Proverb 4
4
Konsey pour bann Paran
1Zanfan! Ekout konsey en papa.
Pret atansyon e zot ava ganny disernman.
2Akoz mon pe donn zot bann bon leson,
alor, pa abandonn mon lansennyman.
3Mwan osi, mon ti en garson pour mon papa;
mon ti zanfan prefere mon manman.
4Mon papa ti ansenny mwan;
i ti dir mwan:
Gard mon bann parol lo ou leker;
obzerv mon bann komannman
e ou ava viv.
5Rod lasazes, rod disernman;
pa oubliye, ni elwanny ou
avek bann parol ki sorti dan mon labous.
6Pa abandonn lasazes
e lasazes ava protez ou;
kontan li e i ava vey lo ou.
7Pour vin en saz, konmans par ganny lasazes.
Donn tou sa ki ou posede pour ou ganny disernman.
8Ser lasazes dan ou lebra
e i ava fer ou vin enportan;
i ava onor ou si ou ser li for kont ou.
9I ava poz en zoli girlann lo ou latet;
i ava orn ou latet
avek en zoli kouronn.
Lasazes I Donn Lavi
10Mon zanfan! Ekoute.
Aksepte mon bann parol e ou ava viv lontan.
11Mon'n ansenny ou semen lasazes.
Mon'n kondwir ou lo bann santye ladrwatir.
12Ler ou pou marse, personn pa pou zenn ou;
si ou taye, ou pa pou tonbe.
13Gard lenstriksyon ki ou'n gannyen, pa abandonn li;
gard li, akoz i ou lavi.
14Pa antre dan semen bann ki pratik lemal,
pa pran semen bann malfeter.
15Evite frekant li.
Les li e kontiny ou semen.
16Bann malfeter pa pou dormi,
si zot pa'n fer sa ki mal.
Zot perdi sonmey,
si zot pa fer personn tonbe.
17Annefe, zot viv lo mesanste
e zot bwar diven lavyolans.
18Me semen sa enn ki zis
i parey lalimyer granmaten
ki vin deplizanpli for ziska midi.
19Semen bann malfeter i parey gro fernwanr;
zot pa konnen kwa ki fer zot tonbe.
Swazir bann Semen Sir
20Mon garson!
Ekout mon bann parol;
Ekout byen mon bann konsey.
21Pa les zot sorti devan ou lizye;
gard zot dan fon ou leker.
22Zot donn lavi ek lasante
sa enn ki dekouver zot.
23Sirtou, vey lo ou leker,
akoz i sours lavi.
24Pa les mansonz sorti dan ou labous;
pa fer okenn medizans.
25Get dimoun anfas,
regard drwat devan ou.
26Fer semen nivo kot ou pase
e tou ou bann semen ava sir.
27Pa detourn ni adrwat ni agos;
elwanny ou lipye devan sa ki mal.
Currently Selected:
Proverb 4: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
