KAMHÔKA 7
7
Mihôiṅ Kītīön Tö Yik Aṅ Mītīā
1Ngaich Yerūpē-al, (ang Kitīön) ṙòkhöre inrē yik tarik yik mī-in ò, ka-euilökūö nö chōholre, ngaich iyöngtöre nö ranghö öp töhëmlö mak Haròt; lā kapā cha ök elyöngö yik aṅ Mitiā, ranghö öp rung Mōrēh nö el achāṙö. 2Ngö ṙô ngaich ngam Mā Tēv tö Kitīön, Pōyen yin më tarik in meh tökētu eltī tö chu tö vē aṅ Mītiā, ngaich yip aṅ Israĕl nö eū-eure min nö in chu, nö ngö ṙô, Ngih kël chu aṅ mahyöölen chu. 3Lökten yĕh kuṙòh, ahangnyö el nang yip tarik, ngö ṙô, Öp töpa-ekūö tötarūka alaha inrē, hökngen ò nö havanritrenö kiröönngöre nö ṙāngö kui ngam rôngö Kilīöt. Ngaich nët anāi nët köny yik umuh tarik mahavanritre; söm köny yik umuh tö ōtre.
4Ngö ṙô ngaich ngam Mā Tēv tö Kitīön, ṙòngmö pōyen yin më tarik; kēten cha man im mak, töich ṙënngen meh chū-ö kalaha cha: ngaich mīnö, yip ṙô chu min tö meh, cha-a min vē kumröönngöre nö in meh, ngaich acha-a kumröönngöre nö in meh; ngaich öp ṙô chu min tö meh, Ötkiröönngöre ön ngòh nö in meh, ngaich anga-aṅ min nö öt kiröönngöre. 5Lökten ò nö kētö yik tarik nö ik mak: ngö ṙô ngaich ngam Mā Tēv tö Kitīön, öp kumrak ngam mak tö litākre, nö sā kūö am nö kurak, anga-aṅ min töhakösiṙen tö meh: ngatī inrē öp samimtö kui kinmônöre nö sōntöre nö òk. 6Lūöyòng ngaich yik tarik töhukurākö, māha òkkūöre nö eltīre: ṙòkhöre pöri yik chööḵṙen tarik nö sōnngöre nö simtö kui kinmônöre nö òk mak. 7Ngö ṙô ngaich ngam Mā Tēv tö Kitīön, Lökten i më tölūöyòng tarik chin min hayöölen yīö më töhukurākö, öich kēten më aṅ Mītiā nö eltī meh: hökngen më tarik nö kö kiröönngöre nö i chūökre. 8Kē nuk nyā-aṅkūöre ngaich yik tarik nö eltīre tö nuk fanöö cha inrē: ngaich anga-aṅ nö tīnngö yik tarik Israĕl nö ṙòkhöre nö kö chuh el inrūkuire, hangöhöyö pöri yik tarik tölūöyòng: lātaṙeū ök tö ò elyöngö yik aṅ Mītiā nö el achāṙö. 9Ngaich im hatööm angū-ö, ngam Mā Tēv nö ngö ṙô tö ò, Choholre, peūtöre man im elyöngö; tön kēten e chin nö eltī meh. 10Yē meh pöri pa-ekūö peūtöre, holten Pūrah man kuṙòh ngam tarik alaha meh öm peūtöre im elyöngö: 11Ngaich më-eṅ min hang öp ṙô cha; ngaich kalēḵlöre kël min më-eṅ öm peūtöre im elyöngö. Hōlten Pūrah ngaich anga-aṅ nö peūtöre ök tarik alaha ò nö söl manā-angkūö chūök yik tö-aṅhaṅvtī tarik yik me-ël ök elyöngö. 12Ngaich yik aṅ Mītiā tö yik aṅ Amelek inrē ṙòkhöre inrē yik kūön aṅ lā chuhöt nö hulalhaka nö el ngam achāṙö sā ṙôken mufākö tö ṙôngöre: öt kanṙeūken nuk ūṅt cha, sā kuyāyö i kūö mai tö ṙôkenre. 13Chalô ngaich Kitīön hĕng tak ngaich ök tarik umuh vame-eny heūvöre nö ik holre, nö ngö ṙô heūv heūvö chin, ngaich meuk öp pārlī rôti nö lönti nö i elyöngö yip an Mītiā, nö löö ī kāha inrūkui, fohtöre ngaich nö in e ngaich fukngö angū-ö, ngaich hatööḵlöre kūö angū-ö ngaich ngam inrūkui nö hulal töhëchṙen. 14Ngaich ök hol ò nö ngö ṙô nö sap ṙô ò, Öt tahëng an angū-ö tön öp sanët Kitīön öp kikōnyö kūön Yôas, tarik aṅ Israĕl: eltī ò tī An ngam Tēv nö kētö vē aṅ Mītiā, ṙòkhöre inrē vē kumyung.
15Ngaich hē Kitīön nö hang vine-eny ngam heūvö, töp manah e inrē, ngaich anga-aṅ nö salām; havantöre ngaich anga-aṅ nö i elyöngö Israĕl, ngaich ngö ṙô, Choholre; tön kētö eltī yīö an ngam Mā Tēv tö yip kumyung aṅ Mītiā. 16Harēv yik tölūöyòng tarik anga-aṅ ngaich nö lūöi kiteūm, kētö eltī cha anga-aṅ nö ṙòkhöre tö fanöö, tö hanrī inrē töt aṅhaṅv, nö holtö inhīök nö el nuk hanrī. 17Ngaich ngö ṙô anga-aṅ tö cha, Hatīönken chu, ngaich ngatī inlahen; meūkö chu yē chu sölngö ip manā-angkūö ngam elyöngö, hē e yī-ö asīnken chu ngaich ngatī yī-ö. 18Yē chu föökö kūö ngam fanöö tö yip hol chu inrē nö ṙòkhöre, ngaich föö nup fanööre yī-ö inrē keuheūtngöre lā-a im elyöngö, ngö ṙô, Hol ngam Mā Tēv Kitīön inrē.
19Ngaich Kitīön, tö yik töhēngòng tarik hol ò inrē, nö yihtöre ip manā-angkūö ngam elyöngö im ranehten ngam lāṙat ināhati, hē cha nöng fömtöreṙen nö ṙātö amahatī, föö ngaich cha-a, likukngö nuk eltīre inrē hanrī. 20Föö ngaich më tölūöi kiteūm, likukngö nuk hanrī inrē, ngaich lā tavēre tī cha-a tö nuk inhīök, lā hāmö nuk fanöö nö eltī cha nö fööṙö; hū-a cha-a, sanët ngam Mā Tēv, Kitīön inrē. 21Kö sökhakaṙen tarik nö i chūökre nö havīlö ngam elyöngö: fal ngaich yik kumyung nö ṙòkhöre; ayôṙaṙô cha-a pòn hōten cha nö pāngö. 22Föö nuk tölūöyòng cha-a fanöö, ngaich ngam Mā Tēv nö tī-īv tö cha nöng kö sapngö holre, höng lā-alre inrē yik kumyung nö ṙòkhöre: tölngö Petsīttā ngaich yik kumyung nö pāngö kū-ötö Sererah ip tölngö kūöngö Apĕlmehola lā Tapat. 23Ngaich yik tarik Israĕl nö hamūl yik aṅ Naftalī, aṅ Asēr, ṙòkhöre aṅ Manasē inrē, ngaich lū yik aṅ Mītiā.
24Ngaich tīnngö ma-ahānga ang Kitīön keuheūtngöre chūök nö ip rung panam Ifrēm, nö ngö ṙô, Peūtöre yin lā-al vē aṅ Mitiā, urēhĕkūö cha kē nup mak, tölngö Petparah i Yôtön. Hamūlöre ngaich yik tarik Ifrēm, ngaich kē nup mak nö tölngö Petparah, i Yôtön. 25Kē nak rācha tönët tak cha-a ngaich aṅ Mitīa, Ōrep Sīp; fëlngen Ōren cha-a nö ik ihong Ōrep, fëli Sīp tö cha nö ik kinrān vāin Sīp, ngaich lū yik aṅ Mītiā: ngaich cha-a nö kēten nuk kui Ōrep, Sīp inrē, nö in Kitīön lāmuh tö Yôtön.
Currently Selected:
KAMHÔKA 7: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
