Isayā 50
50
1Ngö ṙô an ngam Mā Tēv, Isuh ap līpöre kinūichngö ṙināngö ap yöng meh kikānö, öp tötī-iv tö chu ṙāngen ò? Hēk inrē achiāp chūök chu hötṙëhevö öp tö-inyīhivökūö tö chu tö meh? Yĕh meuk, kūö tökööl re yin inyīhiyö, kūö tanôichngen yīö inrē ök kikānö yöng yīö nö ṙā-ayö.
2Kūöyòh öi öt tarīku umuh, hē chu yih? Hē chu havë-a, öt tarīku hòng umuh samap ṙô chu? Cheūngöre rôta öng ngih kël chu, töp lökten e nö ötkô nö ṙā-any? Hēk inrē öt kanô-òṅvö öichu öich ṙā-any? Yĕh meuk, ngam mai nö nyôlö tökūö vinëköre tö chu, vītö minë tahël chin nö elnyalnyi; hangeūṅtu ngaich nup kā ël u kūö törö-ö mak, ngaich kapah tö inṙëhe nômö re.
3Hayut minë halīöngö chin tö tösah, ngaich vī sāk nö kinṙumngö u.
Hang Chöngö Yip Tarik Ngam Tēv
4Kē-ĕvkūö chin tö ngam Mā Tēv tö litāk cha yip töhaköptu; pò chu hōtu akahalōn tö tīre ṙāpa aṅtī tö ngam ṙô ò ngam töcheingö. Kaheuk peuheū anga-aṅ nö aṅhen ngaich mi-īhenkö elnang chu öich hōtu hang sā cha yip töhaköptu.
5Löpnyö elnang chu an ngam Mā Tēv, ngaich hö-ö chū-ö ahôngen, hö-ö chū-ö havöökūöre.
6Kētö uk re chin in yip famòh, tameuk sanôi samā; hö-ö chin hanyatngökūöre tö sumrōngkūö öt rēhĕn i kinösngö elmat.
7Pò ngam Mā Tēv min nö holṙen chu; lökten chin öt kalūöchöre elkui; lökten chin hangëkūöre sā töngëḵ ihong, ngaich akahalōn chū-ö tö chu min öt sumrōngikūö;
8Anga-aṅ öp tökô nö holṙen, röhta ap nö in chu. Chiāp min lā-al chu? Tā-a tai kösöklöre. Achīö ap lā-al chu? Hökten ò nö haröhtöre nö in chu.
9Yĕh meuk, ngam Mā Tēv An holṙen chu; chiāp min töṙô-òv tö chu fāluṙen? Yĕh meuk, ṙòkhöre yip min nö hūöinyngö sā hilā; kāti yip min tö maneūi.
10Achīö ap in yīö töpa-ekūö tö ngam Mā Tēv, hamang ṙô ò inrē in yīö öi tarik ò, öi lamök el sinngūlö öi öt ëāṅvu, ngaich öi hayönglenre i minë-eny ngam Mā Tēv hayönglenre inrē im tēv re?
11Yĕh meuk, ṙòkhöre yī-ö tamôttö kūö tameūyö, töhūkūö tī inrē tö löktökūö tameūyö! Kiröönngöre man el hanātö kūö tameūyöre, i hanūkūö ngam löktökūö tameūyö inrē ngam tahōttökūö meh! Angū-ö an in meh min lamökten eltī meh: ṙōlngöre man min el ngam inkihten meh.
Currently Selected:
Isayā 50: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
