ROM 7
7
Dan a shina khu Pasian lam a hinna
1Unaute aw, dan in mi adam sung teng atungah thu aneikhum ahi chi na thei sih uh amah? (Dan thei mite kunga ka gen ahi.) 2Tambangin, numei pasal neisa khu apasal damsungsie dana apasal a kaanin a um ahi; hinanleh apasal ashi leh pasal lam thu ah dan akipat zalensahin a um hi. 3Tuachi’n apasal dam na lai pi a, mi dang akitenpi leh angkawmnu akichi ding hi; hinanleh apasal ashi leh tua dan akipat in a zalenta a, mi dang toh kiteng nanleh angkawmnu ahi sih ding hi. 4Tuaziehin sanggamte aw, Pasian lam a ga inei theina dingun, mi dang khat mishi lah a kipata kaithaw a umpa na kitenpi theina ding un, Khrist tahsa ziehin noute zong dan lamah ashi na hing hita uhi. 5Tahsa a i um lai un, dan zieha khelna utna hing piengdohsahten, itahsa hiengte ah shina khop ga suong dingin na asem leeng hi. 6Hinanleh tuin vang eite hing na tuden dan khu i shisantah ziehin, tua dan akipat hadohin i umta hi, laigel lui bang bep hilouin, Hagau a thana toh nna i sep theina dingin.
Dan in hing hundam theilou
7 #
Pawt. 20.17; Danp. 5.21 Ahileh bang igenta diei le? Dan khu khelna ahi diei? Hi vawtlou! Hinanleh dan zieh a thei hisihleh khelna kichi theilou ding hi-inga; dan in eng sin, na chi sihleh “Ken enna khu khelna ahi” chi ka thei sih ding hi. 8Hinanleh khelnain thupieh zieh a hun lemtang muin, ka sungah enna chinteng a umsah hi; dan umlouin khelna khu ashi ahi. 9Khatvei lai in Kei danlouin kana hinga, hinanleh thupieh ahing umtah in keima a um khelna ahing haldoh kia a, Kei ka shita hi. 10Tuachi’n hinna dinga thupieh khu, shina ding ahing hizawta chi ka theidohta hi. 11#Siem. 3.13Aziehpen khelnain thupieh zieha hun lemtang muin ahing sola, thupieh zangin ahing sulumta hi.
12Tuaziehin dan asiengthou a, thupieh zong asiengthou a, adih in ahoi hi. 13Ahileh sil hoi khu kei a dinga shina hing hita adiei leh? Hilou e! Hinanleh khelna khu khelna a akilat theina dingin, khelnain silhoi zangin keima ah shina ahing semdoh hi; Khelna khu thupieh zieh a khelna nasatah ahing hitheina ding in. 14Dan pen hagau lam sil ahi chi i thei hi, hinanleh kei pen tahsa mi, khelna suoh a khohsa ka hi. 15#Gal. 5.17Ka silbawl pen ka theisiem ngai sih hi aziehpen sil ka bawl utpen ka bawl sih a, hinanleh ka huotpen ka bawlzaw zel hi. 16Tua ahileh, ka silbawl pen ka huotpen ahileh, dan ahoi chia zui ka ahita hi. 17Tua silbawlpa khu kei ka hi nawn sih a, ka sunga um khelnain abawl ahizaw hi. 18Aziehpen Keima ah (ka tahsa ah) silhoi malmal ateng sih chi ka thei hi; silhoi bawl ut ka nei a, hinanleh silhoi bawl theina ka nei sih hi. 19Aziehpen silhoi ka bawl utpen ka bawl sih a, hinanleh silhoilou ka bawl utlou pen ka bawlzaw zel hi. 20Ka utloupen ka bawl chiengin abawlpa keima ka hisih a, khelna keima a um bawl ahizaw hi.
21Tuachi’n tami dan ka hing theidohta; silhoi ka bawl ut chiengin, gitlouna keima ah ahing um zel hi. 22Aziehpen ka sunglam mi hinna giltahin, Pasian dan tungah ka kipah hi. 23Hinanleh ka tahsa hiengte ah, ka lungsim dou a nasem, dan dang khat a um hi chi ka thei hi; Tua ka tahsa hiengte a um khelna dan kungah suohin ahing pui zel hi. 24Mi genthei hina lawmlawm ing e, Tam shina tahsa laha kipat koi ahiei hing lakhe ding? 25I Mangpa Jesu Khrist ziehin Pasian kungah kipahthu ka gen hi. Tuachi’n Keima’n ka lungsim tahtahin Pasian dan ka sem a, hinanleh ka tahsa in khelna dan ka sem hi.
Currently Selected:
ROM 7: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.