Proverb 12
12
1Sa enn ki kontan disiplin, i kontan konnesans;
sa enn ki pa kontan ganny kritike i bet.
2En bon dimoun i ganny faver SENYER;
me SENYER i kondann bann malfeter.
3Mesanste pa met personn an sekirite;
me nanryen pa pou fer tonbe sa enn ki zis.
4En bon fanm i fer lafyerte son mari;
me en fanm ki fer onte, i parey en maladi dan lezo son mari.
5Dimoun onnet i mazin fer sa ki drwat;
malfeter i mazin zis tronpe.
6Parol bann malfeter i en latrap mortel;
me parol bann ki drwat i delivre zot.
7En malfeter i ganny detri pour touzour;
me lafanmir sa enn ki zis,
i reste solid.
8En zonm ki annan bon sans
i ganny felisite;
me en zonm avek en move leker
i ganny meprize.
9I preferab ganny meprize, me annan en serviter,
ki fer gran zar san annan nanryen pour manze.
10Sa enn ki zis i pran swen son bann zannimo;
me en malfeter i kriyel san okenn pitye.
11Sa enn ki kiltiv son later i annan bokou pour manze;
sa enn ki fer bann rev initil i mank larezon.
12En malfeter i dezir fer sa ki malonnet;
me rasin sa enn ki zis i prodwi bann fri.
13En malfeter i pri dan son prop parol;
me dimoun onnet i sape dan maler.
14Parey travay fer avek lanmen i donn en saler,
parol sorti dan labous, i anmenn sikse.
15En fou i krwar ki li tousel ki annan rezon;
me sa enn ki saz i ekout konsey.
16En fou i toudswit montre son lakoler;
sa enn ki pridan i manz anndan.
17Sa enn ki dir laverite i rann en temwannyaz onnet;
me en fo temwen pa dir laverite.
18Bann parol anler i blese parey en lepe;
me parol en saz i geri.
19Laverite i touzour valab,
me mansonz pa dir lontan.
20Sa enn ki rod fer sa ki mal,
i mazin zis tronpe.
Sa enn ki konsey lape pour dan lazwa.
21Maler pa tonm lo sa enn ki zis;
me malfeter i ganny antoure avek maler.
22SENYER i deteste sa enn ki koz lalang.
I kontan sa enn ki dir laverite.
23En dimoun pridan i kasyet sa ki i konnen;
me en fou i dir en ta betiz.
24Sa enn ki aktif pou gouvernen,
sa enn ki pares pou vin en lesklav.
25En leker ki trakase i fer en zonm tonm dan depi,
me en bon parol i donn li lazwa.
26Sa enn ki zis i donn bon konsey bann zanmi,
me mannyer fer en malfeter i tronp zot.
27Sa enn ki pares napa zibye pour roti;
sa enn ki travay dir, i ganny en bon rekolt.
28I annan lavi lo semen lazistis;
sa enn ki swiv sa semen pa pou mor.
Currently Selected:
Proverb 12: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
