Loma 6
6
Ko e Mate mo e Mo‘ui ‘ia Kalaisi
1Ko e hā leva ha‘atau lau? Te tau ‘ai koā ke lahi ange ‘etau fai angahalá kae toe fakautuutu ange ai ‘a e ‘ofa mai ‘a e ‘Otuá? 2‘Ikai ‘aupito! He kuo tau ‘osi ongonoa kitautolu ki he angahalá. Pea ko e ‘ai ke tau toe mo‘ui ‘aki iá ke tau fēfē ai? 3‘Ai ke mahino eni kiate kimoutolu, ko ‘etau kau mo Sīsū Kalaisi ‘i hotau papitaisó, ko ‘etau kau ai pē ia mo Sīsū Kalaisi ‘i he‘ene pekiá. 4He ko hotau papitaisó, ko ‘etau mate fakataha ia mo Kalaisi mo hotau tanu fakataha mo ia. Ko e ‘uhinga ‘o hotau papitaisó, ka tau mo‘ui‘aki ha mo‘ui fo‘ou, ‘o hangē pē ko e fokotu‘u ‘o Kalaisi mei he maté ki ha mo‘ui fo‘ou, ‘aki ‘a e ivi māfimafi ‘o e ‘Otua ko e Tamaí.
5He na‘e fou ‘a Kalaisi he maté pea toki a‘u ai ki he mo‘uí. Pea kuo pau ke tau mate fakataha mo Kalaisi he papitaisó kae lava ke fokotu‘u kitautolu ke tau mo‘ui. 6‘Oku ‘ikai puli ia. Ko hotau motua‘i tangatá, na‘e tukifa‘o fakataha mo Kalaisi ki he kolosí, kae fakangata ‘a e pōpula hotau sino angahala‘iá ki he angahalá. 7He tala‘ehaí ‘oku kei angi holo ‘e he angahalá ha taha kuo ‘osi mate.
8Ko hono mo‘oní, kuo tau ‘osi mate fakataha mo Kalaisi. Pea kuo pau ke tau mo‘ui fakataha mo ia. 9‘Oku ‘ikai foki ha ivi ‘o e maté ia kia Kalaisi. He na‘á ne mate, ka na‘e fokotu‘u ia ke mo‘ui, pea he‘ikai te ne toe mate. 10Ko e mate ‘a Kalaisí, ko ‘ene mate tā tu‘o taha pē koe‘uhí ko e angahalá. Ka kuó ne mo‘ui. Pea ko ‘ene mo‘ui ‘oku lolotonga faí, ko ‘ene mo‘ui ma‘á e ‘Otuá. 11Kuo pau ke mou lau kimoutolu ko e kakai kuo ‘osi mate pehē, ‘o ‘ikai ha toe ivi ‘o e angahalá kiate kimoutolu, ka ko e kakai kuo mo‘ui ma‘á e ‘Otuá koe‘uhí ko Sīsū Kalaisi.
12Vakai na‘a toe fa‘iteliha ‘a e angahalá ‘i homou kakanó. ‘Oua te mou toe fakatopono ‘a e ngaahi holi ‘a homou kakanó. He ko e kakanó, ‘e faifai pē ‘o ‘auha. 13‘Oua te mou tuku ange ke ngāue‘aki hamou kupu ‘e taha ‘i ha fa‘ahinga feinga ‘oku ta‘e fe‘unga. Ka mou foaki kimoutolu ki he ‘Otuá ke ngali ko e kakai na‘e mate ka kuo fakamo‘ui. Tuku ange kotoa ki he ‘Otuá homou ngaahi kupú ke ne fai ‘aki ha ngāue ‘oku ‘aonga. 14‘Oua ‘e toe pule ‘a e angahalá ‘i homou kakanó. He na‘e fakanofonofo ‘aki kimoutolu e ‘ofa tu‘unga‘a ‘a e ‘Otuá, ‘o ‘ikai ko e Laó.
Ko e Pōpula ‘Oku Hōifua ai e ‘Otuá
15‘I he‘ene peheé leva, Ko e hā ‘etau me‘a ‘e faí? Te tau hanganaki fai angahala ai pē, he ‘oku ‘ikai, tokua, ko e Laó ‘oku tau mo‘ui aí, ka ko e ‘ofa ‘a e ‘Otuá? ‘Ikai ‘aupito! 16Kuo te‘eki ai koā ke mou ‘ilo ko ‘ete loto ke pōpula ‘aki kita ‘e ha taha, ko e ‘ikai ia ke toe fai hato loto? Mou fili angé. ‘E pōpula ‘aki kimoutolu ‘e he angahalá ke mou mate ai? Pe ‘e pōpula ‘aki kimoutolu ‘e he ‘Otuá ke mou vālelei ai mo ia? 17‘I he kuo hilí na‘e pōpula ‘aki kimoutolu ‘e he angahalá. Kae fakafeta‘i ki he ‘Otuá, he kuo mou tui mo‘oni eni ki he ngaahi fakahinohino na‘e fai kiate kimoutolú.
18Kuo fakangata hono pōpula ‘aki kimoutolu ki he fai angahalá. Pea talu pē mei ai mo e pōpula ‘aki kimoutolu ki he faitotonú.
19Ko ‘eku ‘ai fakatātā peheé, hei‘ilo na‘a mahino ange ai kiate kimoutolu ‘eku fakakaukaú. Na‘a mou loto he kuo hilí ke pōpula ki he ngaahi feinga ta‘e fe‘unga mo fakalielia. Mou loto ā eni ke pōpula ki ha ngaahi feinga ‘oku ma‘a mo mā‘oni‘oni.
20Na‘a mou kei pōpula ki he angahalá, pea mou tau‘atāina ai pē mei he pule ‘a e totonú. 21Ka ko e hā ho‘omou me‘a na‘e ma‘u aí? ‘Ikai kuo mou mā he toe manatu ki aí? He ko hono iku‘angá pē ko e mate. 22Ka na‘e fakangata ho‘omou pōpula ki he fai angahalá. Pea talu ai ho‘omou pōpula ki he ‘Otuá. Kuo hoa ai ho‘omou mo‘uí mo e finangalo ‘o e ‘Otuá. Pea ko hono iku‘angá ko e mo‘ui ta‘e ngata. 23He ‘oku ‘i ai ‘a e ‘inasi ‘o ha taha ‘oku pōpula ki he fai angahalá, ko e mate. Ka ko e ‘Otuá ia, ‘oku ‘i ai ‘ene me‘a‘ofa ‘oku fie ‘omi ma‘atautolu, ko e mo‘ui ta‘e ngata. Pea ‘oku tu‘unga ia ‘i hotau ‘Eikí ko Sīsū Kalaisí.
Currently Selected:
Loma 6: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
