Loma 5
5
Ko e Vālelei mo e ‘Otuá
1Ko e fakalelei ‘a e ‘Otuá mo kitautolú koe‘uhi ko ‘etau tuí. Pea ‘oku tau vālelei eni mo e ‘Otuá koe‘uhí ko hotau ‘Eiki ko Sīsū Kalaisí. 2Ko Sīsū Kalaisi pē na‘á ne fakaa‘u kitautolu ki he ‘ofa tu‘unga‘a ko eni ‘oku tau ‘i aí. Pea ‘ikai ngata ai, ka ‘oku tau toe fakatu‘amelie foki ki ha‘atau ‘inasi he lāngilangi ‘o e ‘Otuá. 3Pea na‘a mo e ngaahi faingata‘a ‘oku tau fekuki mo iá, ‘oku tau tali lelei. He ko e fua foki ‘o ‘etau fekukí, ko e fa‘a kātaki. 4Pea ko e fua ‘o e fa‘a kātakí, ko e mo‘ui ma‘uma‘uluta. Pea ko e fua ‘o e mo‘ui ma‘uma‘ulutá, ko e toe tupulaki ai pē ‘etau fakatu‘amelié. 5Pea ko ‘etau fakatu‘amelié foki, ‘oku kau ai mo ‘etau ‘ilo pau ‘e ‘ikai tuku ‘e he ‘Otuá ke iku launoa ‘etau fononga ‘oku faí. He kuó ne ‘osi foaki mai ‘a e Laumālie Mā‘oni‘oní. Pea kuo fonu mahuohua ai hotau lotó he‘ene ‘ofá.
6Na‘e pekia ‘a Kalaisi ma‘atautolu ‘oku tau lolotonga ‘efihia he angahalá, mo e fakafili ki he ‘Otuá. 7Na‘a mo ha taha faitotonu, ‘e ‘ikai ke te fie mate kita ma‘ána. Pea a‘u ai pē ki ha taha ‘ofa, hei‘ilo pe te te fie mate kita ma‘ána. 8‘Osi angé ia, na‘e lolotonga pē ‘etau kei angahalá kuo pekia ‘a Kalaisi ma‘atautolu!
9Pea ‘ikai ngata ai, ka ko e fakalelei ‘a e ‘Otuá mo kitautolu he pekia ‘a Kalaisí, kuo pau ke tau hao ai mei he houhau ‘o e ‘Otuá. 10Na‘e lolotonga pē ‘etau kei fili mo e ‘Otuá, kuó ne fakamelino kitautolu mo ia ‘i he pekia ‘a hono ‘Aló. Pea huanoa ha‘ane fakamo‘ui kitautolu koe‘uhi ko e mo‘ui ‘a hono ‘Aló. He kuo tau vālelei eni kitautolu mo e ‘Otuá. 11Pea ‘ikai ngata ai, ka ‘oku fiefia ‘etau mo‘uí, koe‘uhi ko ‘etau melino mo e ‘Otuá he ngāue na‘e fai ‘e hotau ‘Eikí ko Sīsū Kalaisí.
Ko ‘Ātama mo Kalaisi
12Na‘e kamata ‘a e angahalá ‘i māmaní ko e ngāue ‘a e toko taha. Pea tupu mei he angahalá ‘a e maté. Pea kuo fai angahala ai ‘a e kakai kotoa pē, ‘o pau leva ke nau mate kotoa pē. 13Na‘e te‘eki ai ke tuku mai ‘a e Laó, kuo ‘osi ‘i māmani pē ‘a e angahalá ia. Ka na‘e ‘ikai ke ‘eke ki he kakaí ‘enau angahalá, ko e te‘eki ai ke tuku mai ‘a e Laó. 14Ka na‘e kei pule fakaleveleva ‘a e maté he kakai kotoa pē meia ‘ātama ‘o a‘u kia Mōsese, pea kau ai pē mo kitautolu na‘e ‘ikai ke talangata‘a ki ha fekau tonu ‘a e ‘Otuá, ‘o hangē ko ia na‘e fai ‘e ‘ātamá. ‘Oku hangē ‘a ‘ātama ia ko ha fakatātā ‘o Kalaisi ki muí ni.
15-16Ka ‘oku faikehekehe ‘aupito ‘a e talangata‘a ‘a e toko tahá pea mo e ‘ofa ‘a e ‘Otuá. He ko e talangata‘a ‘a e toko taha, ‘oku fai ai ‘a e tautea mate. Ka ko e ‘ofa ‘a e ‘Otuá, ‘oku lava ke vālelei ai mo ia ‘a kitautolu na‘a tau fai angahalá. 17Na‘e tupunga ‘a e pule fakaleveleva ‘a e maté ko e fai angahala ‘a e toko taha. Ka ‘oku kehe atu pē ‘a e me‘a kuo fai ‘e Sīsū Kalaisí. He ko e fakalelei ‘a e ‘Otuá mo kitautolu ‘ia Sīsū Kalaisí, kae lava ke tau mo‘ui mo kaungā pule mo ia.
18Na‘e tō mai ‘a e houhau ‘o e ‘Otuá ki he kakai kotoa pē koe‘uhi ko e fai angahala ‘a e toko taha. Ka kuo ‘ai ‘e he ‘Otuá ke tau vālelei mo ia mo ma‘u ‘a e mo‘uí koe‘uhí ko e ngāue mahu‘inga kuo fai ‘e ha toko taha. 19Ko e talangata‘a ‘a e tangata ‘e toko tahá, na‘e hoko ai ‘a e kakai kotoa pē ko e angahala. Kae talangofua ‘a e toko taha, ‘a Kalaisi, pea vālelei ai mo e ‘Otuá ‘a e kakai tokolahi.
20Ko e ‘uhinga hono tuku mai ‘e he ‘Otuá ‘a e Laó, koe‘uhí kae mahino lelei ai ki māmani ‘a e ivi ‘o e angahalá. Pea neongo na‘e hoko ‘a e Laó ko e me‘a ke toe fakautuutu ange ai ‘a e angahala, kae fakafeta‘i he na‘e toe fakautuutu ai pē mo e ‘alo‘ofa mai ‘a e ‘Otuá. 21Na‘e pule ‘a e angahalá koe‘uhí ko e hoko mai ai ‘a e maté. Ka kuo fakaleveleva eni e ‘ofa ‘a e ‘Otuá. He na‘e hoko mai ai ‘a e faingamālie ke tau vālelei mo e ‘Otuá. Pea ko ‘etau vālelei mo iá, ko ‘etau ma‘u ia ‘a e mo‘ui ta‘e ngatá, koe‘uhí ko hotau ‘Eiki ko Sīsū Kalaisí.
Currently Selected:
Loma 5: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
