ROM 6
6
Khelna a shina leh Khrist a hinna
1Tua ahileh bang igenta diei? Hepina apun semna dingin, khelna ah ium ngitnget ding uh adiei? 2Um ngitnget lou e! Eite khelna a shisate, bangchin khelna ah ihing thei nalai diei? 3Eite Khrist Jesu a baptis a um poumate khu A shina ah baptis in i um uh chi theilou na hi uoi mah. 4#Kolo. 2.12Tuaziehin Pa thupina in mishi lah a kipat in Khrist a kaithaw banga eite zong hinna tha a i hin theina dingun ashina ah baptis in ama toh vuiin i um uhi.
5Aziehpen a shina kibatpi a ama toh ina kizoptah u’leh, athawkiana kibatpi in zong ikizop ding uhi. 6Khelna tahsa mangthai sah a ium theina dingin leh khelna suoh a i um nawnlouna dingun i mihing lui uh Ama toh kilbeh in a um hi, chi ithei uhi. 7Aziehpen koizong a shisa mi pen khelna apat zalensah ahita hi. 8Eite Khrist toh shikhawm i hitaah u’leh, Ama toh hin zong i hinkhawm ding uh ahi chi i gingta uhi. 9Khrist khu mishi lah a kipat kaithawin a um a, ashi nawn sih ding chi ithei a, shina in atung ah thu anei nawnta sih hi. 10Ashina khu khelna lam thu ah kumtawn a dinga khatvei shi ahia, hinanleh ahinna pen, Pasian lam ah ahing ahi. 11Tuabangmain noute zong khelna lam thu ah ashisa in kingai unlen, hinanleh Pasian lam ah pen i Mangpa Jesu Khrist zal in ahingin kingai un.
12Tuaziehin na tahsa uh deigawnate na zui na ding un, na tahsa uh shithei ah khelna in vaihawm sih heh. 13Na tahsa hiengte uh zong dihtatlouna vanzah ding in khelna kungah pe sih un; hinanleh mishi lah a kipat a hing kia bangin, Pasian kungah kipie unlen, na tahsa hiengte u’zong dihtatna vanzah dingin Pasian kungah pe zaw un. 14Aziehpen khelnain na tung uah, thu anei nawn sih ding hi, aziehpen dan nuoi a um na hisih ua, hepina nuoi a um na hizaw uhi.
Khelna suoh apat Pasian suoh
15Ahileh bang chita ding? Dan nuoi a um hilou a, hepina nuoi a um i hiziehin, i khiel ding uh ahi diei? 16Khiel laizang lou e. Shina dinga khelna suoh hiin, dihtatna dinga thumanna suoh hitahleh, koipou kungah zong thumang dinga suoh a na kipiehlut chiengun, athu na manpa uh suoh na hi uh chi, na kithei sih uh amah? 17Hinanleh Pasian kungah kipahthu um hen, khelna suoh na hinan ulachin zong, noute hing kipie kihilna thu dan khu lunglut tahin na zuita uhi. 18Khelna akipat zalensah in na hing um ua, dihtatna suohte na hing hita uhi. 19Na tahsa uh hatlou ziehin, mihing dan in ka gen ahi; na tahsa hiengte uh sienthoulouna leh gitlouna kunga suoh dinga nana pieh bangun, tuin na tahsa hiengte uh sienthouna dingin dihtatna kungah suoh dingin pie un.
20Aziehpen khelna suohte na hilai un, dihtatna lam apat nana zalen uhi. 21Ahileh tua na silzumpite uah, tua hun lai in ga bang ahiei na nei uh? Tua silte tawpna khu shina ahi. 22Hinanleh tuin khelna akipat zalensah in na umta ua, tualeh Pasian suohte na hing hi nua un, sienthouna khopin ga na nei ua, atawpna khu kumtawn hinna ahi. 23Aziehpen khelna thaman shina ahi, hinanleh Pasian silthawnpieh khu i Mangpa uh Jesu Khrist ziehin kumtawn hinna ahi.
Currently Selected:
ROM 6: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.