Proverb 13
13
1En zanfan ki saz i ekout lenstriksyon son papa,
me en zanfan ensolan pa ekout okenn repros.
2En bon dimoun i rekolte fri sa ki i dir.
Dimoun malonnet i konn zis vyolans.
3Sa enn ki vey lo parol ki i dir, i protez son lavi.
Sa enn ki koz tro bokou, pou konn larin.
4Dezir sa enn ki pares pa zanmen abouti;
Me sa enn ki travay dir i realiz tou sa ki i anvi.
5Sa enn ki zis i deteste mansonz;
aksyon en malfeter i fer onte
e i dezonor lezot.
6Lonnekte i protez sa enn ki azir byen.
Mesanste i anmenn larin en malfeter.
7Serten i fer sanblan i ris
alor ki i napa nanryen.
Serten i fer sanblan ki i pov
alor ki i ris.
8Larises i protez lavi sa enn ki ris;
me en pov pa zanmen ganny menase.
9Lalimyer sa enn ki zis i rann zwaye;
en malfeter i parey en lalanp ki'n tennyen.
10Larogans i provok zis dispit;
lasazes i avek sa enn ki ekout konsey.
11Larises ki'n ganny vit i disparet vit;
me larises ki'n ganny anmase ptitapti ava ogmante.
12Lespwar ki tarde realize i anmenn gran sagren;
me en dezir ki realize i en pye dibwa ki donn lavi.
13Sa enn ki pa ekout konsey
i fer li menm ditor;
sa enn ki respekte bann komannman,
pou ganny rekonpanse.
14Lansennyman en saz i sours lavi;
i ede pour evit bann pyez ki koz lanmor.
15Bon refleksyon i anmenn faver lezot;
me dimoun san konfyans i swiv en semen perdisyon.
16Sa enn ki pridan i reflesir avan azir;
me sa enn ki fou i montre son lafoli.
17En move mesaze i anmenn maler;
en mesaze fidel i anmenn gerizon.
18Sa enn ki refize aprann,
pou vin pov e ganny meprize.
Me sa enn ki aksepte kritik,
pou ganny onore.
19I en plezir kan en dimoun i realiz son dezir;
sa enn ki bet, i deteste evit sa ki mal.
20Si ou frekant en saz,
ou menm, ou ava vin saz;
Si ou frekant dimoun ki bet, ou pou ganny problenm.
21Maler i pourswiv sa enn ki fer pese;
me boner i rekonpans sa enn ki zis.
22En bon dimoun i les en leritaz pour son bann pti zanfan;
me sa enn ki zis pou erit lafortin en peser.
23Later kiltive par en pov i raport bokou manze;
me i ganny pran par lenzistis.
24En papa ki refize koriz son garson pa kontan li.
Me paran ki kontan son zanfan,
pa ezite koriz li.
25Sa enn ki zis i annan ase manze
pour satisfer son lapeti.
Me vant bann malfeter i reste vid.
Currently Selected:
Proverb 13: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
