1 Tīmote 5
5
Ko e Fatongia ki he Fa‘ahinga Kehekehe
1‘Oua ‘e valoki‘i ha tangata ‘oku motu‘a ange ‘iate koe, ka ke na‘i‘na‘i pē ki ai, ‘o hangē ko ha‘o na‘ina‘i ki ho‘o tamai tonú. ‘Ai ho vā mo e kau talavou ange ‘iate koé ke hangē ‘oku mou tautehiná. 2Pehē pē ki he kau fefine ‘oku motu‘a ange ‘iate koé, ‘ai ke nau hangē ko ha‘o ngaahi fa‘eé. Faka‘apa‘apa ki he kau finemuí, ‘o hangē pē ko ho‘o faka‘apa‘apa ki ho tuofāfiné.
3Tauhi pē ‘a e kau uitou ‘oku masiva mo‘oní. 4Pea kapau ‘oku ‘i ai ha fānau pe makapuna ‘o ha uitou, pea tauhi pē ā mu‘a ia ‘e kinautolu, ‘o hangē pē ko ‘ene tauhi mai ‘e ia kinautolú, he ko honau fatongia totonu ia mei he ‘Otuá. 5Ko e uitou masiva mo‘oní ‘a e uitou ‘oku ‘ikai hano kāinga ka ‘okú ne tui ki he ‘Otuá mo ne lotu he ‘aho mo e pō ‘o kole tokoni kiate ia.
6Ka ko e kau uitou ‘oku mo‘ui fakausousá, kuo nau ‘osi mate fakalaumālie kinautolu ia, neongo ‘enau kei mo‘ui fakasinó.
7Fakahā ia ki he kāinga lotu kotoa pē koe‘uhí ke nau fai e me‘a ‘oku totonu ke nau faí. 8Pea kapau leva ‘e tuku ta‘e tauhi ‘e ha ni‘ihi honau kāingá, ‘o tautautefito ki honau fāmili ofí, ko ‘enau lī‘aki ia ‘enau tuí. ‘Oku sai ange ‘a e kakai ta‘e tuí he kakai ko iá.
9‘Oua ‘e tohi ko e uitou ha taha kuo te‘eki ai ke ta‘u ono noa. ‘Oua ‘e tohi ha taha na‘e ‘ikai anganofo ki hono malí. 10Tohi pē ‘a e kau uitou kuo ongoongo lelei he ngāue ‘aongá, ‘o hangē ko e ohi fānaú, mo e talitali ‘o e kau ‘a‘ahí, mo e fai fatongia fakakaunanga ma‘á e kāinga lotú, mo e poupou ki he kakai faingata‘a‘iá, mo e fa‘a tokoni he tapa kotoa ‘o e nofó.
11‘Oua ‘e tohi ko e uitou ha kau uitou ‘oku kei īki, telia na‘a nau holi ke toe mali, ‘o afe meia Kalaisi 12‘o lī‘aki ai ‘enau tukupā kiate iá. 13Pea ‘ikai ngata aí ka te nau mo‘ui fakapikopiko ‘o anga‘aki e ve‘e ‘alú, pea hoko ai pē mo ‘enau ngutu lau mo kaunoa, ‘o talanoa holo e ngaahi me‘a ‘oku ‘ikai totonu ke nau talanoa ki ai. 14Ko ia ai, ‘e sai ange kiate au ke fei mo mali e kau uitou kei īki angé ke nau ma‘u fānau, pea tauhi honau ngaahi ‘apí. Pea ‘e ‘ikai leva ke ma‘u faingamālie ‘a e filí ke fakaongoongokovi‘i kitautolu. 15Vakai ange ki he me‘a kuo ‘osi ‘efihia ai e kau uitou kei iiki ‘e ni‘ihi! Kuo nau tafoki ‘o muimui kia Sētane.
16Pea kapau leva ‘oku ‘i ai ha fefine lotu ‘oku nofo ha kau uitou ‘i hono ‘apí, tauhi ‘e ia kinautolu ke ‘oua ‘e kavenga‘ia ai ‘a e siasí, kae lava ‘a e siasí ‘o tauhi e kau uitou kehé.
Ko e Kau Taki Lotú
17‘Oku taau ke totongi liungaua ‘a e kau taki lotu ‘oku lelei ‘enau ngāué, pea tautautefito ki he fa‘ahinga ‘oku fai mālohi he malangá mo e faiakó. 18He ‘oku hange pē ko e lau ‘a e Folofolá, “‘Oua ‘e ta‘ofi e kai koane ‘a e pulu momosi koané.” Mo e taha, “‘Oku taau pē e kau ngāué mo ‘enau totongí.”
19‘Oua ‘e tali ke talatalaaki‘i ha taha taki lotu ‘i ha kovi ‘o kapau ‘oku ‘ikai ke fakamo‘oni ki ai ha toko ua pe toko tolu. 20Ka ‘oka ai ha taha taki lotu ‘e toutou faihala, pea fakatonutonu ia ‘i he lotolotonga ‘o e kāinga lotú ke hoko ko e fakatokanga ki hono toé. 21‘Oku ou fekau atu ‘i he ‘afio mai ‘a e ‘Otuá, mo Kalaisi Sīsū, mo e kau ‘āngelo mā‘oni‘oní, ke ke fai ki he ngaahi fakahinohino kuó u fai atú. ‘Ai ho‘o ngāué ke ma‘a ki he kakai kotoa pē. ‘Oua ‘e filifilimānako.
22‘Oua ‘e ‘oho ke hilifakinima ha taha.
‘Oua ‘e faihala koe‘uhí pē ko e faihala ha ni‘ihi kehe. Pipiki ai pē koe he ‘Otuá.
23‘Oua ‘e inu vai pē, kae ‘ai mo inu ha me‘i uaine ke tokoni ki ho‘o fa‘a langa keté mo e ngaahi alangamahaki kehe ‘okú ke fa‘a puke aí.
24Ko e ni‘ihi, ‘oku ‘efihia leva pē ‘i he‘enau faikoví ‘i he te‘eki ke a‘u ki he ‘aho fakamāú. Ka ‘e toki ‘asi ‘amui ange ‘a e faikovi ‘a e ni‘ihi ia. 25‘Oku pehē pē mo e faileleí. ‘Oku hā ‘a e failelei ‘a e ni‘ihi, pea na‘a mo e failelei ‘oku ‘ikai ke fu‘u haá, ‘e ‘ikai lava ke puli ai pē.
Currently Selected:
1 Tīmote 5: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
