ROM 5
5
Siemtansahna gate
1Tuaziehin ginna zieha siemtansah a um in i Mangpa uh Jesu Khrist vangin Pasian toh kilem in i um uhi. 2Ama ginna zieh main eiten hepina huongsung lut theina ineita uhi, tuin eite tua hepina ah iding uhi, tualeh Pasian thupina a kinem in nuomin zong i um uhi. 3Tuami guoh hilouin, gimthuohnain kukalna apiengsah hi chi theiin, gimthuohna ah zong ikipah uhi. 4Tualeh kukalnain theichienna asiem a, theichienna in kinepna asiem hi, 5Kinepna in ahing lungkesah sih a, aziehpen tua Hagau Siengthou ikung ua ahing piehin Pasian itna ilungtang uah asungbuo hi.
6Aziehpen ihatlou lai in, ahuntahin Khrist khu Pasian ngaisah loute dingin ahing shita hi. 7Midihtat tanga shingam mi akikhat dinga hinanleh mi hoi tanga shingam mi aum khamaw sih ding hi. 8Hinanleh mikhiel ihi lai nangawn in zong, Khrist itaanga ahing shina ah Pasian in ahing itna khu phat taah in alangsahta hi. 9Tuaban ah asisana siemtansah a i um nuain Ama ziehin Pasian thangpaina apat in hundam in i um ding uhi. 10Aziehpen melma ihi lai a bawn A Tapa shina zieh a Pasian toh kilem ihitah u’leh, kilem a iumzaw nua un, ahinna ziehin hundam in i um zaw sem ding uhi. 11Tuami guoh hilouin, tua kilemna hing musahpa i Mangpa Jesu Khrist ziehin Pasian ah nuomin i um uhi.
Adam zieh a shina, Khrist zieh a hinna
12 #
Siem. 3.6
Tuaziehin mi khat ziehin leitungah khelna ahing lut a, tualeh khelna zieh in shina ahing lut a, tualeh mi zousie ana kheltah ziehin, shina in mi zousie ajelsuohta hi. 13Aziehpen dan um masang tanin khelna leitung ah a umta hi, hinanleh khelna umlou laiin khelna khu khelna a ngai ahisih hi. 14Ahivang in Adam akipata Mosi tandongin, Adam khelna banga silbawlkhiel loute tung nangawn ah zong shinain vai ahawm hi. Adam khu ahing pei dingpa etsahna ahi. 15Hinanleh silthawnpieh khu gitlouna toh kibang ahisih hi, aziehpen mi khat gitlouna zieha bawn mi tampi ashileh, Pasian hepina leh mi khat Jesu Khrist hepina zieh a silthawnpieh khu mi tampi tungah vuain a um ngei ding hi. 16Tualeh silthawnpieh khu, mi khat khelna zieh a sil hing um toh akibang sih hi; aziehpen siemlou tansahna thukhenna khu mi khat ziehin ahing um a, hinanleh silthawnpieh khu khelna tampite ziehin siemtansahna dingin ahing um zaw hi. 17Mi khat tatkhelna zieh a shina in, tua mi khat ziehma a vai ahawm leh, Pasian hepina kiningching leh dihtatna silthawnpieh muten mi khat Jesu Khrist ziehin hinna ah vai ahawm ngei ding uhi.
18Tuaziehin mi khat tatkhelna zieh a siemlou tansahna thukhenna khu mi zousie tungah ahing um a; tuabangmain mi khat dihtatna silbawl ziehin hinna muna dingin siemtansahna silthawnpieh khu mi zousie tungah ahing um hi. 19Aziehpen mi khat thumanlou zieh a mi tampite mikhiel akihisah mabangin, mi khat thumanna ziehin mi tampite midihtat hisah ahi ding uhi.
20Tuathamlou in gitlouna atam semna dingin dan ahing umbelap na lai a, hinanleh khelna apunna phot ah, hepina zong apung zawsem hi. 21Khelnain shina a vai ahawm mabangin hepina in dihtatna zieh a vai ahawm theina dingin, hepina in i Mangpa Jesu Khrist ziehin kumtawn hinna ahing tun hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.