Loma 13
13
Fakaongoongo ki he Kau Taki Fakafonuá
1Mou talangofua ki he kau ma‘u mafaí. He ko e mafai kotoa pē, ‘oku mei he ‘Otuá. Pea ko ia pē kuó ne fakamafai‘i kinautolú. 2Ko e fakafepaki ki he kau ma‘u mafaí, ko e fakafepaki ai pē ia ki he finangalo ‘o e ‘Otuá. Pea kuo pau ke tautea ai kinautolu ‘e he ‘Otuá. 3‘Oku ‘ikai fakafili ‘a e kau ma‘u mafaí ki he kakai fai totonú, ka ko e kakai fai hiá. ‘Oua pē te mou manavasi‘i na‘a fai atu ha kovi ‘e ha kau ma‘u mafai, ka mou fai totonu. Pea te nau faka‘apa‘apa‘i kimoutolu. 4He ko e kau ngāue foki kinautolu ‘a e ‘Otuá. Pea ko honau fatongiá ke tokoni‘i kimoutolu. Toki manavahē koe ki he kau ma‘u mafaí ‘i ha‘o fai ha hia. He ko e fatongia ‘o e kau ma‘u mafai ko iá ke tautea koe. Ko e kau ngāue kinautolu ‘a e ‘Otuá. Pea ko ‘enau tautea‘i ‘a e kau fai hiá, ke hā mahino ai ‘a e houhau lahi ‘a e ‘Otuá he fai hiá. 5Ka ‘e ‘ikai ke sai ha‘amou talangofua kiate kinautolu ko ha‘amou manavahē pē ki he houhau ‘o e ‘Otuá. Talangofua kiate kinautolu ‘i ho‘omou ‘ilo ko e me‘a ia ‘oku totonu ke mou faí.
6Pea mou fai totonu he totongi tukuhaú. Ko e fatongia ‘o e kau ma‘u mafaí ke tokanga‘i ‘a e ngaahi me‘a peheé. He ko e kau ngāue kinautolu ‘a e ‘Otuá. 7Toka‘i mo faka‘apa‘apa‘i kinautolu. Pea totongi homou ngaahi mo‘uá, mo ho’omou ngaahi tukuhau ‘o tatau ai pē pe ko e fa‘ahinga tukuhau hā.
Ko e Fe‘ofa‘aki Fakatautehina
8Vakai na‘a ‘i ai hamou mo‘ua ki ha taha. He ‘oku taha pē homou mo‘uá, ko e fe‘ofa‘akí. Pea ko ho‘omou talangofua kakato ia ki he Lao ‘a Mōsesé. 9‘Oku kehekehe ‘a e ngaahi fekau he Lao ‘a Mōsesé. Ko e ni‘ihi eni, “‘Oua ‘e fe‘auaki. ‘Oua ‘e tāmate. ‘Oua ‘e kaiha‘a. ‘Oua ‘e mānumanu.” Ka ‘oku fakamā‘opo‘opo kātoa ia ‘i he fekau ko eni pē ‘e taha, “Te ke ‘ofa ki he kakai kotoa pē, ‘o hangē ko ho‘o ‘ofa kiate koé.” 10‘E ‘ikai nofonofo ha taha ‘oku ‘ofa ki he kakaí peá ne fai kovi kiate kinautolu. ‘Io, ko e ‘ofá pē ‘oku fekau mai he Laó ke tau faí.
Kuo Ofi ‘e Liuaki Mai ‘a Kalaisí
11Fai ha tō‘onga ‘oku taaú. He kuo mahino lelei kiate kimoutolu ‘a e anga ‘o e ngaahi ‘aho ‘oku tau ‘i aí. Kuo ofi ‘aupito ‘a e ‘aho ‘e fakakakato ai hotau fakamo‘uí. Na‘e ofi mai pē ia ‘i he ‘aho na‘a tau ului ai ki he ‘Eikí. Ka kuo toe ofi ange eni. 12‘Io, kuo toesi‘i ‘aupito pea mafoa mai ‘a e ata ‘o e ‘aho ko iá. Tau tuku mu‘a ‘etau fai ‘a e ngaahi tō‘onga fakapo‘uli. Tau teuteu ke mo‘ui he maama ‘o e ‘aho ‘oku ‘amanaki ke hoko maí. 13‘Ai ho‘omou tō‘onga mo‘uí ke taau. ‘Ai ke hā mahino ho‘omou lata ki he māmá. Vakai na‘a mou kau ‘i ha ngaahi feohi‘anga ‘oku ta‘e taau. Pe te mou konā. Pe te mou fai ha ngaahi tō‘onga palakū mo fakalielia. Vakai na‘a mou mo‘ui feke‘ike‘i mo fakavahavaha‘a. 14‘Aofi kimoutolu ‘aki ‘a Sīsū Kalaisi, ‘o hangē pē ko ho‘omou kofu ‘aki homou sinó kotoa homou valá. Pea te mou toki malu mei he holi ‘a homou kakanó.
Currently Selected:
Loma 13: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
