Isayā 25
25
Tinkökö Nöinyö
1Ō Mā Tēv, me-eṅ man Tēv chu, hapōilen meh chin, ha-öiny ngam mine-eny meh chin min; pò meh ngaich tītö pingangkūö, tö inlēnö ik misī i
kanô-en, i tökô-en inrē.
2Pò meh ngaich vīten öp elpanam nö fônghaka; ap tölaklöngö elpanam nö payāyi: patī rācha aṅ tahëng ngaich nö rö-ö nö elpanam; öt hētuvö ap min nö vīlöngö.
3Lökten yip min tökalēḵ nö hapōilen meh, pa-ekūö min tö meh öp elpanam yip pumnāmö tarik töpahë-evö.
4Pò meh ngaich töngëḵ öm chūök töhāṅten hē el kanihngen ò, innyatlö hē el chanôchö panam, nyatkui hē el ṙanāchö, hē öp töpahë-evö nö sā chanôich panam nö fohtöre nö i kaha patī.
5Sā öp ṙanāchö i tönyôḵṙökūö chūök tī meh min öm kētö nup ṙënṙô aṅ tahëng; sā ngam ṙanāchö nö innyat ngam taṙul, ngam tinkökö yip töpahë-evö min nö tumṙeūtu.
Halēn Tökiröng Nyinā-aṅ Ngam Tēv
6Ngaich i kui ngih rôngö min ngam Mā Tēv yip tömaṙôngö nö vītö nyā-aṅkūö yip tarik tö tösangööṙö alaha, tökiröng inôḵö vāin, i kui nuk kintū-ö rit, tösangöö alaha tööḵlö tösangöö eltangëḵ, nup vāin i kui kintū-örit nö tö halööktitvö.
7Ngaich anga-aṅ min nö i kui ngih rôngö nö piyāingö öp innyatngö tökahultu nö i kui yip tarik, öp kinṙulkui inrē tö kahultu nö i kui yip tarik, öp kinṙulkui inrē töhanyāknyu nö i kui taṙòkhöre pumnāmö tarik.
8Ngaich an nö keuheūt nö ngeūṅktö ngam kinpaha nö urāngen; ngam Mā Tēv inrē min nö chūtngö mak mat nö ṙā-ang i kūö taṙòkhöre ngam minṙēngö yip tarik ò min inrē nö kē-ĕyö tö ò ṙā-ang i kūö në tumlat; pò e nö ṙô ngam Mā Tēv.
9Ngaich min öp ṙô ip sakāmö angū-ö nö ngö, Yĕh meuk, anga-aṅ ön ngòh Tēv hī; höng hamökken ò in, anga-aṅ an min inrē mahayööken hī: anga-aṅ ngòh Mā Tēv; höng hamökken ò in, ṙāmölōn in min ngaich haṙamlōnre im inyööken aṅ in ò.
Piyāyi Min Môāp
10Pòn i kui ngih rôngö min öp kël ngam Mā Tēv nö töönglöre, ngaich Mô-āp min nö rööntukui nö im chūökre, sā rinööntökui afō nö el öp mak ip rung chūök sôḵ nuā. 11Ngaich anga-aṅ min nö hateutnyö kël re nö ellōn e, sā öp yamöö nö hateutnyö kël re nö yöö: ngaich anga-aṅ min nö tumṙeūtö öp inkeūlen ò tö nup vahīṙen kuntī ò inrē. 12Ngaich ngam chūök kumyung ip lātulöng chūök kumyung i minë kinlōngö meh tumṙeūtu anū-ö ngaich tö ò, piṙāpi, haṙongtu nö i kui tumlat inrē, nö el ngam tumlat.
Currently Selected:
Isayā 25: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
