1 Tīmote 6
6
1Ko kimoutolu pōpulá, mou faka‘apa‘apa‘i e fa‘ahinga ‘oku ‘anautolu kimoutolú, na‘a fakaongoongokovi‘i ‘e ha taha hotau ‘Otuá mo ‘etau malangá. 2Ko kimoutolu ‘a e kau pōpula ‘a ha kakai tui, ‘oua ‘e hoko ho‘omou lotu fakatahá ko ha me‘a ke mou palahi noa‘ia ai kiate kinautolu. Ko hono mo‘oní, ‘oku totonu ke mou fai ‘enau ngāué ke toe lelei ange. He ‘oku ‘i ai ha ni‘ihi kehe ‘oku ma‘u faingamālie ‘i he‘enau ngāue ‘oku faí, pea ko e kāinga lotu kinautolu ‘oku ‘ofa ai homou kau pulé.
Ko e Fakahinohino Halá mo e Koloa Mo‘oní
Ko e ngaahi me‘a ia ke mou fakahinohino mo malanga‘í.
3Ka ai ha taha te ne malanga‘i ha me‘a kehe, ko ‘ene fehālaaki ia mo e fakahinohino mo‘oni mo faka-‘Otua ‘a hotau ‘Eiki ko Sīsū Kalaisí. 4Ko e fa‘ahinga ko ena ‘oku nau malanga‘i e me‘a kehé, ko e kau ‘ulu-pupula kinautolu. ‘Oku ‘ikai te nau ‘ilo ha me‘a. Ko e kau fie poto ‘oku nau fie faka‘uhi‘uhinga me‘a, ‘o nau fakatupu loto-kovi ai, mo e fakafa‘afa‘ahi, mo e fe‘itangaki, mo e mahalo kovi, 5mo e fetu‘usi. Ko e kakai kuo mahei honau ‘atamaí, pea kuo nau kauhala kehekehe mo e mo‘oní.
‘Oku ‘amanaki ‘a e fa‘ahinga ko iá ko e ‘aonga ‘o e lotú ke te tu‘umālie ai. 6Pea ko e mo‘oni pē te te tu‘umālie ai, ‘o kapau kuó te fiemālie he‘ete me‘a ‘oku ma‘ú. 7Na‘e ‘ikai ke tau ha‘u ki he maama ko ení mo ha me‘a, pea he‘ikai ai pē te tau hiki atu mo ha me‘a. 8Tau fiemālie ā mu‘a he me‘akai mo e vala ‘oku tau ma‘ú. 9Ko e kakai ‘oku holi ke ma‘u me‘á, te nau mo‘ua he ngaahi ‘ahi‘ahi mo e ngaahi fakatauvele ‘o e havala ta‘e fakapotopoto mo fakatu‘utāmaki, pea te nau hinga ai ‘o ‘auha. 10Ko e mānumanu koloá, ko e tupu‘anga ia ‘o e ngaahi kovi lahi. Ko e ‘ātunga ē ‘o e hulu e fie ma‘u koloa ‘a e ni‘ihi, kuo nau lī‘aki ‘aupito ai ‘enau tuí, pea hoko ai pē mo ‘enau mo‘ua he ngaahi mamahi lahi.
Ko e To‘a he Tuí
11Ka ‘okú ke kau koe ia mo e ‘Otuá, ‘e Tīmote. Pea ‘oku taau ai ke ke sītu‘a ‘aupito ki he ngaahi kovi peheé. Vivili koe ia ki he faitotonú, mo e tō‘onga faka-‘Otuá, mo e tuí, mo e ‘ofá, mo e kātakí, pea mo e anga-vaivaí. 12‘Ai ke ke to‘a ‘i ho‘o tuí ka ke ikuna ‘a e mo‘ui ta‘e ngatá. Ko e mo‘ui ia na‘e ui koe ki ai ‘e he ‘Otuá ‘i he ‘aho na‘á ke talaloto‘aki ai ho‘o tuí kae fanongo ‘a e kāinga lotu tokolahi. 13-14Talangofua kakato koe ki he ngaahi tu‘utu‘uni kuo fai atú ‘o a‘u ki he ‘Aho ‘e liuaki mai ai hotau ‘Eiki ko Sīsū Kalaisí. Ko ‘eku tapou atu ia ‘i he funga ‘o e ‘afio mai ‘a e ‘Otuá, ‘a e tupu‘anga ‘o e mo‘ui ‘a e me‘a kotoa pē, pea mo Sīsū Kalaisi, ‘a ia na‘á ne fakahā mahino ‘ene tuí kia Ponitō Pailató.
15Ko e Pulé pē
‘a e ‘Otua mohu lāngilangí.
Ko e Tu‘i ‘o e ngaahi tu‘i,
ko e ‘Eiki ‘o e ngaahi ‘eiki.
Pea te ne fekau ke toe ha‘u
‘a Sīsū Kalaisi
‘i he ‘aho kuó ne tokateu ki aí.
16Ko e ‘Otuá pē taha ‘oku ‘ikai hano ngata‘anga.
‘Okú ne ‘afio ‘i he maama
‘oku ‘ikai ala ofi ki ai ha taha.
Kuo te‘eki mamata ha taha ki he ‘Otuá,
pea ‘e ‘ikai pē ke mamata ha taha ia ki ai.
Kuo pau ke fakahīkihiki‘i ia
Pea ko hono māfimafí,
‘e tu‘uloa ai pē ‘o ta‘e ngata
17Fakatokanga ange ki he kakai ma‘u me‘a ‘o e maama ko ení ke ‘oua te nau hīkisia pe falala ki he koloa ‘oku mole ngofuá. Tala ange kiate kinautolu ke nau tui ki he ‘Otuá, he ‘oku koloa‘ia ia. Pea ‘okú ne tāpuaki‘i kitautolu ‘aki ‘a e me‘a kotoa pē ‘oku fe‘unga ke tau ma‘u ke tau fiemālie ai.
18Fale‘i kinautolu ke fai tūkuingata he ngāue ‘aonga ma‘á e kakaí mo tokoni‘i kinautolu. Fakamanatu ange ki he kakai ‘oku tu‘umālié ke nau nima homo mo fie vahevahe mo ha ni‘ihi ‘enau me‘a ‘oku ma‘ú.
19He ko ‘enau fakatoka ia ha makatu‘unga pau ‘o honau kaha‘ú. Pea te nau ‘ilo leva e anga ‘o e mo‘ui mo‘oní.
20‘E Tīmote, puke ma‘u e me‘a kuo tuku falala atu ‘e he ‘Otuá ke ke tauhí. Faka‘ehi‘ehi mei ha fa‘ahinga talanoa fakaemāmani mo launoa, ‘a ia ‘oku ngali loloto, ka ‘oku ‘ikai.
21Kuo mātu‘aki hē ‘a e tui ‘a e ni‘ihi ko ‘enau falala ki he fa‘ahinga talanoa peheé.
Tauange mo e ‘Eikí ke ne ‘alo‘ofa kiate kimoutolu kotoa pē!
Currently Selected:
1 Tīmote 6: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
