹܠ݇.“ ܘܐ݇ܙܝܼܠ ܠܵܗ̇ ܗ̇ܝ ܚܵܡܬܵܐ ܘܩܪܹܐ ܠܵܗ̇ ܠܝܸܡܵܐ ܕܝܵܠܵܕ݇ܐ. 9ܐ݇ܡܝܼܪܵܗ̇ ܐܸܠܘܼܗ̇ ܒܪܵܬܵܐ ܕܦܸܪܥܘܿܢ، ”ܠܲܒܸܠܝ ܠܐܵܗܵܐ ܝܵܠܵܕ݇ܐ ܘܡܲܡܸܨ ܠܹܗ ܐܸܠܝܼ، ܘܐܵܢܵܐ ܒܸܬ ܦܵܪܥܵܢܵܟ݂ܝ.“ ܘܫܩܝܼܠ ܠܵܗ̇ ܗ̇ܝ ܒܲܟ݂ܬܵܐ ܠܝܵܠܵܕ݇ܐ ܘܡܘܼܡܸܨ ܠܵܗ̇ ܐܸܠܹܗ. 10ܓܘܼܪܘܸܣ ܠܹܗ ܗ̇ܘ ܝܵܠܵܕ݇ܐ، ܘܡܘܼܐܬܹܐ ܠܵܗ̇ ܐܸܠܹܗ ܩܵܐ ܒܪܵܬܵܐ ܕܦܸܪܥܘܿܢ، ܘܗܘܹܐ ܠܹܗ ܐܸܠܘܼܗ̇ ܠܒܪܘܿܢܵܐ؛ ܘܩܪܹܐ ܠܵܗ̇ ܫܸܡܹܗ ܡܘܼܫܹܐ،#2‏:10 ܫܸܡܵܐ ܕܡܘܼܫܹܐ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܓܵܪܹܫ (ܡ̣ܢ ܓܵܘ ܡ̈ܝܼܵܐ) ܒܠܸܫܵܢܵܐ ܕܥܸܒ݂ܪ̈ܵܝܹܐ ܣܵܒܵܒ ܐ݇ܡܝܼܪܵܗ̇، ”ܓܪܝܼܫ ܠܝܼ ܐܸܠܹܗ ܡ̣ܢ ܡ̈ܝܼܵܐ.“

ܡܘܼܫܹܐ ܒܸܩܛܵܠܵܐ ܡܸܨܪܵܝܵܐ

11ܗܘܹܐ ܠܵܗ̇ ܒܐܵܢܝܼ ܝܵܘܡܵܢܹ̈ܐ، ܟܲܕ ܓܘܼܪܘܸܣ ܠܹܗ ܡܘܼܫܹܐ، ܦܠܝܼܛ ܠܹܗ ܠܟܸܣ ܐܲܚܘܿܢܘܵܬܹ̈ܗ، ܘܚܙܹܐ ܠܹܗ ܩܸܫܝܘܼܬܵܐ ܕܦܘܼܠܚܵܢܲܝܗܝ؛ ܘܚܙܹܐ ܠܹܗ ܐ݇ܢܵܫܵܐ ܡܸܨܪܵܝܵܐ ܒܸܡܚܵܝܵܐ ܠܚܲܕ ܐ݇ܢܵܫܵܐ ܥܸܒ݂ܪܵܝܵܐ ܡ̣ܢ ܐܲܚܘܿܢܘܵܬܹ̈ܗ. 12ܓܘܼܫܸܩ ܠܹܗ ܠܐܵܗܵܐ ܓܹܒܵܐ ܘܠܗ̇ܘ ܓܹܒܵܐ، ܘܟܲܕ ܠܵܐ ܚܙܹܐ ܠܹܗ ܐ݇ܢܵܫܵܐ ܐ݇ܚܹܪ݇ܢܵܐ ܬܵܡܵܐ، ܩܛܝܼܠ ܠܹܗ ܠܗ̇ܘ ܡܸܨܪܵܝܵܐ ܘܛܘܼܡܸܪܹܗ ܐܸܠܹܗ ܓܵܘ ܣܹܠܵܐ. 13ܦܠܝܼܛ ܠܹܗ ܒܝܵܘܡܵܐ ܕܬܪܹܝ، ܘܗܵܐ، ܬܪܹܝ ܐ݇ܢܵܫܹ̈ܐ ܥܸܒ݂ܪ̈ܵܝܹܐ ܒܸܦܠܵܫܵܐ، ܘܐ݇ܡܝܼܪܹܗ ܠܥܵܒ݂ܕܵܢܵܐ ܕܓܢܵܗܵܐ، ”ܩܵܡܘܿܕܝܼ ܒܸܡܚܵܝܵܐ ܝܘܸܬ ܠܚܲܒ݂ܪܘܼܟ݂؟“ 14ܓ̰ܘܼܘܸܒ ܠܹܗ ܗ̇ܘ، ”ܡܵܢܝܼ ܩܲܡ ܡܲܬܸܒ݂ ܠܘܼܟ݂ ܥܲܠܲܢ ܪܹܫܵܐ ܘܕܲܝܵܢܵܐ؟ ܒܵܥܹܝܬ ܩܵܛܠܹܬ ܐܘܼܦ ܐܸܠܝܼ ܐܲܝܟ݂ ܕܩܛܝܼܠ ܠܘܼܟ݂ ܠܡܸܨܪܵܝܵܐ؟“ ܙܕܝܼܥ ܠܹܗ ܡܘܼܫܹܐ ܘܐ݇ܡܝܼܪܹܗ ܠܟܸܣ ܓܵܢܹܗ، ”ܫܲܪܝܼܪܵܐܝܼܬ ܦܝܼܫ ܠܹܗ ܝ݇ܕܝܼܥܵܐ ܐܵܗܵܐ ܫܘܼܠܵܐ.“ 15ܟܲܕ ܚܒܝܼܪܹܗ ܦܸܪܥܘܿܢ ܒܐܵܗܵܐ ܫܘܼܠܵܐ، ܒܥܹܐ ܠܹܗ ܠܸܩܛܵܠܵܐ ܠܡܘܼܫܹܐ. ܐܝܼܢܵܐ ܡܘܼܫܹܐ ܥܪܝܼܩ ܠܹܗ ܡ̣ܢ ܩܵܕ݇ܡ ܦܸܪܥܘܿܢ، ܐ݇ܙܝܼܠ ܠܹܗ ܠܐܲܪܥܵܐ ܕܡܸܕܝܲܢ ܘܝ݇ܬܝܼܒ݂ ܠܹܗ ܒܕܸܦܢܵܐ ܕܚܲܕ ܒܹܐܪܵܐ.

ܡܘܼܫܹܐ ܓܵܘ ܡܸܕܝܲܢ

16ܟܵܗܢܵܐ ܕܡܸܕܝܲܢ ܐܝܼܬ ܗ݇ܘܵܐ ܠܹܗ ܫܒܲܥ ܒܢܵܬܹ̈ܐ. ܐ݇ܬܹܐ ܠܗܘܿܢ ܘܓܪܝܼܫ ܠܗܘܿܢ ܡ̈ܝܼܵܐ، ܘܡܠܹܐ ܠܗܘܿܢ ܚܵܘܕܹ̈ܐ ܠܡܲܫܬܘܼܝܹܐ ܦܸܣܩܵܐ ܕܒܵܒܲܝܗܝ. 17ܐ݇ܬܹܐ ܠܗܘܿܢ ܪ̈ܵܥܝܹܐ ܘܛܪܝܼܕܲܝ ܠܗܘܿܢ، ܐܝܼܢܵܐ ܩܝܼܡ ܠܹܗ ܡܘܼܫܹܐ ܘܗܘܼܝܸܪܲܝ ܠܹܗ ܘܡܘܼܫܬܹܐ ܠܹܗ ܠܦܸܣܩܲܝܗܝ. 18ܟܲܕ ܕܝܼܪܗܘܿܢ ܠܟܸܣ ܒܵܒܲܝܗܝ ܪܥܘܼܐܹܝܠ، ܒܘܼܩܸܪܹܗ ܡܸܢܲܝܗܝ، ”ܕܵܐܟ݂ܝܼ ܝܠܵܗ̇ ܕܐܸܕܝܘܿܡ ܓ̰ܲܠܕܹܐ ܐ݇ܬܹܐ ܠܵܘܟ݂ܘܿܢ؟“ 19ܓ̰ܘܼܘܸܒ ܠܗܘܿܢ، ”ܐ݇ܢܵܫܵܐ ܡܸܨܪܵܝܵܐ ܩܲܡ ܦܲܨܹܐ ܠܲܢ ܡ̣ܢ ܐܝܼܕܹ̈ܐ ܕܪ̈ܵܥܝܹܐ، ܘܐܘܼܦ ܓܪܝܼܫ ܠܹܗ ܡ̈ܝܼܵܐ ܩܵܬܲܢ، ܘܡܘܼܫܬܹܐ ܠܹܗ ܠܦܸܣܩܵܐ.“ 20ܘܐ݇ܡܝܼܪܹܗ ܠܒܢܵܬܹ̈ܗ، ”ܒܲܣ ܐܲܝܟܵܐ ܝܠܹܗ؟ ܩܵܡܘܿܕܝܼ ܫܒ݂ܝܼܩ ܠܵܘܟ݂ܘܿܢ ܠܗ̇ܘ ܐ݇ܢܵܫܵܐ؟ ܩܪܹܝܡܘܼܢ ܠܹܗ ܕܐܵܟܹܠ ܠܲܚܡܵܐ ܥܲܡܲܢ.“ 21ܘܩܘܼܒܸܠ ܠܹܗ ܡܘܼܫܹܐ ܕܥܵܡܹܪ ܗ݇ܘܵܐ ܠܟܸܣ ܗ̇ܘ ܐ݇ܢܵܫܵܐ، ܘܗ̇ܘ ܝܘܼܗ݇ܒܸܠ ܠܹܗ ܠܨܸܦܘܿܪܵܐ ܒܪܵܬܹܗ ܠܡܘܼܫܹܐ ܠܒܲܟ݂ܬܵܐ. 22ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܹܗ ܫܸܡܹܗ ܓܸܪܫܘܿܡ،#2‏:22 ܥܸܒ݂ܪܵܐܝܼܬ ܒܡܲܥܢܵܝܵܐ ܕܡܵܫܵܚܲܛ ܬܵܡܵܐ ܣܵܒܵܒ ܐ݇ܡܝܼܪܹܗ، ”ܗܘܹܐ ܠܝܼ ܡܵܫܵܚܲܛ ܒܐܲܪܥܵܐ ܢܘܼܟ݂ܪܵܝܬܵܐ.“

23ܗܘܹܐ ܠܵܗ̇ ܡ̣ܢ ܒܵܬ݇ܪ ܪܵܒܵܐ ܝܵܘܡܵܢܹ̈ܐ، ܡܝܼܬ ܠܹܗ ܡܲܠܟܵܐ ܕܡܸܨܪܹܝܢ. ܘܬܘܼܢܸܚ ܠܗܘܿܢ ܒܢܲܝ̈ ܝܼܣܪܵܝܹܠ ܘܡܘܼܩܘܸܚ ܠܗܘܿܢ ܬܚܘܿܬ ܝܘܼܩܪܵܐ ܕܥܲܒ݂ܕܘܼܬܵܐ، ܘܐ݇ܣܝܼܩ ܠܵܗ̇ ܓܥܵܝܬܲܝܗܝ ܠܟܸܣ ܐܲܠܵܗܵܐ. 24ܘܫܡܝܼܥ ܠܹܗ ܐܲܠܵܗܵܐ ܬܵܢܲܚܬܲܝܗܝ، ܘܕܟ݂ܝܼܪܹܗ ܠܘܲܥܕܹܗ ܥܲܡ ܐܲܒ݂ܪܵܗܵܡ، ܥܲܡ ܐܝܼܣܚܵܩ، ܘܥܲܡ ܝܲܥܩܘܿܒ݂. 25ܘܓܘܼܫܸܩ ܠܹܗ ܐܲܠܵܗܵܐ ܠܒܢܲܝ̈ ܝܼܣܪܵܝܹܠ ܘܚܙܹܐ ܠܹܗ ܐܲܝܟܲܢܵܝܘܼܬܲܝܗܝ.

Currently Selected:

ܡܦܩܢܐ 2: ABTAB

Highlight

Copy

Compare