Isayā 48
48
Ngam Tēv An Mā Ip Tö Mòkngöre
1Hang ngih, Ō yī-ö aṅ patī Yāköp, öi töhavëka tö minë-eny Israĕl, öi yamih löknyö i ṙat Yūtā; ngam Mā Tēv, kamakkö ngam Tēv Israĕl inrē, hö-ö pöri nö im kanô-en öt rēhĕn nö im lanöökö.
2Pò cha nö havëköre nö aṅ ngam töhet elpanam, ngaich hayönglenre nö im Tēv Israĕl; Mā Tēv yip tömaṙôngö ap minë-eny ò.
3Vë-eny nuk aṅ i tö misī chin; hôṅ, ngaich nuk nö ṙā-ang elvāng chu, ngaich chū-ö inrē mikahtölōn yīö tö u; höng vuphë tī chū-ö tö u ngaich teungtö yīhih anū-ö.
4Pò chu akahalōn tö meh tömi-ô, ngam likeun meh inrē nö vët nö rahēḵ, mās inrē ngam māl meh;
5Lökten chin vë-eny u in meh löktökūö tö misī; vë-eny u chin in yīö urēhĕkūö u nö yih; hòṅ meh öt ngö ṙô, Tī ngam insātēv chu nun, ngam töka-īpö insātēv chu tö ngam töhaṙöichö insātēv inrē töchönguvö tö u.
6Ngaich man hang; meuk në; ngaich hö-ö hòng min me-eṅ vë-eny u? Löktökūö töngamuh chin ahangnyö elnang meh tö nup tufömngöre, nup tönyatngö, tö-öl mikahlōn meh.
7Vīlöng nup töngamuh, hö-ö nö maṙô-angen; öthāngö u me-eṅ urēhĕkūö ngih tötaheui sakāmö, Hòṅ meh öt ngö ṙô, Yĕh meuk, akahalōn chin tö u.
8Öl man hāngö u, öt hĕng heuk inrē akahalōn, hôṅ, löktökūö misī an ngam elnang meh nö öt löpnyukūö: pò chu akahalōn tö meh mu-ulāikenre ahôngen chöngö, ngaich löktökūö el chūök kanūönö öm kaheūkö ma-ahôngen.
9Kūö ngam minë-eny chu öich ahāṅtö yīhih ngam lanīnöre kūö ngam ineū-eu chu öich ṙapken e nö öt löö in meh, hòṅ chu öt rökngen meh.
10Yĕh meuk, halööktit meh chin, rö-ö pöri öm sā rupīö kalaha meh chin el öp töhūkūö inkihten.
11Pòkūö chu, öich la-evṙen tö e, sitih ṙöng öng min ngam minë-eny chu nö hachōchi? Hö-ö chin hòṅ kētö ngam ineū-eure i tahëng.
12Hangihtöre tö ṙô chu Ō Yāköp, Israĕl inrē ngam havëkö chu: chū-ö chin Anga-aṅ; chū-ö chin raneh, chū-ö min anga-aṅ; chū-ö chin Raneh, chū-ö inrē Manā-aṅ.
13Hôṅ, ṙātö rööntö ngam tumlat ön ngih kël chu, hanyāknyö minë halīöngö inrē ngih lāhāmö kël chu: hē chu havëken u, holre ngaich anū-ö nö söklöre.
14Hamūlöre yin ṙòkhöre öi hang, achiāp in cha vamënyö në? Hāngenlōn an ngam Mā Tēv tö ò; hateungten ap chöönyö re an min nö i Pēpilön, lā-al yip aṅ Kālti ap min kël ò.
15Chū-ö takô chin tö ṙô-òv; hôṅ, havëken ò chin, kēten ò chin, ngaich kôlò min anga-aṅ nö el talöököre.
16Hang ngih, ṙūötöre in chu; löktö kūö ik raneh chin öt ulāikôre ṙô-òv, hētentö ök yanīhih e ngaich chū-ö umuh: ngaich töngamuh ngam Mā Tēv nö tīnten chu tö ngam Töhet Fanöinylö ò.
Lōn Ngam Tēv Tö Yip Tarik Ò
17Ngö ṙô an ngam Mā Tēv, ngam Ṙamānyen meh, ngam Töhĕng Töhet aṅ in Israĕl: Chū-ö chin Mā Tēv, Tēv meh, öich mahaköpten meh hôṅ meh kanôluṙô, öich mahachō-o meh el öp hinôtö meh talöökö lahök meh.
18Mah hangṙô chu man öre i minë chöngö chu! Ngaich öre ngam lanāmö in meh nöng sā tahël, ngam lanöökö meh inrē nöng sā mahūvö ngam mai:
19Sā kuyāyö öre inrē yip kūön meh, yip lamöknyö in meh inrē nö sā pinhīöyö kuyāyö: öthō öre öp minë-eny ò nö rökiṙen öt rēhĕn nö piyāyi nö i kūö chu.
20Kunyī-inyre yin ṙā-ang Pēpilön, falngöre ṙā-ang in yip aṅ Kaltī, pōitô yin vë-eny e höltö ṙanāmölōn, ahangkö e, söömngö e söl ip manā-angkūö ngih tumlat; ngö ṙô, Ngaich an ngam Mā Tēv nö ṙānyö öp tarik re Yāköp.
21Öt haṙëhe nômö cha-a hē ò nö lök eltönyalnyi nö hachōnyen cha: pòn vītö mak anga-aṅ òk cha nö löknyö ik Ihong nö hëmnyi: lirak ök Ihong inrē anga-aṅ ngaich pòpnyi ök mak.
22Ngö ṙô an ngam Mā Tēv öt lanāmuvö umuh in yip tötlöök.
Currently Selected:
Isayā 48: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
