Proverb 2
2
Valer Lasazes
1Mon garson! Si ou aksepte mon bann parol;
si ou gard byen mon bann komannman;
2si ou ekout byen lansennyman lasazes
e ouver ou leker pour konpran li;
3si ou vreman demann disernman;
si ou demann larezon;
4si ou rod lasazes parey ou rod larzan;
si ou rod li parey ou rod en trezor,
5alor, ou ava konpran ki savedir respe pour Bondye
e ou ava reisi konn Bondye.
6Annefe, SENYER ki donn lasazes;
konnesans ek larezon i sorti kot li.
7I gard an rezerv bann resours pour dimoun ki drwat;
i en boukliye pour bann ki viv onnetman.
8I protez sa enn ki mars dapre ladrwatir,
i vey semen sa enn ki fidel.
9Alor, ou ava konpran
kisisa ladrwatir, lazistis ek lonnekte,
tou bann semen ki kondwir ver boner.
Lasazes I En Proteksyon Kont Lemal
10Kan lasazes ava penetre ou leker
e konnesans ava donn lazwa dan ou et antye.
11Refleksyon ava protez ou,
larezon ava vey lo ou.
12I ava anpes ou tonm dan lemal
e prezerv ou kont bann manter,
13ek bann ki abandonn semen ladrwatir,
pour pran semen fernwanr.
14Sa bann dimoun, zot pran plezir dan lemal
e zot lazwa i dan sa dimal.
15Zot semen i tord
e zot bann aksyon pa drwat.
16Konmsa, ou ava ganny delivre
kont en fanm imoral;
kont en fanm etranze avek parol anmyelan.
17I'n abandonn son premye lanmoure
e oubliy lalyans son Bondye.
18Son mannyer viv i antrenn li ver lanmor;
son mannyer fer i kondwir li dan fernwanr.
19Tou dimoun ki al kot li pa zanmen retournen,
ni retrouv semen lavi.
20Alor, swiv semen dimoun ki bon;
imit dimoun ki zis.
21Annefe, dimoun zis ki pou reste dan sa pei;
bann inosan ki ava kontinyen reste.
22Me bann malfeter pou ganny sase dan sa pei,
bann tret ava ganny derasinen lo sa later.
Currently Selected:
Proverb 2: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
