Isayā 24
24
Piyāiyngö Ngam Tumlat Min Ngam Tēv
1Yĕh meuk, vīten ngam tumlat an ngam Mā Tēv nö öt aṅhaṅvkūö, vīten e inrē nö payāiyi, ane inrē havānglöp lātaṙeū alaha e nö lātulöng, ngaich inrē nö marôvat tī nö pirātngö yip aṅkūö e.
2Ngaich angū-ö min, sā e nö in yip tarik ngatī min nö in yip kūönṙô; sā e nö ip tarik alaha, ngatī min nö in öp yöngṙen ò kikōnyö; sā e nö in öp kikānö tarik alaha, ngatī nö in öp yöngṙen ò kikānö; sā e nö in öp mī-inyīha, sā e nö ip töhaṙūönghukūö; sā e nö in öp kamëḵ ṙāi inṙūöngkö rupīö, ngatī in öp kamëtö ṙāi inṙūöngkö rupīö nö in ò.
3Hatngö aṅkūö an min ngam tumlat, keuheūtngöre inrē nö öt hakôlöngṙô, pò ngih ṙô nö ṙô ngam Mā Tēv.
4Haṙivlōn ön ngih tumlat changāchiṙen inrē, cheingö ön ngih panam changāchiṙen inrē cheingö yip inrē tarik ngih tumlat lamātulöng.
5Chōichngöre inrē ngih tumlat nö el katòh yip aṅkūö e; pò cha nö köölö fālen nö i nup chöngö, haṙīngö töhachöngtuṙen filalngö ngam töt chanūhuvṙen kinlēḵngô.
6Lökten an ngam rinūtngen nö keuheūt nö mīktö ngam tumlat, ngaich cha-a inrē yip mi-iyöng in e nö kôti nö fāluṙen lökten yip aṅ ngam tumlat nö föngi, ngaich höng haroh tumtit taka tarik tö-ōtre.
7Haṙivlōn an ngam tufömngöre vāin, cheingö an ngam chōn vāin, ṙòkhöre yip töṙāmö ellōn nö sīklö unhômö.
8Ṙāngenre nup kumchikṙô tāpret sökngöre nup ṙënṙô cha yip töṙāmölōn, ṙāngö kumchikṙôre ngam hāp.
9Öt òk vāin yip min nö tikökṙôre; angū-öṅvö nup min tökalēḵ nö in cha yip amôkö u.
10Taṙöli an nö ngaich ngam elpanam tömëchiṙen: kö löphak kūö nuk patī, pòn sōtu tarik nö kuhēthötre.
11Ṙënṙô ap umuh el nup talöökö kūö vāin; sangulköti nup ṙanāmölōn, chuhngöre nö ngaich nö el inkövö ṙanāmölōn ngam panam.
12Ṙā-ayö an nö ngaich, ngam elpanam nöng öt aṅhaṅvkūö, ngaich an ngam inkūp nö piyāyiyö.
13Pòn ngö inlahen min nö ellōn ngam tumlat in yip tarik nö sā tö kayīna ôliv chōn, sā angkūr nö chāpö hē el inmūlö ṙòng.
14Ngaich chā-a min nö hachônglôre, hū-a min cha-a; pò ngam minā-aṅ ngam Mā Tēv nö pōiti hinūka tö cha nö löktö el mai.
15Kūöyòh öi hapōilö ngam Mā Tēv lā chuhöt, ngam minë-eny ngam Mā Tēv ngam Tēv Israĕl, i nup panam i kūö mai.
16Löktökūö manā-angkūö ngam tumlat in hang tinkökö ineū-eu ngam tölöök. Ngö ṙô pöri chū-ö, Lëvngö chin chū-ö, lëvngö chin chū-ö, tötkôlò chin chū-ö më tömichūṙen chanökhutī, michūṙen chanökhutī nö ngaich; hôṅ, ngaich an ngam tömichūṙen chanökhutī nö michūṙen chanökhutī.
17I kui meh, pinhë-eṅkūö, anūlö, insuk inrē, Ō yī-ö aṅ ngih tumlat.
18Ngaich ngö inlahen angū-ö min, tö ò öp famalngöre tö pinhë-eṅkūöre tö ṙënṙô nö fuk el anūlö min; ngaich anga-aṅ öp mameutlö nö ṙā-ang el anūlö nö kētu nö el insuk: pò nup inkūp lökhöt kuföt nö luvë-akkūö nö lātulöng, ngaich nup rööntö ngih tumlat nö kalöka.
19Keuheūtngöre vah ngam tumlat nö payāyi keuheūtngöre ngam tumlat nö yëngö, kalē-ĕ inlöinyköre ngam tumlat.
20Kahööka min ngam tumalt sā mihiyōi tarik, kalöka min inrē nö halöinyköre sā talīkö; ngaich i kui e min öp tökööl fālen nö langan, fukngö min ngaich angū-ö, ngaich öt hēk nö chōholre.
21Ngaich ngö inlahen min angū-ö ip sakāmö angū-ö, tö ngam Mā Tēv min nö sācha tī tö yip tömaṙôngö lātulöng, yip rācha ngih tumlat i kui ngih tumlat.
22Ngaich cha-a min nö hamūlö, sā tökē-ĕ nö hamūlö nö el kinlōngö, ngaich öpikūö min nö el kinlōngö, ngaich unôichrit töṙōl sumkam min cha-a nö kētu sācha.
23Ngaich ngam chingëṅt min nö kalūöchöre elkui, sirōngkūö inrē ngam tavūöi pò ngam Mā Tēv yip tömaṙôngö min nö hayöng nö i kui rung Sīyôn, i Yerūsalem inrē, nö i kūö yik mā misī ò nö i minā-aṅre.
Currently Selected:
Isayā 24: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
