Proverb 3
3
Lasazes ek Respe pour Bondye
1Mon garson! Pa oubliy mon lansennyman;
gard mon bann komannman dan ou leker.
2Zot ava fer ou viv pli lontan
e ou ava ere.
3Reste touzour bon e fidel.
Atas sa bann kalite otour ou likou;
ekri zot lo lardwaz ou leker.
4Konmsa, Bondye ek zonm ava kontan ou.
5Met ou konfyans dan SENYER avek tou ou leker;
pa kont lo ou prop rezonnman.
6Rekonnet li dan tou sa ki ou antreprann
e i ava gid ou lo ou semen.
7Pa krwar ou tro saz;
annan respe pour SENYER
e elwanny avek sa ki mal.
8Sa i ava en remed pour ou lekor
e i ava kalme ou douler.
9Rann glwar SENYER avek sa ki ou annan,
e avek premye fri tou ou bann rekolt.
10Alor, ou bann grennyen ava ranpli avek prodwi ou rekolt
e ou bann barik pou deborde avek diven.
11Mon garson! Pa rezet bann konsey SENYER,
ni mepriz son bann lavertisman.
12Annefe, SENYER i koriz sa enn ki i kontan,
parey en papa i fer anver son zanfan ki i prefere.
Lasazes I Rann Ere
13I byennere sa enn ki'n trouv lasazes,
sa enn ki'n ganny disernman,
14akoz lasazes i raport plis ki larzan
e i donn plis ki lor.
15I pli presye ki okenn perl;
napa nanryen pli dezirab ki li.
16Lavi long i dan son lanmen drwat;
larises ek loner i dan son lanmen gos.
17I fer plezir mars lo son semen;
tou son bann santye i kondwir ver prosperite.
18Pour sa enn ki sezi li,
lasazes i en pye dibwa ki donn lavi;
sa enn ki gard li byen,
i ganny deklare byennere.
Lasazes Bondye dan Lakreasyon
19SENYER ti poz fondasyon later avek son lasazes;
lesyel ti ganny etabli par son konnesans.
20Par son konnesans, bann rezervwar ki anba later dan lanmer,
ti ouver e bann nyaz ti fer tonbe lapli.
Proteksyon Bondye pour bann Saz
21Mon garson!
Gard ou lizye fikse lo lasazes ek refleksyon.
22Zot ava lavi pour ou et antye
e en ornman pour ou likou.
23Alor, ou ava kontiny ou semen an sekirite
e ou lipye pa pou glise.
24Si ou al alonze, ou pa pou trakase;
aswar, ou ava dormi anpe.
25Lafreyer pa pou tonm lo ou sibitman
e malfeter pa pou atak ou,
26akoz SENYER pou protez ou.
I pa pou les ou lipye tonm dan en latrap.
Lanmour pour Son Prosen
27Sak fwa ki ou kapab,
pa refize fer dibyen
sa enn ki dan bezwen.
28Pa dir ou prosen:
Ale! Retournen;
demen mon ava donn ou,
alor ki ou annan dekwa pour donnen.
29Pa fer konplo kont ou vwazen
alor ki i pe viv pre kot ou avek konfyans.
30Pa dispit avek dimoun san okenn rezon,
alor ki i pa'n fer ou okenn ditor.
31Pa anvye en dimoun vyolan,
ni swiv okenn son bann mannyer fer,
32akoz SENYER i deteste sa enn ki fourb;
me i partaz son bann sekre
avek sa enn ki drwat.
33Malediksyon SENYER i tonm lo lafanmir en malfeter,
me SENYER i beni lafanmir
sa enn ki zis.
34SENYER pa pran ka dimoun ensolan;
me i bon anver dimoun senp.
35Sa enn ki saz ava erit loner,
sa enn ki bet ava erit laont.
Currently Selected:
Proverb 3: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
