ܡܦܩܢܐ 1
1
ܒܢܲܝ̈ ܝܼܣܪܵܝܹܠ ܒܸܙܝܵܕܵܐ
1ܐܲܢܹܐ ܝܢܵܐ ܫܸܡܵܢܹ̈ܐ ܕܒܢܘܿܢܹ̈ܐ ܕܝܼܣܪܵܝܹܠ ܕܐ݇ܬܹܐ ܠܗܘܿܢ ܠܡܸܨܪܹܝܢ ܥܲܡ ܝܲܥܩܘܿܒ݂، ܟܠ ܚܲܕ ܥܲܡ ܒܲܝܬܹܗ: 2ܪܐܘܼܒܸܢ، ܫܸܡܥܘܿܢ، ܠܹܘܝܼ، ܝܼܗܘܼܕܵܐ، 3ܐܝܼܣܵܟ݂ܵܪ، ܙܒ݂ܘܿܠܘܿܢ، ܒܸܢܝܵܡܹܝܢ، 4ܕܵܢ، ܢܲܦ̮ܬܵܠܝܼ، ܓܵܕ، ܘܐܵܫܹܝܪ. 5ܟܠܲܝܗܝ ܐ݇ܢܵܫܹ̈ܐ ܕܦܠܝܼܛ ܠܗܘܿܢ ܡ̣ܢ ܚܲܨܵܐ ܕܝܲܥܩܘܿܒ݂ ܫܲܒ݂ܥܝܼ ܓܵܢܵܬܹ̈ܐ ܝܗ݇ܘܵܘ. ܝܵܘܣܸܦ ܡ̣ܢ ܩܲܕ݇ܡܵܝܬܵܐ ܒܡܸܨܪܹܝܢ ܝܼܗ݇ܘܵܐ.
6ܘܡܝܼܬ ܠܹܗ ܝܵܘܣܸܦ، ܘܟܠܲܝܗܝ ܐܲܚܘܿܢܘܵܬܹ̈ܗ، ܘܟܠܵܗ̇ ܗ̇ܝ ܬܵܘܠܲܕܬܵܐ. 7ܐܝܼܢܵܐ ܦܪܹܐ ܠܗܘܿܢ ܒܢܲܝ̈ ܝܼܣܪܵܝܹܠ، ܘܙܝܼܕ ܠܗܘܿܢ ܪܵܒܵܐ، ܘܓܘܼܪܘܸܣ ܠܗܘܿܢ ܘܙܘܼܪܒܸܢܗܘܿܢ ܪܵܒܵܐ ܪܵܒܵܐ، ܘܦܝܼܫ ܠܵܗ̇ ܡܠܝܼܬܵܐ ܐܲܪܥܵܐ ܒܝܼܲܝܗܝ.
ܒܢܲܝ̈ ܝܼܣܪܵܝܹܠ ܦܝܵܫܵܐ ܛܠܝܼܡܹ̈ܐ
8ܗ̇ܝܓܵܗ ܩܝܼܡ ܠܹܗ ܡܲܠܟܵܐ ܚܵܕ݇ܬܵܐ ܥܲܠ ܡܸܨܪܹܝܢ، ܗ̇ܘ ܕܠܵܐ ܝ݇ܕܝܼܥ ܠܹܗ ܠܝܵܘܣܸܦ. 9ܐ݇ܡܝܼܪܹܗ ܗ̇ܘ ܠܥܲܡܹܗ، ”ܗܵܐ، ܥܲܡܵܐ ܕܒܢܲܝ̈ ܝܼܣܪܵܝܹܠ ܒܘܼܫ ܪܵܒܵܐ ܘܒܘܼܫ ܚܲܝܠܵܢܵܐ ܝܠܹܗ ܡܸܢܲܢ. 10ܬܹܝܡܘܼܢ ܦܵܠܚܲܚ ܒܗܵܘܢܵܐ ܥܲܠܘܼܗܝ. ܠܵܐ ܗܵܘܝܵܐ ܕܙܵܐܹܕ، ܘܟܲܕ ܗܵܘܹܐ ܦܠܵܫܵܐ، ܐܘܼܦ ܗ̇ܘ ܚܲܝܸܕ ܥܲܡ ܕܸܫܡܸܢܲܢ̈، ܘܦܵܠܹܫ ܠܕܲܠܩܘܼܒ݂ܠܲܢ، ܘܦܵܠܹܛ ܡ̣ܢ ܐܵܗܵܐ ܐܲܪܥܵܐ.“ 11ܘܡܘܼܬܸܒ݂ ܠܗܘܿܢ ܥܲܠܲܝܗܝ ܫܲܠܝܼܛܹ̈ܐ ܕܥܒ݂ܝܼܕ ܠܗܘܿܢ ܫܘܼܚܪܵܐ ܥܲܠܲܝܗܝ، ܡܲܠܝܘܼܨܲܝ ܒܟܵܪ̈ܵܬܹܐ ܝܲܩܘܼܪܹ̈ܐ؛ ܘܒܢܹܐ ܠܗܘܿܢ ܡܕܝܼܢܵܬܹ̈ܐ ܕܐܵܘܨܪܹ̈ܐ ܠܦܸܪܥܘܿܢ: ܦܝܼܬܘܿܡ ܘܪܲܥܡܣܝܼܣ. 12ܐܝܼܢܵܐ ܟܡܵܐ ܕܡܲܠܝܸܨܝܼ ܗ݇ܘܵܘ ܠܗܘܿܢ، ܒܘܼܫ ܙܵܝܕܝܼ ܗ݇ܘܵܘ ܘܒܘܼܫ ܓܲܪܘܸܣܝܼ ܗ݇ܘܵܘ. ܘܥܝܼܩ ܠܵܗ̇ ܠܡܸܨܪ̈ܵܝܹܐ ܡ̣ܢ ܩܵܕ݇ܡ ܒܢܲܝ̈ ܝܼܣܪܵܝܹܠ. 13ܘܗܲܕܟ݂ܵܐ ܡܘܼܦܠܸܚ ܠܗܘܿܢ ܡܸܨܪ̈ܵܝܹܐ ܠܒܢܲܝ̈ ܝܼܣܪܵܝܹܠ ܒܛܠܘܼܡܝܵܐ. 14ܡܘܼܡܪܸܪܗܘܿܢ ܠܚܲܝܲܝ̈ܗܝ ܒܦܘܼܠܚܵܢܵܐ ܩܸܫܝܵܐ، ܒܛܝܼܢܵܐ، ܘܒܠܸܒ݂ܢܹ̈ܐ، ܘܒܟܠ ܦܘܼܠܚܵܢܵܐ ܓܵܘ ܚܲܩܠܵܐ؛ ܒܟܠܹܗ ܦܘܼܠܚܵܢܲܝܗܝ، ܡܸܨܪ̈ܵܝܹܐ ܡܲܦܠܸܚܝܼ ܗ݇ܘܵܘ ܠܗܘܿܢ ܒܛܠܘܼܡܝܵܐ.
ܦܘܼܩܕܵܢܵܐ ܕܦܸܪܥܘܿܢ ܒܘܼܬ ܝܲܠܘܼܕܹ̈ܐ
15ܐ݇ܡܝܼܪܹܗ ܡܲܠܟܵܐ ܕܡܸܨܪܹܝܢ ܠܚܲܝܵܬܹ̈ܐ ܥܸܒ݂ܪ̈ܵܝܹܐ، ܫܸܡܵܐ ܕܚܕܵܐ ܡܸܢܲܝܗܝ ܫܸܦܪܵܐ، ܘܫܸܡܵܐ ܕܗ̇ܝ ܐ݇ܚܹܪ݇ܬܵܐ ܦܘܼܥܵܐ، 16”ܐܝܼܡܲܢ ܕܗܵܘܹܝܬܘܿܢ ܗܲܝܘܼܪܹܐ ܠܒܲܟ݂ܬܵܐ ܥܸܒ݂ܪܵܝܬܵܐ ܒܗܵܨܲܠܬܘܼܗ̇، ܚܵܙܹܝܬܘܿܢ ܥܲܠ ܟܘܼܪܣܝܵܐ ܕܗܵܨܲܠܬܵܐ، ܐܸܢ ܒܪܘܿܢܵܐ ܝܠܹܗ، ܩܵܛܠܝܼܬܘܿܢ ܠܹܗ، ܘܐܸܢ ܒܪܵܬܵܐ ܝܠܵܗ̇، ܫܒ݂ܘܿܩܘܼܢ ܕܚܵܝܵܐ.“ 17ܐܝܼܢܵܐ ܚܲܝܵܬܹ̈ܐ ܙܕܝܼܥ ܠܗܘܿܢ ܡ̣ܢ ܐܲܠܵܗܵܐ، ܘܠܵܐ ܥܒ݂ܝܼܕ ܠܗܘܿܢ ܐܲܝܟ݂ ܕܦܩܝܼܕ ܠܹܗ ܐܸܠܲܝܗܝ ܡܲܠܟܵܐ ܕܡܸܨܪܹܝܢ، ܘܫܒ݂ܝܼܩ ܠܗܘܿܢ ܕܚܵܝܝܼ ܗ݇ܘܵܘ ܝܵܠܹ̈ܕ݇ܐ. 18ܘܩܪܹܐ ܠܹܗ ܡܲܠܟܵܐ ܕܡܸܨܪܹܝܢ ܠܚܲܝܵܬܹ̈ܐ ܘܐ݇ܡܝܼܪܹܗ ܐܸܠܲܝܗܝ، ”ܩܵܡܘܿܕܝܼ ܥܒ݂ܝܼܕ ܠܵܘܟ݂ܘܿܢ ܐܵܗܵܐ ܫܘܼܠܵܐ، ܘܫܒ݂ܝܼܩ ܠܵܘܟ݂ܘܿܢ ܠܝܵܠܹ̈ܕ݇ܐ ܕܚܵܝܝܼ؟“ 19ܐ݇ܡܝܼܪܗܘܿܢ ܐܸܠܹܗ، ”ܣܵܒܵܒ ܒܲܟ݂ܬܵܬܹ̈ܐ ܥܸܒ݂ܪ̈ܵܝܹܐ ܠܹܐ ܝܢܵܐ ܐܲܝܟ݂ ܒܲܟ݂ܬܵܬܹ̈ܐ ܡܸܨܪ̈ܵܝܹܐ؛ ܒܘܼܫ ܚܵܝܹ̈ܐ ܝܢܵܐ ܘܗܲܨܘܼܠܹܐ ܝܢܵܐ ܡ̣ܢ ܩܵܕ݇ܡ ܕܚܲܝܬܵܐ ܐܵܬܝܵܐ ܠܟܸܣ ܠܲܝܗܝ.“ 20ܗܲܕܟ݂ܵܐ ܥܒ݂ܝܼܕ ܠܹܗ ܐܲܠܵܗܵܐ ܛܵܒ݂ܬܵܐ ܥܲܡ ܚܲܝܵܬܹ̈ܐ؛ ܘܙܝܼܕ ܠܹܗ ܥܲܡܵܐ ܘܚܘܼܠܸܢܹܗ ܪܵܒܵܐ. 21ܘܣܵܒܵܒ ܙܕܝܼܥ ܠܗܘܿܢ ܚܲܝܵܬܹ̈ܐ ܡ̣ܢ ܐܲܠܵܗܵܐ، ܝܘܼܗ݇ܒܸܠ ܠܹܗ ܐܸܠܲܝܗܝ ܒܲܝܬܘܼܬܵܐ ܕܓܵܢܲܝܗܝ.
22ܗ̇ܝܓܵܗ ܦܩܝܼܕ ܠܹܗ ܦܸܪܥܘܿܢ ܠܟܠܹܗ ܥܲܡܹܗ ܘܐ݇ܡܝܼܪܹܗ، ”ܟܠ ܒܪܘܿܢܵܐ ܕܦܵܐܹܫ ܝ݇ܠܝܼܕܵܐ، ܪܲܦܸܝܬܘܿܢ ܠܹܗ ܓܵܘ ܢܲܗܪܵܐ، ܘܟܠ ܒܪܵܬܵܐ ܫܵܒ݂ܩܝܼܬܘܿܢ ܠܵܗ̇ ܕܚܵܝܵܐ.“
Currently Selected:
ܡܦܩܢܐ 1: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
