Proverb 23
23
1Ler ou asiz pour manz avek en dimoun enportan,
obzerv byen sa enn ki devan ou.
2Si ou abitye manz tro bokou,
limit ou lapeti.
3Pa ganny lanvi manz son bann bon pla;
i kapab en nouritir tronper.
4Pa fatig ou pour vin ris;
ganny ase lespri pour ou refize.
5Ler ou lev lizye pour get larises,
in fini ale;
en kou an gran, i'n ganny lezel,
parey en leg, in anvole ver lesyel.
6Pa manz dipen sa enn ki avar;
pa anvi son bann bon pla.
7Annefe, i pa mazin sa ki i dir.
I dir ou: Manze, bwar!
Me son leker pa senser.
8Ou pou vomi sa ki ou'n manze;
e ou bann bon parol pa'n servi nanryen.
9Pa koz avek en zonm ki bet;
i pou mepriz valer ou bann parol.
10Pa deplas bann vye taso balizaz;
pa antre dan propriyete en orfelen,
11akoz son defanser i pwisan,
i ava pled son ka kont ou.
12Met ou leker pare pour aprann;
ouver ou zorey pour ekout bann parol leksperyans.
13Pa ezite pini ou zanfan;
i pa pou mor si ou fwet li avek en roten.
14Ler ou ava koriz li avek en roten,
ou pou sov son lavi dan lemonn lanmor.
Konsey En Papa pour Son Garson
15Mon garson! Si ou leker i saz,
mon leker osi pou kontan.
16Mon et antye pou kontan
ler ou labous pour dir laverite.
17Pa zalou bann peser dan ou leker;
me touzour annan respe anver SENYER,
18akoz i annan sirman en lavenir
e ou lespwar pa pou perdi.
19Ou, mon garson!
Ekoute e ou ava vin saz;
diriz ou lespri dan bon semen.
20Pa frekant bann bwarer diven,
ni bann ki manz lavyann avek vorasite,
21akoz bann bwarer ek bann ki voras pour vin mizer;
e afors nanryen fer, zot pour nepli annan nanryen pour mete.
22Ekout ou papa ki'n fer ou;
pa mepriz ou manman dan son vye zour.
23Kiltiv laverite e pa vann li;
kiltiv lasazes, lenstriksyon ek disernman.
24Papa sa enn ki zis pou dan lazwa;
sa enn ki ganny en garson saz pour zwaye.
25Rann ou papa ek ou manman ere;
rann ere sa enn ki'n met ou omonn.
26Mon garson! Donn mwan ou leker;
pran plezir swiv mon legzanp.
27En prostitye i en fose profon;
en fanm adilter i en pwi etrwat.
28I parey en voler ki vey lanbeli;
i rann en kantite zonm enfidel.
Portre En Soular
29Lekel ki kriy: Maler? Lekel ki kriy: Domaz?
Lekel ki dispit? Lekel ki plennyen san arete?
Lekel ki ganny bate san rezon?
Lekel ki annan lizye rouz?
30Pour sa enn ki pas letan bwar ziska tar;
Sa pour sa enn ki kontan labwason melanze.
31Pa get diven avek son zoli kouler rouz,
ler i kimen dan ou ver;
i desann tro fasilman.
32Apre, i morde parey en serpan,
e pike parey en skorpyon.
33Ou lizye pou war bann keksoz drol
e ou pou koz anbonnavini.
34Ou pou parey en zonm ki pe dormi dan milye lanmer;
parey en zonm ki anler lo en ma.
35Ou pou dir: Zot in tap mwan,
me mon pa'n ganny blese.
Zot in bat mwan,
me mon pa'n santi.
Kan mon pou leve,
mon pou demann en lot ver.
Currently Selected:
Proverb 23: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
