1 Pita 1
1
Ko e Fakafe‘iloaki mo e Lotu
1Si‘i kāinga lotu, ‘A kimoutolu ‘oku movete holo ‘i Pōnitusi, mo Kalētia, mo Kapatōsia, mo ‘Ēsia, mo Pitiniá. Ko au Pita ‘oku tohi atú. Ko e ‘apōsitolo au ‘a Sīsū Kalaisi. 2Ko e ‘Otua ko e Tamaí na‘á ne fili kimoutolu ke mou hoko ko ‘ene kakaí. Pea ko hono Laumālié pē kuó ne fai homou fakatāpuí. Kuo mou mo‘ui talangofua ai kia Sīsū Kalaisi, pea luluku‘aki kimoutolu ‘a hono ta‘ata‘á.
Tauange ke lōlahi atu kiate kimoutolu ‘a e ‘ofá mo e fiemālié.
Ko ha Fakatu‘amelie Mo‘oni
3Tau fakafeta‘i mu‘a ki he ‘Otuá, ko e Tamai ‘a hotau ‘Eiki ko Sīsū Kalaisí. Ko e ‘Otua manava‘ofa lahi ia. He ko ‘ene fokotu‘u ‘a Sīsū mei he maté, ko ‘ene foaki mai ia ma‘atautolu ha mo‘ui ‘oku fo‘ou, mo ha fakatu‘amelie ‘oku mo‘ui mo tu‘uloa. 4Kuo tokonaki ‘e he ‘Otuá ma‘amoutolu ha koloa ‘i Langí. He ko e feitu‘u ia ‘e ‘ikai ke popo, pe maumau, pe mole ai.
5Kuo mou tui kimoutolu ki he ‘Otuá, pea ‘e malu‘i‘aki hono māfimafí kimoutolu ‘o a‘u ki he ‘Aho Fakamuí. Pea te ne toki fakakakato ai homou fakamo‘uí, ‘o fakatatau ki he‘ene fokotu‘utu‘u talu mei mu‘a. 6Pea neongo kuo pau ke mou fepaki mo ha ngaahi faingata‘a, ka te mou fiefia ‘i he ‘aho ko iá. 7He ‘e toki hangē ai ho‘omou tuí ko ha koula kuo sivi‘aki ha afi. Pea ka hili leva ho‘omou faingata‘a‘ia ko iá pea ‘e toki hā mahino mai ai ‘oku mahu‘inga ange ho‘omou tuí he koulá. He ko e me‘a ‘auha ngofua ‘a e koulá. ‘E hā mahino mai ai kuo pau ke foaki atu ha lāngilangi mo ha ngeia lahi ‘o ka toe hā‘ele mai ‘a Sīsū Kalaisí.
8Kuo te‘eki ke mou mamata kia Sīsū. Pea ‘oku ‘ikai te mou mamata ki ai he lolotongá ni. Ka ‘oku mou ‘ofa pē kimoutolu mo tui ki ai. Pea ‘oku vale homou ngutú hono fakamatala‘i ho‘omou loto-māfana mo fiefia 9‘i homou fakahaofi kuo faí. ‘Io, ko e taumu‘a ia ho‘omou tuí, ko e fakahaofi homou laumālié.
10Na‘e tala foki ‘e he kau palōfita ‘i mu‘á ‘a e fu‘u ‘ofa ‘e fai ‘e he ‘Otuá ma‘amoutolú. Pea nau mātu‘aki fekumi pe ‘e anga fēfē homou fakahaofí. 11Na‘e fale ‘a e Laumālie ‘o Kalaisí ‘i honau lotó, peá ne fakahā mai kiate kinautolu ‘a e pau ke mo‘ua ‘a Kalaisi ‘i ha mamahi lahi, peá ne toki a‘usia ha lāngilangi lahi. Pea nau fekumi leva ke ‘ilo pau pe ko hai ‘a Kalaisi, pea ‘e hoko mai ‘afē. 12Ka ko e me‘a pē na‘e fakahā ange kiate kinautolu, ko ‘enau fai fatongiá ma‘amoutolu, kae ‘ikai ma‘anautolu. Pea nau malanga’i kiate kimoutolu ‘a e ngaahi mo‘oni ko ē kuo malanga‘i atu ‘e kinautolu na’anau fanongonongo kiate kimoutolu e Ongoongo Leleí ‘i he ivi e Laumālie Mā‘oni‘oni, ‘a ia ne hifoaki mei Langí. Ko e ngaahi mo‘oni ia na‘e ‘uhinga pē ma‘amoutolu. Ka na‘a mo e kau ‘āngeló ‘oku nau fie ‘ilo ki ai.
Ko Hoto Uí ke Mo‘ui Ma‘a
13Mou tokanga. Mou fakapotopoto. Mou fakatu‘amelie kakato ki he ‘ofa tu‘unga‘a ‘e faka‘inasi ai kimoutolu ‘e he ‘Otuá ‘i he toe hā‘ele mai ‘a Sīsū Kalaisí. 14‘Ai ke mou hangē ko ha fānau talangofuá. ‘Oua ‘e kei pule ‘i ho‘omou mo‘uí ‘a e havala ‘a homou lotó. 15Ka mou nofo pē ko e kakai ma’oni’oni ‘a e ‘Otuá. He ‘oku ma‘oni’oni ‘a e toko taha na‘á ne ui kimoutolú. 16Ko e ‘uhinga foki ia ‘oku pehē ai he Folofolá, “Ko e ‘Otua ma’oni’oni au. Pea mou ma‘oni’oni mo kimoutolu.”
17‘Oku mou lau e ‘Otuá ko ho‘omou Tamai. Ka ‘oku ‘ikai foki ke filifilimānako ‘a e ‘Otuá ia. He ‘okú ne fakamāu‘i e kakai kotoa pē ‘o fakatatau ki he‘enau tō‘onga mo‘ui taki taha. Ko ia, mou ‘apasia ki he ‘Otuá ‘i ho‘omou kei nofo muli ‘i māmaní. 18Kuo ‘osi huhu‘i kimoutolu mei he fa‘ahinga mo‘ui taumu‘avalea na‘e tukufakaholo mai mei ho‘omou ngaahi kuí. Pea na‘e ‘ikai foki ke totongi‘aki homou huhu‘í ha koula, pe ko ha siliva, pe ko ha toe koloa ‘auha, 19ka ko e ta‘ata‘a mahu‘inga ‘o Kalaisi, ko e lami na‘e ‘ikai hano mele pe ‘ila. 20Na‘e te‘eki ai ke fakatupu ‘a māmaní, kuo fili ia ‘e he ‘Otuá pea kuó ne hā‘ele mai ‘i he kuonga faka‘osi ko ení koe‘uhí ko kimoutolu. 21Ko ena kuo mou tui ‘iate ia ki he ‘Otuá, ‘a ē na‘á ne fokotu‘u ia mei he maté mo fakalāngilangi‘í. Pea kuo tāfataha ai ho‘omou falalá mo ho‘omou ‘amanakí ki he ‘Otuá. 22Kuo mou talangofua ki he mo‘oní, ‘o ma‘a ai ho‘omou mo‘uí pea mo‘oni ho‘omou ‘ofa he kakai kehe ‘oku tuí. ‘Ai mu‘a ke fakamātoato ai pē ho‘omou fe‘ofo‘ofaní. 23He kuo fanau‘i fo‘ou kimoutolu ‘e he ‘Otuá ‘aki ‘ene folofola mo‘ui mo ta‘e ngatá. 24He ko e lau ē ‘a e Folofolá,
“Ko e tangata mo e fefine kotoa pē
‘oku hangē ko e musié.
Ko honau lāngilangí
‘oku hangē ko e fisi‘i‘akau vaó.
‘Oku mae e musié,
pea ngangana hono laú ki he kelekelé.
Ka ko e tō folofola kotoa ‘a e ‘Otuá,
‘E tolonga ai pē ‘o ta‘e ngata.”
25Ko e Folofola ē ‘a e ‘Otuá, ‘a e Ongoongo Lelei na‘e fai atu kiate kimoutolú.
Currently Selected:
1 Pita 1: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
