Proverb 21
21
1Leker lerwa i en pti larivyer dan lanmen SENYER.
I diriz li partou kot i oule.
2Dimoun i krwar ki tou sa ki i fer i byen;
me SENYER ki sond leker.
3SENYER i prefer ladrwatir ek lazistis,
plito ki bann sakrifis.
4En regar fyer e en leker ranpli avek larogans,
i montre ki ou en malfeter: I en pese.
5Plan sa enn ki aktif i fer li vin ris;
me sa enn ki azir an vites pour konn lapovrete.
6Sa enn ki vin ris par mansonz,
son bann aki napa valer
7Lavyolans bann malfeter pour anmenn zot dan zot perdisyon,
akoz zot refiz fer sa ki byen.
8Semen sa enn ki malonnet i tord;
me mannyer fer sa enn ki inosan i drwat.
9Vomye viv dan kwen en lakaz,
ki viv dan lakaz en fanm ki kontan dispit.
10En malfeter i mazin zis fer sa ki mal;
i napa pitye menm pour son zanmi.
11Pinisyon en ensolan i fer sa enn ki bet vin saz;
ler en saz i ganny enstri, i ganny konnesans.
12Sa enn ki zis i obzerv lakaz en malfeter;
i zet li dan larin.
13Sa enn ki bous son zorey
ler en pov i kriye,
pa pou ganny okenn larepons
zour i ava kriye.
14En kado ki'n ganny donn an sekre, i kalme lakoler;
en prezan ki'n dan pos i tenny lakoler.
15Sa enn ki zis i dan lazwa
ler i azir dapre lazistis;
me i fer per bann malfeter.
16Sa enn ki abandonn semen konnesans,
pou fini dan lasanble dimoun mor.
17Sa enn ki kontan fer lafet
pou reste touzour pov.
Sa enn ki kontan diven ek delwil
pa pou zanmen vin ris.
18Malfeter i en garanti pour sa enn ki zis;
Tret i en garanti pour dimoun ki drwat.
19Vomye viv dan kwen en dezer,
ki viv avek en fanm nervez ki rod dispit.
20I annan en trezor presye ek delwil an rezerv dan lakaz en saz;
me en dimoun bet i goberz tou.
21Sa enn ki rod lazistis ek lafidelite,
pour dekouver lavi, lazistis ek loner.
22Sa enn ki saz, i atak en lavil fortifye;
i kraz fortifikasyon kot zot ti'n met zot konfyans.
23Sa enn ki vey lo parol ki i dir,
i protez li kont maler.
24Sa enn ki fyer e vantar, i ensolan;
i azir avek bokou larogans.
25Dezir en parese i touy li,
akoz son lanmen i refize travay.
26I touzour anvye lezot;
me sa enn ki zis i donnen
san gard nanryen pour li.
27Sakrifis bann malfeter i degoutan;
anplis, zot ofer li avek move lentansyon.
28En fo temwen pou disparet;
me sa enn ki ekoute, ava kapab donn en bon temwannyaz.
29Bann malfeter i pran en figir serye;
Me sa enn ki drwat i reflesi lo son mannyer fer.
30Napa okenn lasazes imen, okenn rezonnman, okenn konsey imen,
ki kapab tenir devan SENYER.
31Seval i ganny ekipe pour zour konba;
me SENYER ki donn laviktwar.
Currently Selected:
Proverb 21: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
