Popular Bible Verses from Loma 12

Share

‘Oua te mou hangē ko e kakai ‘o e maama ko ení. Ka mou tuku ke liliu ‘e he ‘Otuá homou ‘atamaí. Pea ‘e tonu ai ho‘omou fakafuofua ki he ngaahi me‘a ‘e hoa mo hono finangaló.

Kāinga, ko e ‘ofa lahi kuo fai ma‘amoutolu ‘e he ‘Otuá. Ko ia, ‘oku ou kole atu ke mou foaki homou sinó ko e feilaulau mo‘ui ma‘á e ngāue ‘a e ‘Otuá. He ko e lotu mo‘oní ia.

Fiefia ma‘u ai pē ‘i ho‘omou fakatu‘amelié. Ka hoko mai ha faingata‘a, pea mou kātaki‘i mo lotu ma‘u pē.

Vakai na‘a ikuna kimoutolu ‘e he koví. Ka mou ikuna ‘a e koví ‘aki ‘a e leleí.

Mou fe‘ofa‘aki, he ko e tautehina kimoutolu ‘ia Kalaisi. Mou fefaka‘apa‘apa‘aki.

‘Ai ke mo‘oni ho‘omou ‘ofá. ‘Ai ke mou fehi‘a he tō‘onga kovi kotoa pē, kae pipiki he ngaahi tō‘onga kotoa ‘oku taaú.

Fai homou tūkuingata ke vālelei mo e kakai kotoa pē.

Kāinga, vakai na‘a mou fetongi ‘a e koví ‘aki ha kovi. Tuku pē ki he ‘Otuá ke ne sauni. He kuo tala mai ‘e he ‘Eikí he Folofolá, “Ko au pē te u sauni ‘enau fai koví. Ko au pē te u tautea kinautolú.”

Ngāue mālohi. ‘Oua ‘e fakapikopiko, kae tōtōivi he ngāue ‘a e ‘Eikí.

Vakai na‘a ‘iloangé kuo mou anga-hiki. Ko ‘eku ‘ai atu eni kiate kimoutolú, he ‘oku ou lave‘i ‘a e ‘ofa lahi kuo fai ‘e he ‘Otuá ma‘akú. Mou mo‘ui fakatōkilalo, mo taki taha ‘ilo‘i ‘a e tui kuo ‘omi ‘e he ‘Otuá ma‘ána.

‘Oua te mou fetongi ‘a e koví ‘aki ha kovi. Feinga ke mo‘ui ‘aki ha tō‘onga ‘e faifai pea toka‘i ai kimoutolu.

Mou anga fakamaheni ngofua ki he kakai kotoa pē. ‘Oua te mou pehē ko kimoutolu pē ‘oku potó. Ko e ‘ulu pupulá ia. ‘Ai ke mou fakamaheni ngofua ki he kakai ‘oku ‘ikai ke ‘iloá.

Ko e lau eni ‘e taha ki ai ‘a e Folofolá, “Ka fiekaia ho filí, pea ‘oange ha me‘a ke ne kai. Ka fieinua ho filí, pea ‘oange hano inu. He ‘e ongo‘i leva ‘e ho filí kuo mātu‘aki mate he maá.”

Kole ki he ‘Otuá ke ne tāpuaki‘i ha taha pē te ne fai atu ha kovi. ‘Io, kole ki he ‘Otuá ke ne tāpuaki‘i, ‘o ‘oua ‘e tauteá. Ka fiefia ha ni‘ihi hena, pea mou kaungāfiefia mo kinautolu. Ka mamahi ha ni‘ihi, pea mou kaungāmamahi mo kinautolu.

Tokoni ki he kakai lotu ‘oku fusimo‘omó. Pea fakaafe‘i ki homou ‘apí ‘a e kakai muli.

Ko e sinó, ‘oku lahi hono ngaahi kupú. Pea ‘oku taki taha hono ‘aonga. Ko e fakatātā lelei ia ki he anga ‘o ‘etau nofó. He ‘oku tau tokolahi. Ka ko e ngaahi kupu kitautolu ‘o e sino pe ‘e taha ‘ia Kalaisí, ko e ngaahi kupu fekau‘aki.