KAMHÔKA 6
6
Kītīön
1Ngaich yik kūön Israĕl nö la-evṙen tö tötlöök nö i kūö ngam Mā Tēv: ngaich kēten cha ngam Mā Tēv nö sat samyeūheu nö eltī aṅ Mītīa. 2Mihôiṅ tī ngaich yik aṅ Mītīa nö lā-al Israĕl: ngaich kūö yik aṅ Mītīa yik kūön Israĕl nö vī chūökre tö kinluhu nö i nuk rôngö, tökiröng nuk töngëḵ inrē chūökö. 3Ngaich ngö inlahen angū-ö, hē yik Israĕl nö teūich, ngaich yik aṅ Mītīa nö yih, tö yip aṅ Amelek, tö yip kūön aṅ lā chuhöt inrē; yih cha-a nö lā-al cha; 4Iyöngtöre cha-a ngaich nö lā-al cha, ngaich halëlngö nuk ṙòng ngam tumlat, nö sölngö nö i Kāsā, öt ṙātö nyā-aṅkūö yik Israĕl, öt rēhĕn sīṅp, öt rēhĕn nuā, öt rēhĕn köttö. 5Pò cha nö yih nö kumtö nuāre rūkuire inrē, yih cha-a sā mufākö töṙôngöre; acha-a nyöre tö nuk ūṅt cha öt kanṙeūken: yih cha-a nö im panam nö halëlngen e. 6Ngaich yik aṅ Israĕl nö yāichngen tökūö yik aṅ Mītīa; peunyhökūö ngam Mā Tēv ngaich yik kūön Israĕl.
7Ngaich hē yik kūön Israĕl nö peunyhökūö ngam Mā Tēv tökūö yik aṅ Mītīa, 8Ngaich tīntö Pròfĕt ngam Mā Tēv nö in yik kūön Israĕl: ngö ṙô anga-aṅ tö cha, Ngö ṙô an ngam Mā Tēv, ngam Tēv Israĕl, Kē-ĕ meh chin ṙā-ang el ap patī inkövö; 9Ṙānyen meh chin inrē ṙā-ang eltī yip aṅ Aikup, ṙā-ang eltī yip mahakihten yīö nö ṙòkhöre, ngaich ahōngen cha nö ṙā-ang i kūö yīö, kē-ĕkūö yīö inrē tö panam cha; 10Ngö ṙô chin ngaich tö yīö, Tēv yīö chin chū-ö Mā Tēv; uh yin pa-ekūö tö nup tēv aṅ Amôr yip tö iyöngö panam tö yīö: ngaich rö-ö yī-ö hang ṙô chu.
11Ngaich yih ök ma-ahānga aṅ im Mā Tēv, ngaich ūichngöre nö elkatòh ök ōk mi-i Ôfrah, Yô-as ök minë-eny ò aṅ Apiēsör ngaich Kītīön ök kikōnyö kūön ò nö piṙōng ṙòng vīt nö ik kinrān vāin, nö hayunngö e tö yik aṅ Mītīā. 12Meūkö ngaich tö ò ök ma-ahānga aṅ im Mā Tēv, ngö ṙô anga-aṅ tö ò, In meh An ngam Mā Tēv më-eṅ tökalēḵ tarik öm tömihôiṅ. 13Ngaich ngö ṙô Kītīön tö ò, Ō Mā chu, yē ngam Mā Tēv nö in ih, kūöyòh pönri në lāinyngen nö in ih? Isuh nuk inrē pinngangkūö la-en nuk tö-eūka tö yik muvöhngö ih, nö ngö ṙô, Röh ang misī ngam Mā Tēv nö kēnyen hī ṙā-ang Aikup? Ngaich pöri töngamuh ngam Mā Tēv nö kavalngen ih, kēten ih inrē eltī aṅ Mītīa. 14Hatīönken ò ngaich ngam Mā Tēv, ngaich ngö ṙô, Kuṙòh i ngih kumlēḵ man kiröönngöre, hayöölen Israĕl ṙā-ang eltī yip aṅ Mītīa: röh öich chū-ö tamīnngen meh? 15Ngaich anga-aṅ nö ngö ṙô tö ò, Ō Mā, aṅtī tö yòh öich min hayöölen Israĕl? Yĕh meuk, manā-angkūö yanāchö öp mupīhö chu nö in Manāsē, ngaich chū-ö inrē tökūönö kūö yip aṅ patī öp yöng chu kikōnyö. 16Ngaich ngam Mā Tēv nö ngö ṙô tö ò, Kô-en chin min in meh, ngaich më-eṅ min fëlngö yip aṅ Mītīa sā nyaha töng hĕng tak tarik. 17Ngaich ngö ṙô anga-aṅ tö ò, Yē chu tö inkôluṙô öich i kūö meh, hameukhömat chu yēḵ töp hĕng minkahngö tö meh öm më-eṅ va-me-eṅkūö chu. 18Vë-ekūö meh chin, uh man kē-ĕngre ihih, hanöng saha chu yih in meh, öich kumtö öp tökētu, ngaich ṙātö e nö i kūö meh. Ngaich ngö ṙô anga-aṅ höngngöh chin hanöng saha meh yih hēk.
19Kuhēthötre ngaich Kitīön, ngaich halēn ök kun pököre, hĕng nyanum inrē ök atra tötaföhlöng ṙôti: chaplö ök alaha anga-aṅ nö el kuvôkö, asëlö ök hūt inrē nö el tanīöyö, ngaich kēnyen e nö in ò nö elkatòh ök ōk, ngaich kēten e. 20Ngaich ngö ṙô tö ò ök ma-ahānga aṅ im Tēv, Kē ngam alaha man tö minë rôti inrē tötaföhlöng, ṙātö u i kui ngòh ihong, ṙösnyö ngam hūt inrē ngaich ngatī tī anga-aṅ. 21Ngaich ök ma-ahānga ngam Mā Tēv nö sōngtörit tinkung re nö eltī ò, ngaich sūöhkö ök alaha tö nuk tötaföhlöng rôti; hūlökūö ngaich ök tameūyö nö löklö kui ök Ihong, ngaich ṙāpngö kūö tök alaha tö nuk tötaföhlöng inrē rôti; ṙā-ang i kūö ò ngaich ök ma-ahānga aṅ im Mā Tēv nö chaṙēviṙen. 22Meuklöre ngaich Kitīön tö ò nö ma-ahānga aṅ im Mā Tēv; Aōla Ō Mā Tēv! Ngö ṙô ang Kitīön, Pò chu ngaich kôtamat meuk kūö ma-ahānga aṅ im Mā Tēv. 23Ngaich ngam Mā Tēv nö ngö ṙô tö ò, Lanāmö yēḵ in meh; um pa-ekūö: öthō man kapah. 24Ngaich Kitīön nö vīlö tahāklö im Mā Tēv, ngaich kaheūkö e nö Yavē Salom; ōtren ap töngamuh nö i Ôfrah yip aṅ Apisārī.
25Ngaich im hatööm e angū-ö, ngaich ngam Mā Tēv nö ngö ṙô tö ò, Kē kōiny nuā ap yöngre man kikōnyö, ap innët nòng kōiny nuā ap tösāt samyeūheu ṙēti tiṙölngö ngam tahāklö Pē-al ap ip yöng meh kikōnyö, kūöltö ap Asēra ap ël e: 26Ngaich vīlö tahāklö ngam Mā Tēv ngam Tēv meh nö i kūi ngih töngëḵ chūökö, lēnö tī, ngaich kē ap innët nòng kōiny nuā, kētö töföngö tökētu nö ngòh tö nup chōn Asēra öp tökūöltu tö meh. 27Söm tak ngahôṅ ngaich Kitīön tö tarik aṅ i yik kūön alaha ò, ngaich asā ṙô ngam Mā Tēv nö vë-ekūö ò: ngaich kūö ò nö pa-ekūö tö yik aṅ patī ök yöng ò yik tarik inrē aṅ ngam elpanam, lökten ò nö ötkô tösakāmö nö la-evṙen tö e, ngaich höng hatööm anga-aṅ nö la-evṙen tö e.
28Ngaich hē yik tarik aṅ ngam elpanam nö choholre tö peuheū nö ka-euilökūö, meūkö ngaich ök tahāklö Pē-al nö taṙōli, kūöltu inrē Asēra ök më-ël e kētu inrē ök kōiny nuā innët nòng nö el ök tövīlöng tahāklö. 29Ngaich ngö ṙô cha-a tö höö, Tī chīö öng vöh ngih? Keuheūthëṙen cha-a nö hatönken e, ngaich ngö ṙô, Tī Kitīön an öp kikōnyö kūön Yôas. 30Ngaich ngö ṙô yik tarik aṅ elpanam tö Yôas, Kēnyö öp kūönre man kikōnyö, hòṅ ò nö kapah: pò ò nö tiṙōlngö ngam tahāklö Pē-al, kūö ò inrē nö kūöltö ök Asēra ök me-ël e. 31Ngaich Yôas nö ngö ṙô tö yik lā-al ò tö sökhaka nö in ò, Hòṅ hayööken ò öyih? Anga-aṅ öp töhòṅ ve-elkui ò, hökngen ò nö kumphaha i saha e nö ṙòngmö peuheū: yĕn tēv anga-aṅ, hökngen ò nö ve-elkuire, pòn hĕng tak ap tumṙōlngö ngam tahāklö ò. 32Lökten anga-aṅ ik sakāmö angū-ö nö kaheūkö ò nö Yērūpē-al nö ngö ṙô, Hökngen Pē-al nö lā-alkūö ò, tön tiṙōlngö ngam tahāklö ò an.
33Ngaich ṙòkhöre yik aṅ Mītiā yik aṅ Amelek inrē tö yik kūön aṅ lāchuhöt nö hamūlöre, havāngöre ngaich cha-a ngaich iyöngtöre nö el Achāṙö Yesrīl. 34Teunghökui Kitīön pöri ngam ma-alaha aṅ im Mā Tēv; föönyö kūö ök römpet ngaich anga-aṅ; ngaich yik Apīsarī nö hamūlöre nö tömrit ò. 35Tīnngö ma-ahānga ngaich anga-aṅ nö i Manasē nö keuheūt chūökre; hamūlöre cha-a inrē nö tömrit ò: Tinngö ma-ahānga inrē anga-aṅ nö i Asēr i Sepulòn, i Naftalī inrē; ngaich yih cha-a nö höngkūö cha.
36Ngaich ngö ṙô Kitīön tö ngam Tēv Yē meh min lökten eltī chu hayöölen Israĕl, sāṙô meh ngaich, 37Yĕh meuk, ṙātö ngih chin tösā tūsā sanôi sīṅp nö el ngam chūök pinṙōngö sāiny; ngaich yē ngam sanôi min nöng angū-ö tötachāmu aṅ kui, ngaich nyôṅ nö keuheūtngöre nö el tumlat, ngaich chū-ö min akahalōn tö meh lökten eltī chu hayöölen Israĕl, sā ṙô meh ngaich. 38Ngaich ngatī angū-ö pòn kaeūilökūö anga-aṅ nö choholre im huṙöich, ngaich hamūl nuk sanôi, kicheūichnyö öp tacham ngaich nö ṙā-ang i nuk sanôi, tööḵlö ngaich ök töchilū pingāṅl tö mak. 39Ngaich Kitīön nö ngö ṙô tö ngam Tēv, Uh man yēḵ hūlökūö lanīnö in chu, töich ṙô-òv hēk tö ngih höng hĕng töreheuh: Vë-ekūö meh chin halöngten chu kala höng hĕng töreheuh i në sanôi sīṅp; hökngen minë sanôi sīṅp yēḵ nö nyôṅ, hökngen ap tacham pöri nö keuheūtngöre chūök nö el tumlat. 40Ngaich ngati tī ngam Tēv ik hatööm angū-ö: pòn höng nuk sanôi sīṅp tönyôṅ, tachāmu pöri nö el tumlat nö ṙòkhöre.
Currently Selected:
KAMHÔKA 6: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
