1 Pita 2
2
Ko ha Maka Mo‘ui mo ha Kakai Ma‘oni’oni
1Tuku ‘aupito ho‘omou fai koví. Tuku e loí, mo e mālualoí, mo e fakameheká, mo e laukoví. 2‘Ai ke mou hangē ha fanga ki‘i valevale toki fanau‘í, ‘o fieinua ma‘u pē ki he hu‘ahuhu fakalaumālie haohaoa te mou lava ‘o tutupu hake ai, pea fakahaofi ai homou laumālié. 3He ko e lau ‘a e Folofolá, “Kuo mou ‘osi fakamo‘oni‘i ‘a e fu‘u anga-‘ofa lahi ‘a e ‘Eikí.” 4Mou omi kiate ia, kia Sīsū Kalaisi! He ko ia ‘a e Maka Mo‘ui ‘oku fakata‘e‘aonga‘i ‘e he kakaí, ka kuo fili mo mātu‘aki fakalāngilangi‘i ia ‘e he ‘Otuá. 5Pea ko eni ko e ngaahi maka mo‘ui kimoutolu ‘oku lolotonga langa‘aki ha fale fakalaumālie. Ko ha ha‘a faifekau kimoutolu kuo fakatāpui ho‘omou mo‘uí. Pea ‘e tokoni‘i kimoutolu ‘e Sīsū Kalaisi ke mou ‘oatu ha ngaahi feilaulau ‘e hoa mo e finangalo ‘o e ‘Otuá. 6‘Oku hangē pē ko e lau ‘a e Folofolá,
“Mou tokanga‘i ange!
Te u fakatoka ‘i Saione
ha maka-tuliki faka‘ofo‘ofa mo mahu‘inga.
Pea he‘ikai siva e ‘amanaki
‘a ha taha ‘e tui kiate ia.”
7Ko e kakai kimoutolu ‘oku tui, pea ‘oku mahu‘inga kiate kimoutolu e maka ko iá. Ka ‘oku ‘ikai ke mahu‘inga ia ki he kakai ‘oku ta‘e tuí. Ko kinautolu e kau tufunga na‘a nau lī‘aki e maka ko ia na‘e toki mahino mai tā ko e maka mahu‘inga tahá ia. 8Ko ‘enau humu he maka ko iá koe‘uhí ko ‘enau talangata‘a ki he Folofolá. Ko honau mala ia na‘e tokateu mei tuai.
9Ka ko e kakai kimoutolu kuo fili ‘e he ‘Otuá. Ko e ha‘a faifekau kimoutolu. Ko ha kakai kuo fakatāpui. Kuo tataki mai kimoutolu ‘e he ‘Otuá mei he fakapo‘ulí ki he‘ene maama fakaofó, ke mou fanongonongo ‘ene ngaahi ngūe kāfakafa kuo faí. Hangē ko e lau ‘a e Folofolá,
10“Ko e fa‘ahinga me‘avale pē kimoutolu ‘i he ngaahi ‘aho ko eé.
Ka ko e ‘ahó ni ko e kakai kimoutolu ‘a e ‘Otuá.
Na‘e ‘ikai ‘ofa ha taha ‘iate kimoutolu ‘i mu‘a.
Ka ko eni kuo ‘alo‘ofa ‘a e ‘Otuá kiate kimoutolu.”
Mo‘ui ke Taau mo ha Sevāniti ‘a e ‘Otuá
11Si‘oku ngaahi kaungāme‘a, ‘oku ou kole atu kiate kimoutolu ke ‘oua te mou fakatuituia ‘a e ngaahi holi ‘a homou kakanó, ‘a ē ‘oku fakafetau ki homou laumālié. He ko e kau muli mo e ‘āuhē kimoutolu ‘i māmani. 12‘Ai ke sio atu e kakaí ‘oku taau ho‘omou tō‘onga mo‘uí, neongo ha‘anau kei fakaongoongokovi‘i kimoutolu. He ka hoko e ‘Aho Fakamāú, pea te nau fakamo‘oni‘i leva ho‘omou faileleí, pea ‘e lāngilangi‘ia ai e ‘Otuá.
13Ko e finangalo ‘o e ‘Eikí ke mou fakaongo ki he kau ma‘u mafai kotoa pē ‘i māmani, kae tautautefito kia Sisa, he ko e tu‘i aoniú ia. 14Pea mou fakaongo ki he kau kōvaná. He kuo fakanofo kinautolu ‘e Sisa ke nau tautea ‘a e kakai faihiá mo fakapale‘i e kakai faileleí. 15Ko e finangalo e ‘Otuá ke mou fakangata e ngaahi lau ‘a e kakai fakapo‘ulí ‘aki ho‘omou faileleí. 16Ko e kakai tau‘atāina kimoutolu. Ka ko e kau sevāniti pē kimoutolu ‘a e ‘Otuá. Vakai na‘a mou faikovi koe‘uhi ko e pehē ‘oku mou tau‘atāiná. 17Mou faka‘apa‘apa ki he kakai kotoa pē. ‘Ofa ki he kakai ‘a e ‘Otuá. ‘Apasia ki he ‘Otuá. Pea faka‘apa‘apa‘i e tu‘í.
Ko e Sīpinga e Mamahi ‘o Kalaisí
18Kau sevāniti, mou talangofua ki homou kau pulé, mo anga-faka‘apa‘apa mo‘oni kiate kinautolu, ‘o ‘ikai ki he fa‘ahinga pē ‘oku anga-lelei mo anga-faka‘atu‘í, kae pehe pē ki he fa‘ahinga ‘oku anga-fakaaoaó. 19Pea ‘e tāpuaki‘i kimoutolu ‘e he ‘Otuá, ‘o kapau te mou kātaki‘i ha ngaahi mamahi na‘e ‘ikai te mou kole ki ai koe‘uhí ko ho‘omou fie fai hono finangaló. 20He ko e hā hano ‘aonga ho‘omou kātaki‘i ha mamahi na‘e taau ke mou mo‘ua ai koe‘uhí ko ha kovi na‘a mou fai? 21He na‘e fili kimoutolu ke mou kātaki‘i e mamahí ‘i ho‘omou molomolomuiva‘e ‘ia Kalaisí. Pea na‘e tuku mai ‘e Kalaisi ha sīpinga ma‘amoutolu ‘aki ‘ene kātaki‘i e mamahi ma‘amoutolu.
22Na‘e ‘ikai ke fai ‘e Kalaisi ha angahala,
pe ko ha loi ‘e taha.
23Na‘e fa‘a ngaohikovia,
ka na‘e ‘ikai ke ne feinga sauni.
Na‘á ne mo‘ua he ngaahi mamahi,
ka na‘e ‘ikai ke ne talatuki,
ka ne falala ki he Fakamaau Faitotonú.
24Na‘e fuesia ‘e Kalaisi ‘a e kanongatāmaki
‘o ‘etau ngaahi angahalá.
Na‘e tukifa‘o ia ki he kolosí,
hei‘ilo ‘e tuku ai ‘etau fai angahalá
ka tau fei mo mo‘ui tōnunga.
Ko hono ngaahi kafó mo hono ngaahi volú
kuo mou mo‘ui aí.
25Na‘a mou hangē ha fanga sipi heé.
Ka ko eni kuo fakafoki mai kimoutolu
ke mou muimui kia Kalaisi,
He ko homou Tauhí mo e Le’ó ‘o homou laumālie
Currently Selected:
1 Pita 2: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
