1 Pita 3
3
Ko e Ngaahi Uaifi mo e Ngaahi Husepāniti
1‘Ai ke pehē mo kimoutolu, ngaahi uaifí, mou fakamu‘omu‘a homou husepānití. He kapau ‘oku ‘ikai ke tui ho husepānití ki he Folofolá, te ke fakatafoki mai ia ‘aki ho ‘ulungāangá. He‘ikai toe hela akonaki ha taha ki ai. 2He te ne sio atu ki ho‘o mo‘ui ‘apasia mo anga-nofó. 3Vakai na‘a fakafalala ho faka‘ofo‘ofá ki ha ngaahi me‘a fakasinó, ‘o hangē ko e ngaohi ‘ulú, mo e me‘a teuteú, mo e kofú. 4Kae ‘ai ke ke faka‘ofo‘ofa ‘i loto, ‘aki ho‘o anga-lelei mo anga-malū ma‘u pē. Ko e fa‘ahinga faka‘ofo‘ofa ia ‘oku tolonga, pea mahu‘inga taha ki he ‘Otuá. 5Ko e kau fefine falala ‘Otua ‘o ono‘ahó, na‘a nau kakala‘aki ‘enau fakamu‘omu‘a honau ngaahi husepānití. 6Na‘e pehē ‘a Sela. He na‘á ne talangofua kia ‘Epalahame. Peá ne ui ia ko hono ‘eiki. Ko hono ngaahi ‘ōfefine leva kimoutolu, ‘o kapau te mou faitotonu pea ‘ikai loto-si‘i ‘i ha me‘a. 7Pea kapau ko ha husepāniti koe, peá ke faka‘apa‘apa‘i ho uaifí. Toka‘i ia. He ‘oku pelepelengesi ange ia ‘iate koe. Pea te mo kaungā‘inasi fakataha mo koe he mo‘ui ‘oku foaki ‘e he ‘Otuá. Kapau te mo fai pehē, ‘e ‘ikai ha me‘a ke fakatuta ki ho‘omo lotú.
Ko e Faingata‘a ‘o e Faileleí
8Ka u fakamā‘opo‘opo. Kuo pau ke mou felotolotoi mo feongoongoi. Mou fe‘ofo‘ofani, mo feveitokai‘aki, mo fetukulolo‘aki. 9‘Oua ‘e sauni ha kovi pe ko ha laukovi ‘e fai kiate kimoutolu. Ka mou anga-‘ofa ki he kakai kotoa pē. Pea ‘e tāpuaki‘i ai pē kimoutolu ‘e he ‘Otuá. He ko ‘ene kakai fili kimoutolu. Ko e lau eni ‘a e Folofolá,
10“Kapau ‘okú ke ‘ofa he mo‘uí,
mo fie lakalakaimonū,
pea tuku e laukoví mo e loí.
11Tuku e faikoví kae failelei.
Tūkuingata he fekumi ki he melinó.
12He ‘oku le‘ohi ‘e he ‘Eikí
‘a e kakai ‘oku talangofua kiate iá,
peá ne tali ‘enau lotú.
Ka ‘okú ne fakafe‘ātungia kotoa
‘a e kakai faikoví.”
13Ko hai ‘e lava ha‘ane me‘a kiate kimoutolu, ‘o kapau te mou vēkeveke ke failelei? 14Ka ‘o ka ‘iloangé kuo mou mo‘ua ‘i ha mamahi koe‘uhi ko ho‘omou faileleí, pea ‘e kei tāpuaki‘i ai pē kimoutolu ‘e he ‘Otuá.
Ko ia, tuku ā ho‘omou loto-si‘í mo ho‘omou puputu‘ú. 15Fakalāngilangi‘i mo‘oni ‘a Kalaisi. Pea tuku ke ne ‘Eiki ‘i ho‘omou mo‘uí.
‘Ai ke mou mateuteu ai pē ke tali ‘a e ngaahi fehu‘i ‘a ha taha ‘o kau ki he fakatu‘amelie kuo mou a‘u ki aí. 16Pea ‘ai ho‘omou ngaahi talí ke anga-faka‘apa‘apa mo anga-malū. He kapau te mou fai pehē, ‘e mā leva ‘a e kakai ‘oku nau laukovi atu koe‘uhi ko ho‘omou failelei ‘i ho‘omou muimui ‘ia Kalaisí. 17‘E ngutuhua ange foki ha‘amou faingata‘a‘ia koe‘uhi ko ho‘omou faileleí, ‘o kapau ko e finangalo ia ‘o e ‘Otuá, ‘i ha‘amou faingata‘a‘ia koe‘uhi ko ha‘amou faikovi.
18He na‘e pekia tu‘o taha ‘a Kalaisi
koe‘uhi ko ‘etau ngaahi angahalá.
Ko e mate ‘a e toko taha na‘e tonuhia
ma‘á e kakai ‘oku halaiá,
ko hono tataki kimoutolu ki he ‘Otuá.
Na‘e tāmate‘i ia ‘i hono sinó,
kae fakamo‘ui ‘i hono laumālié.
19‘A ia na‘á ne ‘alu ai ‘o malanga ki he ngaahi laumālie ne tuku pōpulá. 20Ko e kakai ia na‘e talangata‘a ki he ‘Otuá ‘i he lolotonga fo‘u ‘e Noa e ‘a‘aké. Ka na‘e kātaki‘i kinautolu ‘e he ‘Otuá. Ko e toko valu pē na‘e heka ki he vaka ko iá ‘o fakahaofi kinautolu mei he lōmakí.
21Ko e vai ‘o e lōmakí, ‘oku hangē ko e papitaiso ‘oku fakahaofi‘aki kimoutolú. Ka ko e papitaisó, ‘oku ‘ikai ko e fufulu pē ‘a e ‘ulí mei he sinó. Ka ko e tafoki ki he ‘Otuá mo e loto tau‘atāina, koe‘uhi ko e toe tu‘u ‘a Sīsū Kalaisí. 22Kuo ‘i hēvani ‘a Kalaisi. Kuó ne ‘afio he tafa‘aki to‘omata‘u ‘o e ‘Otuá. Pea ‘okú ne pule ai ki he kau ‘āngeló, mo e ma‘u mafai mo e ma‘u tu‘unga kotoa pē.
Currently Selected:
1 Pita 3: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
