Proverb 19
19
1Vomye en pov ki viv onnetman,
ki en ipokrit ki bet.
2Mank refleksyon i pa bon pour personn;
sa enn ki tro prese i kapab komet bann fot.
3Par son lafoli, zonm i perdi semen.
Me apre, i met li ankoler kont SENYER.
4Larises i ogmant lakantite zanmi.
Me en pov i perdi son sel zanmi.
5En fo temwen pou ganny pini en zour;
sa enn ki koz manti pa pou sape.
6Bokou dimoun i rod faver avek dimoun enportan;
tou dimoun i zanmi avek sa enn ki donn kado.
7En pov i ganny deteste menm par son bann frer;
Anplis, son bann zanmi i les li tonbe.
Ler i apel zot pour koz avek zot,
zot nepli la.
8Sa enn ki'n ganny lasazes i trouv boner.
Sa enn ki annan disernman i viv ere.
9En fo temwen pour ganny pini en zour;
sa enn ki koz lalang pour disparet.
10I pa bon pour en zonm bet viv dan liks;
ankor mwen, pour en lesklav komann bann sef.
11Sa enn ki pridan i reste pasyan;
son loner i fer oubliy en lofans.
12Lakoler en lerwa i parey gronnyman en zenn lyon;
me son labonte i parey laroze lo zerb.
13En zanfan bet i fer maler son papa.
En fanm kankan, i parey en dalo ki pa aret koule.
14Ou paran ki fer ou erit lakaz ek larzan;
me SENYER ki donn ou en fanm pridan.
15Lapares i fer tonm dan sonmey;
sonmey i fer soufer lafen.
16Sa enn ki respekte bann komannman pou viv;
sa enn ki tanpi son mannyer viv, pou mor.
17Sa enn ki donn en pov, i pret SENYER;
i ava ganny rekonpanse pour tou.
18Koriz ou zanfan tan ki i annan lespwar;
me pa ale ziska swet son lanmor.
19En dimoun vyolan i devre pey son pri:
Si ou pa fer li, ou pe ankouraz li pour rekonmanse.
20Ekout bann konsey e aksepte lenstriksyon;
konmsa, plitar, ou ava vin en saz.
21Zonm i fer bokou proze;
me zis lavolonte SENYER ki ganny realize.
22Sa ki nou anvi war dan en zonm, se fidelite.
Vomye ou pov, plito ki manter.
23Respe anver SENYER i anmenn lavi;
ou al dormi rasazye e maler pa tonm lo ou.
24Sa enn ki pares i plonz son lanmen dan pla;
me i pa anmenn son lanmen kot son labous.
25Si ou tap sa enn ki ensolan,
sa enn ki bet ava aprann koman vin pridan.
Koriz sa enn ki annan disernman,
i ava ganny konnesans.
26En zanfan ki vyolan anver son papa
e ki rezet son manman,
i en laont e en dezoner.
27Mon garson!
Si ou aret ekout bann konsey,
ou pa pou aprann nanryen.
28En temwen san moral i bafwe lazistis.
Labous bann malfeter i devor sa ki mal.
29Zizman in pare pour bann ki ensolan;
Koudbaton pour ledo sa enn ki bet.
Currently Selected:
Proverb 19: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
