Proverb 22
22
1En bon repitasyon i preferab ki bokou larises;
lestim ki dimoun i annan pour ou,
i meyer ki lor ek larzan.
2La sa ki ris ek pov i annan ansanm:
SENYER ki'n fer tou le de.
3Ler maler i vini, en zonm pridan i war e i al kasyet;
sa enn ki san leksperyans, i fonse
e i pey son konsekans.
4Larises, loner ek lavi,
i rekonpans sa enn ki posed limilite e respe pour SENYER.
5Semen en zonm ki fo i kouver avek bann bison pikan ek bann pyez.
Sa enn ki oule protez son lavi, i evit sa semen.
6Donn en zanfan bann bon labitid depi son zenn az;
I ava ankor pe met zot an pratik dan son vye zour.
7Sa enn ki ris i domin lo bann ki pov;
sa enn ki demann prete i vin lesklav sa enn ki prete.
8Sa enn ki senm lenzistis pou rekolte maler;
e son lakoler pou ganny detri.
9Sa enn ki bon pou ganny beni,
akoz i partaz son manze avek bann pov.
10Sas sa enn ki ensolan e dispit ava fini;
pou nepli annan okenn lager ni lensilt.
11Sa enn ki kontan en leker pir, e ki koz byen,
pour vin zanmi lerwa.
12Lizye SENYER i protez vre konnesans,
me i rezet parol en zonm fourb.
13Sa enn ki pares i dir: I annan en lyon deor;
mon pou ganny touye dan semen.
14Labous en fanm devergonde i parey en lafos profon;
sa enn ki SENYER i rezete
i tonm ladan.
15Zanfan i kontan sa ki paret bet.
Me roten ki pour fer li sanze.
16Sa enn ki kraz en pov pou rann li ris;
sa enn ki donn en ris, pou vin pov li menm.
Parol en Saz
17Ouver ou zorey, ekout parol bann saz;
port atansyon leson mon bann lansennyman.
18Annefe, ou pou ere si ou gard zot dan ou leker;
gard zot touzour pare dan ou labous.
19Pour ki ou met ou konfyans dan SENYER,
ozordi, mon'n ansenny ou osi konnesans.
20Pa mon'n ekri pour ou trant konsey,
bann konsey ek bann refleksyon,
21pour fer ou konn sa ki byen e vre,
pour ou kapab reponn avek sa enn ki anvoy ou,
par bann parol laverite?
22Pa vol en pov akoz i mizer,
ni kraz enn ki dan bezwen devan laport lavil.
23SENYER ava pled pour zot
e pran lavi sa bann ki'n pran tou avek zot.
24Pa frekant sa enn ki met li ankoler;
pa asosye ou avek bann malsoufran.
25Ou riske imit zot mannyer fer
e ganny pri dan en pyez.
26Pa fer parey sa bann ki pran responsabilite det lezot.
27Si ou napa nanryen pour donnen an konpansasyon,
zot pou pran ou lili anba ou.
28Pa deplas bann vye taso balizaz
ki ou bann zanset ti poze.
29Si en zonm i fer byen son travay,
ava kapab servi bann lerwa;
i pa pou travay pour dimoun ordiner.
Currently Selected:
Proverb 22: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
