Proverb 14
14
1En fanm ki saz i konstri son lakaz;
me en fanm bet i kapab kraz li.
2Sa enn ki swiv en semen drwat
i respekte SENYER.
Me sa enn ki pran move semen
i mepriz SENYER.
3Brans lorgey i bourzonnen dan labous en fou.
Parol sorti dan labous en saz i protez li.
4La kot napa toro later pa ganny kiltive, napa manze;
lafors en bef i donn bokou rekolt.
5En vre temwen pa koz manti;
me fo temwen i vomi zis mansonz.
6Sa enn ki ensolan i rod lasazes
me i pa trouv li;
pour en dimoun ki reflesi,
ganny konnesans pa difisil.
7Pa frekant en fou,
ou pa pou aprann nanryen
dan sa ki i dir.
8En dimoun pridan i vey lo son kondwit, akoz i saz;
me en sot i tonm dan betiz akoz i bet.
9Bann fou pa krwar i neseser repar en fot;
me bann dimoun drwat i rod faver Bondye.
10Sakenn i konn son prop sagren;
personn pa kapab partaz son lazwa.
11Lakaz en malfeter pou ganny detri;
me latant sa enn ki drwat pour prospere.
12En semen i kapab paret drwat pour en zonm;
me apre, i en semen ki kondwir ver lanmor.
13Leker i kapab tris menm ler ou pe riye;
apre, lazwa i kapab vin en sagren.
14Sa enn ki viv nenport koman,
ava ganny sa ki i merite.
En bon dimoun ava ganny sa ki i merite.
15En dimoun bet i krwar tou sa ki i tande;
me en dimoun pridan
i gete kote i met son lipye.
16En saz i per maler e i pas akote;
sa enn ki bet i azir tro vit
akoz i fer tro konfyans.
17Sa enn ki ankoler vit,
i azir koman en fou;
sa enn ki mazin fer sa ki mal
i ganny deteste.
18Dimoun fou i erit lafoli;
dimoun entelizan i ganny kouronnen avek konnesans.
19En move dimoun i kourbe devan sa enn ki bon;
en malfeter i esper devan laport sa en ki zis.
20En pov i ganny meprize menm par son bann pros;
me en zonm ris i annan bokou zanmi.
21Sa enn ki mepriz son prosen i komet en pese;
Byennere sa enn ki bon anver en pov.
22Sa enn ki rod fer sa ki mal
pe mars lo move semen.
Sa enn ki rod fer sa ki byen
i rankontre labonte ek fidelite.
23Tou travay i merit en lapey;
sa enn ki pas son letan koze,
pour reste touzour pov.
24Larises i rekonpans sa enn ki saz.
Sa enn ki fou i reste dan son lafoli.
25En temwen ki dir laverite i sov lavi;
sa enn ki koz lalang i en tret.
26Sa enn ki annan respe pour SENYER
i viv dan konfyans;
son bann zanfan i viv an sekirite.
27Respe anver SENYER i sours lavi;
i ede pa tonm dan bann pyez lanmor.
28En gran popilasyon i fer laglwar en lerwa.
Son pouvwar i bese si son popilasyon i diminyen.
29Sa enn ki pasyan i rezonnab;
sa enn ki ankoler vitman i montre ki i en fou.
30En lespri trankil i favoriz lasante;
me lapasyon i ronz lekor.
31Sa enn ki oprim en pov i ensilte son Kreater;
sa enn ki sekour en pov i onor SENYER.
32Malfeter i ganny kraze par son prop mesanste;
me sa enn ki zis i gard konfyans menm devan lanmor.
33Lasazes i repoz dan leker en zonm rezonnab;
i ganny rekonnet menm parmi bann fou.
34En nasyon ki pratik lazistis i grandi;
me lenzistis i fer laont en pep.
35Lerwa i apresye en serviter ki azir avek pridans;
son lakoler i pour sa enn ki fer li onte.
Currently Selected:
Proverb 14: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
