Loma 12
12
Ko e Mo‘ui Fo‘oú
1Kāinga, ko e ‘ofa lahi kuo fai ma‘amoutolu ‘e he ‘Otuá. Ko ia, ‘oku ou kole atu ke mou foaki homou sinó ko e feilaulau mo‘ui ma‘á e ngāue ‘a e ‘Otuá. He ko e lotu mo‘oní ia. 2‘Oua te mou hangē ko e kakai ‘o e maama ko ení. Ka mou tuku ke liliu ‘e he ‘Otuá homou ‘atamaí. Pea ‘e tonu ai ho‘omou fakafuofua ki he ngaahi me‘a ‘e hoa mo hono finangaló.
3Vakai na‘a ‘iloangé kuo mou anga-hiki. Ko ‘eku ‘ai atu eni kiate kimoutolú, he ‘oku ou lave‘i ‘a e ‘ofa lahi kuo fai ‘e he ‘Otuá ma‘akú. Mou mo‘ui fakatōkilalo, mo taki taha ‘ilo‘i ‘a e tui kuo ‘omi ‘e he ‘Otuá ma‘ána. 4Ko e sinó, ‘oku lahi hono ngaahi kupú. Pea ‘oku taki taha hono ‘aonga. 5Ko e fakatātā lelei ia ki he anga ‘o ‘etau nofó. He ‘oku tau tokolahi. Ka ko e ngaahi kupu kitautolu ‘o e sino pe ‘e taha ‘ia Kalaisí, ko e ngaahi kupu fekau‘aki.
6‘Oku tau taki taha pē ‘a e fa‘ahinga ivi kuo ‘omi ‘e he ‘Otuá ke te ngāue‘aki. Ko koe ‘okú ke ma‘u ‘a e ivi fakapalōfitá, faka‘aonga‘i ke a‘u ki he ngata‘anga ho‘o tuí. 7Ko koe ‘okú ke ma‘u ivi ke tokoni‘i ha kakai, fai leva ho‘o tokoní. Ko koe ‘okú ke ma‘u ‘a e ivi ke faiako, fai leva ho‘o faiakó. 8Ko koe ‘okú ke tanumaki ‘a e tui ‘a ha ni‘ihi, fai leva ho‘o tanumakí. Ko koe ‘okú ke ma‘u ‘a e ivi ke taki ha ngāue, fai ke a‘u ho‘o takí. Ko koe ‘okú ke ma‘u ‘a e ivi ke fai ha ‘ofa ki he kakaí, fai loto-fiefia ho‘o ‘ofá.
Ko e Faka’ilonga ‘o e Kalisitiané
9‘Ai ke mo‘oni ho‘omou ‘ofá. ‘Ai ke mou fehi‘a he tō‘onga kovi kotoa pē, kae pipiki he ngaahi tō‘onga kotoa ‘oku taaú. 10Mou fe‘ofa‘aki, he ko e tautehina kimoutolu ‘ia Kalaisi. Mou fefaka‘apa‘apa‘aki. 11Ngāue mālohi. ‘Oua ‘e fakapikopiko, kae tōtōivi he ngāue ‘a e ‘Eikí. 12Fiefia ma‘u ai pē ‘i ho‘omou fakatu‘amelié. Ka hoko mai ha faingata‘a, pea mou kātaki‘i mo lotu ma‘u pē. 13Tokoni ki he kakai lotu ‘oku fusimo‘omó. Pea fakaafe‘i ki homou ‘apí ‘a e kakai muli.
14Kole ki he ‘Otuá ke ne tāpuaki‘i ha taha pē te ne fai atu ha kovi. ‘Io, kole ki he ‘Otuá ke ne tāpuaki‘i, ‘o ‘oua ‘e tauteá. 15Ka fiefia ha ni‘ihi hena, pea mou kaungāfiefia mo kinautolu. Ka mamahi ha ni‘ihi, pea mou kaungāmamahi mo kinautolu. 16Mou anga fakamaheni ngofua ki he kakai kotoa pē. ‘Oua te mou pehē ko kimoutolu pē ‘oku potó. Ko e ‘ulu pupulá ia. ‘Ai ke mou fakamaheni ngofua ki he kakai ‘oku ‘ikai ke ‘iloá. 17‘Oua te mou fetongi ‘a e koví ‘aki ha kovi. Feinga ke mo‘ui ‘aki ha tō‘onga ‘e faifai pea toka‘i ai kimoutolu. 18Fai homou tūkuingata ke vālelei mo e kakai kotoa pē.
19Kāinga, vakai na‘a mou fetongi ‘a e koví ‘aki ha kovi. Tuku pē ki he ‘Otuá ke ne sauni. He kuo tala mai ‘e he ‘Eikí he Folofolá,
“Ko au pē te u sauni ‘enau fai koví.
Ko au pē te u tautea kinautolú.”
20Ko e lau eni ‘e taha ki ai ‘a e Folofolá,
“Ka fiekaia ho filí,
pea ‘oange ha me‘a ke ne kai.
Ka fieinua ho filí,
pea ‘oange hano inu.
He ‘e ongo‘i leva ‘e ho filí
kuo mātu‘aki mate he maá.”
21Vakai na‘a ikuna kimoutolu ‘e he koví. Ka mou ikuna ‘a e koví ‘aki ‘a e leleí.
Currently Selected:
Loma 12: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
