ܡܦܩܢܐ 4
4
ܢܝܼܫܲܢܩܹ̈ܐ ܩܵܐ ܡܘܼܫܹܐ
1ܐ݇ܡܝܼܪܹܗ ܡܘܼܫܹܐ ܠܐܲܠܵܗܵܐ، ”ܡܘܿܕܝܼ ܐܸܢ ܠܵܐ ܗܲܡܸܢܝܼ ܐܸܠܝܼ ܘܠܹܐ ܫܵܡܥܝܼ ܠܩܵܠܝܼ، ܘܐܵܡܪܝܼ، ’ܠܵܐ ܦܝܼܫ ܠܹܗ ܚܸܙܝܵܐ ܐܸܠܘܼܟ݂ ܡܵܪܝܵܐ‘؟“ 2ܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܡܘܿܕܝܼ ܝܠܹܗ ܐܵܗܵܐ ܒܐܝܼܕܘܼܟ݂؟“ ܐ݇ܡܝܼܪܹܗ، ”ܚܘܼܛܪܵܐ.“ 3ܐ݇ܡܝܼܪܹܗ ܡܵܪܝܵܐ، ”ܪܲܦܝܼ ܠܹܗ ܠܐܲܪܥܵܐ.“ ܪܘܼܦܹܐ ܠܹܗ ܠܐܲܪܥܵܐ، ܘܗܘܹܐ ܠܹܗ ܚܘܼܘܹܐ؛ ܘܥܪܝܼܩ ܠܹܗ ܡܘܼܫܹܐ ܡ̣ܢ ܩܵܕ݇ܡܘܼܗܝ. 4ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܦܲܫܸܛ ܐܝܼܕܘܼܟ݂ ܘܕܒ݂ܘܿܩ ܠܹܗ ܒܛܘܼܦܪܹܗ.“ ܘܦܘܼܫܛܵܐ ܠܹܗ ܐܝܼܕܹܗ ܘܕܒ݂ܝܼܩ ܠܹܗ ܒܝܼܹܗ، ܘܗܘܹܐ ܠܹܗ ܚܘܼܛܪܵܐ ܒܐܝܼܕܹܗ. 5ܐ݇ܡܝܼܪܹܗ ܡܵܪܝܵܐ، ”ܒܐܵܗܵܐ ܗܲܡܸܢܝܼ ܕܦܝܼܫ ܠܹܗ ܚܸܙܝܵܐ ܐܸܠܘܼܟ݂ ܐܲܠܵܗܵܐ ܕܒܵܒܵܘܵܬܲܝ̈ܗܝ، ܐܲܠܵܗܵܐ ܕܐܲܒ݂ܪܵܗܵܡ، ܐܲܠܵܗܵܐ ܕܐܝܼܣܚܵܩ ܘܐܲܠܵܗܵܐ ܕܝܲܥܩܘܿܒ݂.“
ܐܝܼܕܹܗ ܦܝܵܫܵܐ ܓܘܼܪܒܸܢܬܵܐ
6ܡܸܢܕܪܸܫ ܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܐܵܕܝܼܵܐ ܡܲܥܒܸܪ ܐܝܼܕܘܼܟ݂ ܓܵܘ ܥܘܼܒܘܼܟ݂.“ ܡܘܼܥܒܸܪܵܐ ܠܹܗ ܐܝܼܕܹܗ ܓܵܘ ܥܘܼܒܹܗ؛ ܘܐܝܼܡܲܢ ܕܦܘܼܠܛܵܐ ܠܹܗ، ܓܘܼܪܒܸܢܬܵܐ ܝܗ݇ܘܵܐ ܚܘܵܪܬܵܐ ܐܲܝܟ݂ ܬܲܠܓܵܐ. 7ܘܐ݇ܡܝܼܪܹܗ، ”ܡܲܕܸܪ ܐܝܼܕܘܼܟ݂ ܠܥܘܼܒܘܼܟ݂.“ ܘܡܘܼܕܸܪܵܐ ܠܹܗ ܐܝܼܕܹܗ ܠܥܘܼܒܹܗ؛ ܘܟܲܕ ܦܘܼܠܛܵܐ ܠܹܗ، ܕܝܼܪܬܵܐ ܝܗ݇ܘܵܐ ܐܲܝܟ݂ ܣܵܗܡܵܐ ܦܝܼܫܵܐ ܕܒܸܣܪܹܗ. 8ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ، ”ܐܸܢ ܠܵܐ ܗܲܡܸܢܝܼ ܒܝܼܘܼܟ݂ ܘܠܵܐ ܫܵܡܥܝܼ ܠܢܝܼܫܲܢܩܵܐ ܩܵܕ݇ܡܵܝܵܐ، ܒܸܬ ܗܲܡܸܢܝܼ ܠܢܝܼܫܲܢܩܵܐ ܬܪܲܝܵܢܵܐ. 9ܘܐܸܢ ܠܵܐ ܗܲܡܸܢܝܼ ܠܬܸܪܘܲܝܗܝ ܢܝܼܫܲܢܩܹ̈ܐ ܘܠܵܐ ܫܵܡܥܝܼ ܠܩܵܠܘܼܟ݂، ܗ̇ܝܓܵܗ ܫܵܩܠܹܬ ܡ̣ܢ ܡ̈ܝܼܵܐ ܕܢܲܗܪܵܐ ܘܬܲܦܟܸܬ ܠܗܘܿܢ ܥܲܠ ܒܸܪܙܵܐ؛ ܘܡ̈ܝܼܵܐ ܕܫܵܩܠܹܬ ܠܗܘܿܢ ܡ̣ܢ ܢܲܗܪܵܐ ܒܸܬ ܚܵܕܪܝܼ ܠܕܸܡܵܐ ܥܲܠ ܒܸܪܙܵܐ.“
10ܐܝܼܢܵܐ ܐ݇ܡܝܼܪܹܗ ܡܘܼܫܹܐ ܠܡܵܪܝܵܐ، ”ܝܵܐ ܡܵܪܝܼ، ܠܹܐ ܝܘܸܢ ܡܲܠܵܠܵܐ ܐܵܢܵܐ، ܗܵܐ ܡ̣ܢ ܐ݇ܬܸܡܵܠܝ، ܗܵܐ ܡ̣ܢ ܝܵܘܡܵܐ ܐ݇ܚܹܪ݇ܢܵܐ، ܘܗܵܐ ܡ̣ܢ ܗ̇ܝܓܵܗ ܕܗܘܼܡܙܸܡ ܠܘܼܟ݂ ܥܲܡ ܪܹܓܘܼܟ݂، ܣܵܒܵܒ ܝܲܩܘܼܪܵܐ ܝܘܸܢ ܒܦܘܼܡܵܐ ܘܒܠܸܫܵܢܵܐ.“ 11ܐ݇ܡܝܼܪܹܗ ܡܵܪܝܵܐ ܐܸܠܹܗ، ”ܡܵܢܝܼ ܥܒ݂ܝܼܕ ܠܹܗ ܦܘܼܡܵܐ ܕܒܲܪܢܵܫܵܐ؟ ܘܡܵܢܝܼ ܟܹܐ ܥܵܒܹܕ ܠܹܗ ܟܲܪܵܐ؟ ܝܲܢ ܠܵܠܵܐ؟ ܝܲܢ ܚܵܙܝܵܢܵܐ؟ ܝܲܢ ܣܸܡܝܵܐ؟ ܗܵܐ ܠܵܐ ܐܵܢܵܐ ܡܵܪܝܵܐ؟ 12ܐܵܕܝܼܵܐ ܙܹܠ݇، ܘܐܵܢܵܐ ܒܸܬ ܗܵܘܹܝܢ ܥܲܡ ܦܘܼܡܘܼܟ݂، ܘܒܸܬ ܡܲܠܦܸܢܘܼܟ݂ ܡܸܢܕܝܼ ܕܗܲܡܙܸܡܸܬ.“ 13ܓ̰ܘܼܘܸܒ ܠܹܗ ܡܘܼܫܹܐ، ”ܦܲܪܦܘܼܠܹܐ ܝܘܸܢ ܝܵܐ ܡܵܪܝܼ، ܫܲܕܸܪ ܚܲܕ ܐ݇ܚܹܪ݇ܢܵܐ.“
ܐܲܗܪܘܿܢ ܦܝܵܫܵܐ ܓܘܼܒܝܵܐ ܕܗܲܝܸܪ ܠܡܘܼܫܹܐ
14ܗ̇ܝܓܵܗ ܚܝܼܡ ܠܵܗ̇ ܟܲܪܒܵܐ ܕܡܵܪܝܵܐ ܥܲܠ ܡܘܼܫܹܐ ܘܐ݇ܡܝܼܪܹܗ، ”ܗܵܐ ܠܹܐ ܝܠܹܗ ܐܲܗܪܘܿܢ ܠܹܘܵܝܵܐ ܐܲܚܘܿܢܘܼܟ݂؟ ܟܹܐ ܝܵܕܥܹܢ ܕܟܹܐ ܗܲܡܙܸܡ ܨܦܵܝܝܼ. ܗܵܐ ܒܹܐܬܵܝܵܐ ܝܠܹܗ ܕܬܵܦܹܩ ܒܝܼܘܼܟ݂، ܘܟܲܕ ܚܵܙܹܐ ܠܘܼܟ݂ ܒܸܬ ܚܵܕܹܐ ܠܸܒܹܗ. 15ܐܲܢ݇ܬ ܒܸܬ ܗܲܡܙܸܡܸܬ ܥܲܡܹܗ ܘܡܲܬܒܸܬ ܗܹܡܸܙܡܵܢܹ̈ܐ ܒܦܘܼܡܹܗ؛ ܘܐܵܢܵܐ ܒܸܬ ܗܵܘܹܝܢ ܥܲܡ ܦܘܼܡܘܼܟ݂ ܘܥܲܡ ܦܘܼܡܹܗ، ܘܒܸܬ ܡܲܠܦܸܢܵܘܟ݂ܘܿܢ ܡܸܢܕܝܼ ܕܥܵܒ݂ܕܝܼܬܘܿܢ. 16ܗ̇ܘ ܒܸܬ ܗܲܡܙܸܡ ܡ̣ܢ ܓܹܒܘܼܟ݂ ܠܥܲܡܵܐ؛ ܗ̇ܘ ܒܸܬ ܗܵܘܹܐ ܐܸܠܘܼܟ݂ ܦܘܼܡܵܐ، ܘܐܲܢ݇ܬ ܒܸܬ ܗܵܘܹܝܬ ܐܸܠܹܗ ܠܐܲܠܵܗܵܐ. 17ܘܫܵܩܠܹܬ ܠܐܵܗܵܐ ܚܘܼܛܪܵܐ ܒܐܝܼܕܘܼܟ݂، ܕܒܝܼܹܗ ܥܵܒ݂ܕܹܬ ܢܝܼܫܲܢܩܹ̈ܐ.“
ܡܘܼܫܹܐ ܒܸܕܝܵܪܵܐ ܠܡܸܨܪܹܝܢ
18ܐ݇ܙܝܼܠ ܠܹܗ ܡܘܼܫܹܐ ܘܕܝܼܪܹܗ ܠܟܸܣ ܝܲܬܪܘܿܢ ܚܸܡܝܵܢܹܗ ܘܐ݇ܡܝܼܪܹܗ ܐܸܠܹܗ، ”ܦܲܪܦܘܼܠܹܐ ܝܘܸܢ، ܐܵܙܹܠ݇ܢ ܘܕܵܝܪܹܢ ܠܟܸܣ ܐܲܚܘܿܢܘܵܬܝܼ̈ ܕܝܼܢܵܐ ܒܡܸܨܪܹܝܢ، ܘܚܵܙܹܝܢ ܐܸܢ ܗܹܫ ܐܵܢܝܼ ܚܵܝܹ̈ܐ ܝܢܵܐ.“ ܐ݇ܡܝܼܪܹܗ ܐܸܠܹܗ ܝܲܬܪܘܿܢ، ”ܙܹܠ݇ ܒܫܠܵܡܵܐ.“
19ܐ݇ܡܝܼܪܵܐ ܝܗ݇ܘܵܐ ܡܵܪܝܵܐ ܠܡܘܼܫܹܐ ܓܵܘ ܡܸܕܝܲܢ، ”ܙܹܠ݇ ܕܘܼܪ ܠܡܸܨܪܹܝܢ، ܣܵܒܵܒ ܡܝܼܬ ܠܗܘܿܢ ܟܠܲܝܗܝ ܐܵܢܝܼ ܐ݇ܢܵܫܹ̈ܐ ܕܒܸܛܥܵܝܵܐ ܝܗ݇ܘܵܘ ܠܸܩܛܵܠܘܼܟ݂.“ 20ܘܫܩܝܼܠ ܠܹܗ ܡܘܼܫܹܐ ܠܒܲܟ݂ܬܹܗ ܘܠܒܢܘܿܢܘܼ̈ܗܝ ܘܡܘܼܬܒܲܝ ܠܹܗ ܥܲܠ ܚܡܵܪܵܐ، ܘܕܝܼܪܹܗ ܠܐܲܪܥܵܐ ܕܡܸܨܪܹܝܢ؛ ܘܫܩܝܼܠ ܠܹܗ ܠܚܘܼܛܪܵܐ ܕܐܲܠܵܗܵܐ ܒܐܝܼܕܹܗ. 21ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܟܲܕ ܕܵܝܪܹܬ ܠܡܸܨܪܹܝܢ، ܚܙܝܼ ܕܥܵܒ݂ܕܹܬ ܩܵܕ݇ܡ ܦܸܪܥܘܿܢ ܟܠܲܝܗܝ ܕܘܼܡܵܪܹ̈ܐ ܕܡܘܼܬܒܲܝ ܝܘܸܢ ܒܐܝܼܕܘܼܟ݂، ܘܐܵܢܵܐ ܒܸܬ ܡܲܩܫܸܝܢ ܠܠܸܒܹܗ ܕܠܵܐ ܫܲܕܸܪ ܠܥܲܡܵܐ. 22ܘܐܵܡܪܹܬ ܠܦܸܪܥܘܿܢ، ’ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ، ܒܪܘܿܢܝܼ ܒܘܼܟ݂ܪܵܐ ܝܠܹܗ ܝܼܣܪܵܝܹܠ، 23ܘܐ݇ܡܝܼܪܝܼ ܐܸܠܘܼܟ݂، ”ܫܲܕܸܪ ܠܒܪܘܿܢܝܼ ܕܣܵܓܹܕ ܐܸܠܝܼ،“ ܐܝܼܢܵܐ ܡܘܼܚܦܸܠ ܠܘܼܟ݂ ܠܫܲܕܘܼܪܹܗ. ܒܘܼܬ ܐܵܗܵܐ، ܐܵܢܵܐ ܒܸܬ ܩܵܛܠܹܢ ܠܒܪܘܿܢܘܼܟ݂ ܒܘܼܟ݂ܪܘܼܟ݂.‘“
24ܒܐܘܼܪܚܵܐ، ܒܒܹܝܬ ܡܲܫܪܝܵܐ، ܬܦܝܼܩ ܠܹܗ ܒܝܼܹܗ ܡܵܪܝܵܐ ܘܒܥܹܐ ܠܹܗ ܠܸܩܛܵܠܹܗ. 25ܐܝܼܢܵܐ ܫܩܝܼܠ ܠܵܗ̇ ܨܸܦܘܿܪܵܐ ܣܸܡܛܵܐ ܘܦܪܝܼܡ ܠܵܗ̇ ܠܥܘܼܪܠܘܼܬܵܐ ܕܒܪܘܿܢܘܼܗ̇، ܘܪܘܼܦܝܵܐ ܠܵܗ̇ ܩܵܕ݇ܡ ܐܲܩܠܹ̈ܐ ܕܡܘܼܫܹܐ، ܘܐ݇ܡܝܼܪܵܗ̇، ”ܫܲܪܝܼܪܵܐܝܼܬ ܓܲܒ݂ܪܵܐ ܕܕܸܡܵܐ ܝܘܸܬ ܐܸܠܝܼ.“ 26ܘܗܲܕܟ݂ܵܐ ܫܒ݂ܝܼܩ ܠܹܗ ܐܲܠܵܗܵܐ ܐܸܠܹܗ ܒܢܲܦ̮ܫܹܗ. ܗ̇ܝܓܵܗ ܝܗ݇ܘܵܐ ܕܐ݇ܡܝܼܪܵܗ̇، ”ܓܲܒ݂ܪܵܐ ܕܕܸܡܵܐ ܝܘܸܬ.“ ܐܵܗܵܐ ܐ݇ܡܝܼܪܵܗ̇ ܒܘܼܬ ܓܙܘܼܪܬܵܐ.
ܐܲܗܪܘܿܢ ܦܝܵܫܵܐ ܫܘܼܕܪܵܐ ܕܬܵܦܹܩ ܒܡܘܼܫܹܐ
27ܐ݇ܡܝܼܪܹܗ ܡܵܪܝܵܐ ܠܐܲܗܪܘܿܢ، ”ܙܹܠ݇ ܠܸܬܦܵܩܵܐ ܒܡܘܼܫܹܐ ܒܒܲܪܝܼܵܐ.“ ܐ݇ܙܝܼܠ ܠܹܗ ܘܬܦܝܼܩ ܠܹܗ ܒܝܼܹܗ ܒܛܘܼܪܵܐ ܕܐܲܠܵܗܵܐ، ܘܢܫܝܼܩ ܠܹܗ. 28ܘܡܘܼܕܸܥ ܠܹܗ ܡܘܼܫܹܐ ܠܐܲܗܪܘܿܢ ܟܠܲܝܗܝ ܗܹܡܸܙܡܵܢܹ̈ܐ ܕܡܵܪܝܵܐ ܕܐ݇ܡܝܼܪܹܗ ܐܸܠܹܗ، ܘܟܠܲܝܗܝ ܥܵܓ̰ܸܒܘܵܬܹ̈ܐ ܕܦܩܝܼܕ ܠܹܗ ܕܥܵܒܹܕ ܗ݇ܘܵܐ.
29ܘܐ݇ܙܝܼܠ ܠܗܘܿܢ ܡܘܼܫܹܐ ܘܐܲܗܪܘܿܢ ܘܓ̰ܘܼܡܸܥ ܠܗܘܿܢ ܠܟܠܲܝܗܝ ܚܘܵܪ̈ܕܸܩܢܹܐ ܕܒܢܲܝ̈ ܝܼܣܪܵܝܹܠ. 30ܘܗܘܼܡܙܸܡ ܠܹܗ ܐܲܗܪܘܿܢ ܟܠܲܝܗܝ ܗܹܡܸܙܡܵܢܹ̈ܐ ܕܡܵܪܝܵܐ ܕܗܘܼܡܙܸܡܲܝ ܠܹܗ ܥܲܡ ܡܘܼܫܹܐ، ܘܥܒ݂ܝܼܕ ܠܹܗ ܥܵܓ̰ܸܒܘܵܬܹ̈ܐ ܩܵܕ݇ܡ ܥܲܝܢܹ̈ܐ ܕܥܲܡܵܐ. 31ܗܘܼܡܸܢܹܗ ܥܲܡܵܐ؛ ܘܟܲܕ ܫܡܝܼܥ ܠܗܘܿܢ ܕܡܵܪܝܵܐ ܣܘܼܚܒܸܪܹܗ ܠܒܢܲܝ̈ ܝܼܣܪܵܝܹܠ ܘܕܚܙܹܐ ܠܹܗ ܠܐܘܼܠܨܵܢܲܝܗܝ، ܟܝܼܦ ܠܗܘܿܢ ܘܣܓ݂ܝܼܕ ܠܗܘܿܢ ܐܸܠܹܗ.
Currently Selected:
ܡܦܩܢܐ 4: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
