Popular Bible Verses from Loma 6

Share

He ‘oku ‘i ai ‘a e ‘inasi ‘o ha taha ‘oku pōpula ki he fai angahalá, ko e mate. Ka ko e ‘Otuá ia, ‘oku ‘i ai ‘ene me‘a‘ofa ‘oku fie ‘omi ma‘atautolu, ko e mo‘ui ta‘e ngata. Pea ‘oku tu‘unga ia ‘i hotau ‘Eikí ko Sīsū Kalaisí.

‘Oua ‘e toe pule ‘a e angahalá ‘i homou kakanó. He na‘e fakanofonofo ‘aki kimoutolu e ‘ofa tu‘unga‘a ‘a e ‘Otuá, ‘o ‘ikai ko e Laó.

He ko hotau papitaisó, ko ‘etau mate fakataha ia mo Kalaisi mo hotau tanu fakataha mo ia. Ko e ‘uhinga ‘o hotau papitaisó, ka tau mo‘ui‘aki ha mo‘ui fo‘ou, ‘o hangē pē ko e fokotu‘u ‘o Kalaisi mei he maté ki ha mo‘ui fo‘ou, ‘aki ‘a e ivi māfimafi ‘o e ‘Otua ko e Tamaí.

‘Oua te mou tuku ange ke ngāue‘aki hamou kupu ‘e taha ‘i ha fa‘ahinga feinga ‘oku ta‘e fe‘unga. Ka mou foaki kimoutolu ki he ‘Otuá ke ngali ko e kakai na‘e mate ka kuo fakamo‘ui. Tuku ange kotoa ki he ‘Otuá homou ngaahi kupú ke ne fai ‘aki ha ngāue ‘oku ‘aonga.

‘Oku ‘ikai puli ia. Ko hotau motua‘i tangatá, na‘e tukifa‘o fakataha mo Kalaisi ki he kolosí, kae fakangata ‘a e pōpula hotau sino angahala‘iá ki he angahalá.

Kuo pau ke mou lau kimoutolu ko e kakai kuo ‘osi mate pehē, ‘o ‘ikai ha toe ivi ‘o e angahalá kiate kimoutolu, ka ko e kakai kuo mo‘ui ma‘á e ‘Otuá koe‘uhí ko Sīsū Kalaisi.

Ko e hā leva ha‘atau lau? Te tau ‘ai koā ke lahi ange ‘etau fai angahalá kae toe fakautuutu ange ai ‘a e ‘ofa mai ‘a e ‘Otuá? ‘Ikai ‘aupito! He kuo tau ‘osi ongonoa kitautolu ki he angahalá. Pea ko e ‘ai ke tau toe mo‘ui ‘aki iá ke tau fēfē ai?

Kuo te‘eki ai koā ke mou ‘ilo ko ‘ete loto ke pōpula ‘aki kita ‘e ha taha, ko e ‘ikai ia ke toe fai hato loto? Mou fili angé. ‘E pōpula ‘aki kimoutolu ‘e he angahalá ke mou mate ai? Pe ‘e pōpula ‘aki kimoutolu ‘e he ‘Otuá ke mou vālelei ai mo ia?

‘I he kuo hilí na‘e pōpula ‘aki kimoutolu ‘e he angahalá. Kae fakafeta‘i ki he ‘Otuá, he kuo mou tui mo‘oni eni ki he ngaahi fakahinohino na‘e fai kiate kimoutolú. Kuo fakangata hono pōpula ‘aki kimoutolu ki he fai angahalá. Pea talu pē mei ai mo e pōpula ‘aki kimoutolu ki he faitotonú.