Isayā 49
49
Israel, Nö Hanātö Ngih Panam
1Yī-ö kun panam, hangihtöre tö ṙô chu; hang inrē yī-ö tarik aṅ tömarôvat. Ṙeū-eung el chūök kanūönö chin havëka tö ngam Mā Tēv; löktökūö ellōn öp yöng kikānö anga-aṅ nö kakkö minë-eny chu:
2Ngaich vī elvāng chu anga-aṅ nö sā tökeut tachôi, elnyat kël re tī anga-aṅ nö hayunngen chu; ngaich vī-i chu anga-aṅ öich chòk töfaṙëcha alaha, halinngen chu anga-aṅ el chūök chòk:
3Ngaich ngö ṙô anga-aṅ tö chu, Kūön alaha chu man; Israĕl, ngam chūök ineū-eu chu min.
4Ngö ṙô pöri chū-ö, Chök alaha tī chin la-evṙen, mëichngö kumlēḵre chin chöö-önytö töng rö-öv chanök alaha: sön pöri öp huneū-en chu nö im Mā Tēv, ap invahal vah chu inrē nö im Tēv chu.
5Ngaich yi ngam Mā Tēv nö ngö ṙô, ngam mamūlö chu ṙā-ang el chūök kanūönö öich tarik ò, öich kamëten Yāköp hēk nö in ò, hòṅ Israĕl inrē nö hamūltu nö in ò; pò chu ineū-euvö i kūö ngam Mā Tēv, ngaich vītöre ngam Tēv chu nö kumlēḵ chu:
6Ngö ṙô anga-aṅ, töhöhövṙen an angū-ö tö meh öm tarik chu mahachohlö miyöngö Yāköp, mahavantö ngam töma-īṅlöng ang Israĕl; kēten meh chin min öm ëāṅvö i yip pumnāmö tarik, hòṅ ngam inyööken aṅ in chu nö sölngö i manā-angkūö ngih tumlat.
7Ngö ṙô An ngam Mā Tēv, ngam ṙāmānyen Israĕl ngam Töhĕng Töhet inrē, tö ngam tö yāich nāichngen, tösō-ovö tö pumnāmö tarik, ngam tarik aṅ i mahayöng: meuk min yip Rācha chōholre inrē; kūön rācha, cha-a inrē min fātngökūöre; kūö ngam Mā Tēv, ngam tökô-en, Töhĕng Töhet in Israĕl, ngam kamtöllen meh.
Chanòhlö Yeruselem
8Ngö ṙô An ngam Mā Tēv, Sapṙô meh chin ik töhō-ov ṙētak, holṙen meh chin ik sakāmö inyööken: haköpken meh chin ngaich kēten meh öm kinlēḵngô in vē tarik, öm mahaköpngö ngam panam ngaich michööḵ ngam töngasngö panam nö amin;
9Ngö ṙô tö yip tö-asōngi, Kunyī-inyre, in cha yip më-el sinngūlö, Hameuktöre. Nyā yip min nö el talöökö i nup töngasngö rôngö nup kiyôp nyā-aṅkūö;
10Öt kapahare yip min hēk öt haṙëhe nômö, öt rēhĕn nö ngesngö tökūö kuföt öt rēhĕn ngam tavūöi min nö chökhutī tö cha, pò ò ngam tö aṙē-ĕlōn tö cha min nö hachō-o cha, ngaich lök i nup töhëmlö mak nö hachōkūö cha min.
11Vī në rôngö chin min ṙòkhöre nö talöökö, ṙūölö chūök tö kiröng chin min talöököre.
12Yĕh meuk, cha-a yin vē min yamih nö ṙeū-eung tömarôvat, yĕh meuk vē ṙameū-eung lā kapā, lā sūng inrē, cha-a vē inrē ṙeū-eung panam Sī-enī.
13Tiköknyö ṙanāmölōn, Ō yī-ö halīöngö, kiröngö ṙanāmölōn, Ō më-eṅ tumlat: tiṙōlnyôre, öi tikökṙôre Ō yī-ö rôngö: tön ngaich an ngam Mā Tēv nö haṙamlōn yip tarik re, ngaich min nö aṙē-ĕlōn tö yip tökihten tarik ò.
14Ngö ṙô pöri Sīyôn, Ṙā-ai chin tö Yāvē, vaichngen chu inrē ngam Mā.
15Kô ang ngòh nyīö nö vaichngö tö ngam pamôḵ kūön re, nö öt aṙē-ĕlōn tö ngam nyīö kikōnyö aṅ el chūök kanūönö ò? Hòṅ, vaichngö yin cha-a nö kô-òren, hö-ö pöri chū-ö hō vaichngen meh.
16Yĕh meuk, ka-iphötnen meh chin el kintāl eltī re; örheūheu nun minë kinlōngö meh nö i kūö chu.
17Veūtö tī yip mamānlen meh tö yip pumyāihanga; ngaich cha-a inrē yip tumṙölngen meh nö kiröönngöre min nö ṙā-ang in meh.
18Môklökūöre man öm ngëicha havinngö mat re: ṙòkhöre yin nö hamūlöre, yih yin nö in meh. Sā chu tö aṅ, ṙô ngam Mā Tēv, ngaich me-eṅ min hanyöṅtlöre tö cha nö ṙòkhöre nö sā yanöṅtö, nyëklen cha min me-eṅ inrē sā tī ap töhapīhö.
19Kô-òngrit nun minë töpiyāyi töt aṅhavkūö inrē chūökö, ngam panam meh inrē tö-ahātiṙen, ngaich man min kô-òngrit inrē öm cheūkti, chūök yip aṅkūö meh, ngaich cha-a inrē yip ngameūkten meh min nö marôvat.
20Ngaich yip nyīö min töfötnyu i hē ngih miṙivlōn meh nö ngö ṙô min nö elnang meh, Cheūkti ön ngih chūökö nö chūök chu: kētö chūök chu hòṅ chu iyöngtöre.
21Ngaich ngö ṙô min me-eṅ elōnre: Achiāp kamyônyö vē nö kūön chu, yē chu misī tömiṙīvilōn tö yip kūön re, ngaich öich höng hĕng töṙah, tö-ahötiyö, töng apāṙaṙen inrē ihī-a umū-a? Achiāp uvö maharuklö vē? Yĕh meuk, töng hĕngtöṙah chin ṙā-ayö ṙamā-ang yih aich vē nö yih?
22Ngö ṙô an ngam Mā Tēv, Yĕh meuk, hachônglö kël re chin min in vē pumnāmö tarik, i vē tarik inrē öich asöklö ngam minkahngö; ngaich cha-a min nö kumtö yip kikōnyö kūön meh nö elngòh cha, keūnö min inrē yip kikānö kūön meh nö el ranôṙö cha.
23Harūkö meh min yip rācha nö kūön re yip rānī cha inrē nö yöngnyīö nö harūkö meh: sōntöre min cha-a nö in meh nö lā-ël tumlat kūö, ngaich kurak pitung röön meh, ngaich akahalōn min me-eṅ tö chu öich chū-ö Mā Tēv; yip hamökken chu örhō min nö sumrōngikūö.
24Kô yip min pôḵ nö kē-ĕ nö ṙā-ang im tökalēḵ, hēk inrē yip tökē-ĕ tö öp pinhë-eṅkūö nö ṙanānyen?
25Ngö ṙô pöri ngam Mā Tēv, Kē-ĕ yip min yip kahë öp tökalēḵ nö pòrô, öp pôḵ öp pinhë-eṅkūö inrē min nö ṙānyuvö pò chu min lā-al cha yip lā-al meh, ngaich chū-ö min hayööken yip kūön meh.
26Ngaich chū-ö min vīten yip mahakihten meh nö kā alaha re, ngaich hiyōi min cha-a tökūö mahām re, sā hinyōyöre tökūö vāin. Ngaich ṙòkhöre min tarik nö akahalōn tö chu öich Mā Tēv mahayööken meh, ṙamānyen meh inrē, hĕng tak tökalēḵ aṅ in Yāköp.
Currently Selected:
Isayā 49: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
