Isayā 26
26
Kētö Minhôiṅyö Më Tarik Re Min Ngam Tēv
1Ip sakāmö angū-ö min nö tikökö ngih tinkökö nö im panam Yūtā: Elpanāmu in tö töngëḵ; vīlö ngam inyööken an min nö kinlōngö inrahkūö inrē.
2Löpnyökūö minë inkūp yin, hòṅ yip tölöök pumnāmö tarik yip tököptī tö kanô-en nö kuhēthötre.
3Haköpö ò man min nö i kumchikṙen takô, öp tököpngö ellōn nö in meh: pò ò nö hayönglenre nö in meh.
4Hayönglenre yin im Mā Tēv örheūheu: pò ngam Mā Tēv Yāvē nö ihong töt chanūhuvṙen.
5Pò ò nö ngaich nö kēten cha nö lātaṙeū yip mi-iyöng lātulöng, im lātulöng elpanam: lātaṙeū tī an nö ṙātö e nö i kui tumlat; kēten e an nö i kui tumlat.
6Rööntu kui min angū-ö tö elröön; tö elröön yip yāich, vanāngö yip töhāṅten inrē.
7Tölöök an ngam talöökö töchiplen: ngaich me-eṅ töchiplen hachōtö talöökö yip tölöök.
8Hôṅ, im talöökö minë inkaha fālen aṅ in meh, Ō Mā Tēv, höng hamökken meh in; ngam minë-eny meh tö ngam inköpkölōn tö meh angū-ö an lōn ngih nômö ih.
9Holtö ellōnre chin hòṅ īnu tö meh tö el hatööm; hôṅ, hol töp ma-alahare chin nö in chu öi ka-euilökūö chöhöh meh, pò ngam inkaha fālen aṅ in meh yē e nö el tumlat ngaich yip aṅkūö ngih panam nö haköp lanöökö.
10Hameuktö miṙēlōn yēḵ im tötlöök, ngaich sön min anga-aṅ nö öt haköp lanöökö; i panam ngam tötchiplen min anga-aṅ nö vāchö tī, ngaich öt meuk ngam minā-aṅ ngam Mā Tēv.
11Mā Tēv chônghaka an ngam kël meh, sönngenre cha-a nö öt meuk: meuk ngam kumlēḵlōn meh pöri min cha-a nö in yip tarik, ngaich sirōngngöre kūö; hôṅ, ṙāpngö kūö an min ngam tameūyö tö yip lā-al meh.
12Mā Tēv vītö lanāmö man min in ih: pò meh ngaich inrē la-evṙen tö nup la-en ih öm ṙënngen ih.
13Ō Mā Tēv, Tēv ih, hayöngö in tö tahëng mā nö hol meh; höng in meh pöri īhö min kakkö ngam minë-eny meh.
14Kapah yip tökapah, öt aṅ yip min, kapah yip nö ngaich öt chōholre min lökten man chöhken cha fëlngen cha inrē, vīten öp kanöpölōn tö cha nö chuhngöre.
15Ṙūölö ṙôken pumnāmö tarik man ngaich, Ō Mā Tēv ṙūölö ṙôken pumnāmö tarik man ngaich; ngaich man ineū-euvö: ngaich man ṙūönyö ṙôkti kūöngö ngam panam.
16Mā Tēv, ngëichken meh yin hē el kanihngen, kalē-ĕṙô yin nö vë-ekūötēv yē cha nö ṙònghöichṙen nyahaṅ nö chöken.
17Sā öp kikānö puyōsö, öp töröhten hē nö hòṅ kayôḵnö halöinyöre ngaich ayôkö sinlòklö chanököre; ngatī in īhö ngaich i kūö meh, Ō Mā Tēv.
18Piyōsö in īhö, ngaich in halöinyöre, ngaich pöri, īhö höng sā kamyôḵnyö kuföt; hō-ov in kayôḵnyuvö ing tumlat; ötrēhĕn yip aṅ ngam panam nö kūönngöre.
19Aṅ yip min tökapah nö in meh; chōholre ön min ngih tökapah alaha chu. Chōholre tikökṙôre yī-ö mi-iyöng el tumlat: pò öp tacham meh nö sā tacham nup kun chōn, ngaich ngam tumlat min nö kavallö yip tökapah.
Inkaha Fālen töm Inchohlö chanôhòl
20Ta-ih, yī-ö tarik chu, kuhēthötre el minë urôhò yīö, ngaich öptökūö minë inkūp mahavīlen meh: rahëchtaṙen öm hayunngöre, hanöng saha chanuhu ngam lanīnö.
21Yĕh meuk, pò ngam Mā Tēv nö kunyī-inyre nö ṙā-ang el öp chūökre nö kētö sācha yip aṅkūö ngam tumlat tökūö tökööl fālen cha: hameuknyö mahāmre an min ngam tumlat inrē, ngaich rö-ö min nö kahulngö kui yip töfëli.
Currently Selected:
Isayā 26: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
