Proverb 20
20
1Diven i rann ensolan e labwason for i rann azite;
sa enn ki les lalkol soul li, pa kapab vin saz.
2Lakoler en lerwa i parey gronnyman en zenn lyon;
sa enn ki fer lerwa ankoler,
i riske son lavi.
3I en loner pour sa enn ki evite fer kankan;
zis bann fou ki kontan pran kouler.
4Sa enn ki pares pa travay son later ler fodre;
dan letan larekolt, i pou napa nanryen pour rekolte.
5En proze dan leker en zonm i parey delo anba later.
En zonm avek disernman i konn servi sa delo.
6Bokou dimoun i dir ki i fidel;
me lekel ki kapab trouv en zonm sir?
7Sa enn ki zis i viv onnetman;
zanfan ki vin apre li pou byennere.
8Kan lerwa i syez lo son tronn pour rann zizman,
i war toudswit sa ki move.
9Lekel ki kapab dir: Mon leker i kler;
mon pa'n komet okenn pese?
10Annan de pwa, de mezir;
SENYER i deteste tou le de.
11Menm en zanfan, i fer konnen par son konportman,
si son bann aksyon pou pir e drwat.
12SENYER ki'n fer lizye pour war
e zorey pour antann.
13Si ou kontan dormi, ou pou vin pov.
Gard ou lizye ouver e ou ava rasazye avek dipen.
14Sa enn ki aste i dir: Tro ser.
Me apre, i kontan sa ki i'n aste.
15Lor ek pyer presyez i annan an annabondans;
me labous ki annan konnesans
i en bizou presye.
16Si en dimoun i vin kot ou
pour responsab det en dimoun ki ou pa konnen,
pran son lenz an gaz;
si i responsab det bann etranze,
fodre ou egzize ki i donn en garanti.
17Dipen mansonz i dou pour konmanse;
me apre, i vin gravye dan labous.
18En plan i ganny fer ler ou pran konsey;
pour fer lager, kalkil byen koman dirize.
19Sa enn ki fer kalonmni i devwal bann sekre;
alor, pa frekant dimoun ki koz bokou.
20Sa enn ki modi son papa oubyen son manman,
son lalanp pou tennyen ler fernwanr i fer.
21Fortin ki ou ganny tro vit
pa pou profit ou plitar.
22Pa dir: Mon pou rann lemal pour lemal.
Met ou konfyans dan SENYER
e i ava sov ou.
23SENYER i deteste bann pwa ki'n ganny fose;
bann balans fose pa en bon zafer.
24SENYER ki diriz tou nou lepa;
koman alor, en zonm i kapab konpran kote i pe ale?
25Dir san reflesir: Sa i sakre,
i danzere.
Pa reflesir selman apre ki ou'n fer en ve.
26En lerwa saz i fer fannen bann malfeter;
i kraz zot anba larou maler lo zot.
27Konsyans i en lalanp ki SENYER in donn bann imen;
i eksplor dan profon leker.
28Labonte ek lwayote i protez lerwa;
son tronn i ganny soutenir par fidelite.
29Lafyerte lazenes i dan son lafors;
labote en vyeyar i dan son seve blan.
30Sikatris en blesir i en remed kont lemal;
bann kou i penetre ziska dan profon leker.
Currently Selected:
Proverb 20: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
