Loma 7
7
Ko e Fakatātā mei he Nofo Malí
1Kāinga, kuo ‘osi mahino lelei kiate kimoutolu ‘a e Laó. Ko hono mafai kia kitá, ‘e ngata pē ia ‘i ha‘ate mate. 2-3Ka u fakatātā ‘aki ‘a e nofo malí. Ko e tu‘utu‘uni ‘a e Laó, ke nofo pē ‘a e fefine malí ko e uaifi ‘o hono husepānití ‘o a‘u ki he mate ‘a hono husepānití. Ka ko ‘ene mate pē ‘a e husepānití, ko ‘ene ‘atā ia ‘a e fefiné ke toe mali. Ka nonofo ‘a e fefiné mo ha toe tangata ‘i he kei mo‘ui hono husepānití, ko e tono ia.
4Ko homou ‘ātungá pē ia, kāinga. He ko e kupu kimoutolu he sino ‘o Kalaisí, ‘o ‘ikai ai ha toe ivi ‘o e Laó kiate kimoutolu. Pea kuo mou tau‘atāina ke nofo fakataha mo Kalaisi, ‘a ē na‘e fokotu‘u mei he maté, koe‘uhí ka ne mo‘ui ma‘á e ‘Otuá. 5Talu ‘etau kei fai mai ‘a e tō‘onga mo‘ui na‘a tau tutupu mo iá mo ‘etau fai angahala koe‘uhi ko e kakaha ‘a e ngaahi holi ‘a hotau kakanó. Na‘e kau ai pē mo e Laó hono tafunaki ‘a e ngaahi holi ko iá. Pea ko hono iku‘angá pē ko e mate. 6Kuo ‘osi fakatau‘atāina kitautolu mei he Laó. He kuo tau mate kitautolu ki ai, pea ‘oku ‘ikai hano toe ivi ‘o‘ona ia kiate kitautolu. ‘Oku ‘ikai te tau toe fai ‘a e ngāue ‘a e ‘Otuá ‘i he fakaongoongo ki ha lao na‘e tohi. Ko e founga motu‘á ia. Ka ko e founga fo‘oú, ko ‘etau fai ‘ene ngāué ‘i he fakaongoongo ki he Laumālie ‘o e ‘Otuá.
Ko e Laó mo e Angahalá
7Toka ange ha taha ‘iate kimoutolu te ne pehē mai, “Tā ‘oku angahala pē mo e Laó.” Tuku ia! He na‘e ‘ikai foki ke mei mahino kia kita ‘a e angahalá, ‘o ka ne ‘ikai ‘a e Laó. Hangē ko ‘ení. Na‘e ‘ikai ke mei mahino kia kita ‘a e mānumanú, ka ko e fekau he Laó ke ‘oua te te fai peheé. 8Na‘e me‘angāue ‘aki ‘a e fekau ko iá ‘e he angahalá ke langa‘i ha ngaahi holi kehekehe ‘i hoto lotó. Na‘e mei tamatemate ai pē ‘a e angahalá ia ‘i hoto lotó, ‘o ka ne ‘ikai ko e ngāue ‘a e Laó.
9‘I he te‘eki ke te ‘ilo ‘a e Laó, na‘á te kei mo‘ui pē. Ka ko e tuai pē ‘ene mahino kia kita ‘a e fekau ke ‘oua ‘e mānumanú, pea mo‘ui hake ai pē ‘i hoto lotó ‘a e angahalá. 10Kae mate hifo hoto laumālié ia. Na‘e ‘omi ‘a e fekau ko iá ke tau mo‘ui ai. Ka na‘a tau mate ai kitautolu. 11Na‘e hoko pē ‘a e fekau ke ‘oua te tau mānumanú ko e me‘a ke tau hē ai ‘o mate, koe‘uhi ko e ngāue ‘a e angahala ‘oku toitoi ‘i hotau lotó. 12Ka ko e Laó ‘iate ia pē, pea ko e ngaahi fekaú, ‘oku mā‘oni‘oni mo tonu mo ‘aonga.
13Toka ange ha taha ‘iate kimoutolu te ne pehē mai, “Tā ko ‘etau maté ko e ngāue ‘a e fu‘u me‘a mā‘oni‘oni. Tuku ia! ‘Oku ‘ikai ko ‘etau maté ko e ngāue ‘a ha me‘a ‘oku mā‘oni‘oni, ka ko e ngāue‘aki ‘e he angahalá ‘a e me‘a ‘oku mā‘oni‘oni. Vakai ange ā ki he kovi faufau ‘a e angahalá!
Ko e Fefūsiaki ‘i hotau Lotó
14Ko e Laó foki ‘oku fakalaumālie. Ka ko kitautolú ia, ko e koto kakano. Pea ‘ai aí mo e mātu‘aki angi holo kitautolu ‘e he angahalá, ‘o hangē ha kakai kuo ‘osi fakatau pōpulá. 15‘Oku ‘ilonga pē ia he anga hotau lotó. Lolotonga pē ‘ene mahino ‘a e me‘a ke te faí, kuó te fai ‘e kita ‘a e me‘a kehe. Pea lolotonga pē ‘ete fehi‘a ha me‘a, kuó te fai pē ‘a e me‘a ko iá. 16‘Okú te fakamo‘oni‘i pē ‘e kita ‘a e lelei ‘a e Laó, he ‘oku ‘ikai ke te lelei‘ia he‘ete me‘a ‘oku faí. 17‘I he‘ene peheé leva, tā ‘oku ‘ikai ko kita tonu ‘oku tupu mei ai ‘a e kovi ‘okú te faí, ka ko e angahala ‘oku nofo ‘i hoto lotó.
18‘Oku tau ‘ilo pē ‘oku ‘ikai ke nofo ha lelei ‘i hotau kakanó. He ‘oku tau fie failelei, ka ‘oku ‘ikai te tau lava. 19‘Oku tau fie faitotonu, ka tau faihala pē. 20Pea kapau ā ‘oku ‘ikai te tau fai ‘a e me‘a ‘oku tau ‘ilo ‘oku leleí, pea tā ‘oku ‘ikai ke tupu ‘a e kovi ‘oku tau fai meiate kitautolu. Ka ‘oku tupu ia mei he angahala ‘oku nofo ‘i hotau kakanó.
21-23‘Oku tau sio leva, tā ‘oku ‘i ai ‘a e lao hotau kakanó. Pea ko eni ia ‘a e lao ko iá, Ko ‘eku fie fai ha lelei, ka u fai ‘e au ‘a e kovi. Ko e lao ko ení ‘oku fepaki mo e Lao ‘a e ‘Otuá. He ‘oku ou mātu‘aki mahu‘inga‘ia he Lao ‘a e ‘Otuá, ka ‘oku fa‘iteliha ‘a e angahalá ‘iate au ko e ngāue ‘a e lao ko eni ‘o e kakanó. 24Faka‘ofa mo‘oni ko au. Ko hai te ne vete ange au mei he sino ko ení? He ko e sino ia te u mate ai. 25Fakafeta‘i ki he ‘Otuá hono vete ange ‘e Sīsū Kalaisi! ‘Io, ‘oku fie fakaongoongo hoku ‘atamaí ki he Lao ‘a e ‘Otuá, ka ‘oku ongongofua hoku kakanó ki he lao ‘o e angahalá.
Currently Selected:
Loma 7: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
