1 Pita 4
4
Mo’ui kuo Liliu
Na‘e mo‘ua ‘a Kalaisi he ngaahi mamahi lolotonga ‘ene kei ‘i māmaní. Pea mou mateuteu he te mou mo‘ua mo kimoutolu ‘i ha ngaahi mamahi pehē.
1Ho‘omou mo‘ua he ngaahi mamahi peheé, ko e fakamo‘oni ia kuo tuku ho‘omou fai angahalá. 2Ko e fakamo‘oni ia kuo tuku homou lotó kae fai e finangalo ‘o e ‘Otuá ‘o a‘u ki he ngata‘anga ho‘omou mo‘uí. 3Na‘a mou mo‘unofoa kimoutolu he mo‘ui faka‘otuamaté. Na‘a mou fai e ngaahi anga-ta‘etaau mo fakaekakano. Na‘a mou mo‘ui‘aki e fa‘a kai mo e fa‘a konā pea mo e ‘ulungāanga fakalieliá. Pea a‘u ai pē ki ho‘omou lotu ki he ngaahi tamapua. 4Kuo ‘ohovale eni homou kaungāfaihia ko eé pe ko e hā kuo motuhia ai ho‘omou feohí, pea kuo nau ngaohikovia ai kimoutolu. 5Ka kuo pau ke nau fai ha fakamatala kiate kinautolu ‘i he ‘ao ‘o e ‘Otua ko e fakamaau ‘o e kakai mo‘uí mo e kakai maté fakatou‘osi. 6He ‘oku a‘u pē ki he kakai ne ‘osi maté hono malanga‘i kiate kinautolu e Ongoongo Leleí, koe‘uhí kae nofo ai pē honau laumālié mo e ‘Otuá ‘o ka hili ange hono fakamāu‘i kinautolu he ngaahi me‘a na‘a nau fai ‘i he mo‘uí ni. S Faka’aonga’i Lelei ho Tufakangá 7Kuo vave foki ke ngata ‘a māmani. Ko ia, mou fakapotopoto mo tokanga, koe‘uhi kae lava lelei ho‘omou fa‘a lotú. 8Pea ko e me‘a tēpuú, ke mo‘oni ho‘omou fe‘ofo‘ofaní. He ko e ‘ofá, ‘oku melemo ai ha ngaahi angahala lahi.
9Mou fe‘uhi‘aki, pea ‘oua ‘e fengulungulu‘i. 10Kuo foaki kiate kimoutolu tāutaha ‘e he ‘Otua Mahu Tafeá ha tufakanga makehe ke ke tauhi‘aki ‘a e kakaí. Faka‘aonga‘i lelei ho tufakanga ko iá. 11Kapau ko ho tufakangá ko e pōto‘i lea, peá ke malanga‘i e Folofola ‘a e ‘Otuá. Pea kapau ko ho tufakangá ko e tokoni‘i e kakaí, peá ke fai‘aki ‘a e ivi ‘oku ‘oatu ‘e he ‘Otuá. Fai e me‘a kotoa pē ke fakamālō‘ia ai e ‘Otuá koe‘uhi ko Sīsū Kalaisi, ‘a ia ‘e hau lāngilangi‘ia ai pē ‘o ta‘e ngata. ‘Ēmeni.
Ko e Ngaahi Faingata‘a ‘o e Kalisitiané
12Si‘oku ngaahi kaungāme‘a, ‘oua te mou ‘ohovale ‘i ha‘amou fetaulaki mo ha ‘ahi‘ahi ‘oku hangē ko ha‘amou fou atu ‘i ha afí. 13Mou fiefia ‘i ho‘omou ma‘u faingamālie ke kātaki‘i ha mamahi ‘o hangē ko Kalaisí, koe‘uhí kae fakautuutu ho‘omou fiefiá ‘i he‘ene toe foki lāngilangi‘ia maí. 14Ka ngaohikovi‘i kimoutolu koe‘uhi ko Kalaisi, pea mou lau pē ko homou fakakoloa. Ko e fakamo‘oni ia ‘oku fā‘ofale ‘iate kimoutolu ‘a e Laumālie lāngilangi‘ia ‘o e ‘Otuá. 15Vakai na‘a mo‘ua ha taha ‘iate kimoutolu ‘i ha mamahi koe‘uhí ko ha‘ane fakapō, pe ko ha‘ane kaiha‘a, pe ko ha‘ane kākā, pe ngutu lau. 16Kapau ko ho‘o mo‘ua ha mamahi koe‘uhí ko ho‘o Kalisitiané, pea ‘oua te ke mā ai, ka ke fakamālō ki he ‘Otuá. 17Kuo kamata hono fakamāu‘i ‘e he ‘Otuá ‘ene kakaí. Pea kapau kuo kamata meiate kitautolu ‘ene fakamāú, pea huanoa ha fakalilifu ange ‘ene fakamaau‘i ‘a e kakai ‘oku talangata‘a ki he‘ene Ongoongo Leleí. Hangē ko e lau ‘a e Folofolá,
18“Kapau ko e hao ‘a e kakai faileleí,
ko e mālō pē,
pea ‘e fēfē ai ‘a e kau fai angahalá
mo kinautolu ‘oku ‘ikai ‘apasia ki he ‘Otuá?”
19Kapau ‘oku mou faingata‘a‘ia koe‘uhí ko ho‘omou talangofua ki he finangalo ‘o e ‘Otuá, pea mou tui pē ki homou ‘Eiki Fakatupu falala‘angá, mo failelei ma‘u pē.
Currently Selected:
1 Pita 4: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
